سوبر جونيور ريووك-تحليل صوت:

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد لأعملها. شكرا لتفهمكم.

بداية ووكي موقعه بسوبر جونيور والفرق الفرعية اللي هو فيها Super Junior M و KRY فوكاليست أساسي.

عنده متل كتار من سوجو أعمال منفردة وعنده Career كممثل مسرح موسيقي، وأنا متحمسة احكي عن صوته كتير لأن رح يكون فيه تغيير بنوعية الأصوات اللي شفناها سابقاً.

نوع الصوت: كاونتر تينورصوت جديد!! الكاونتر تينور في جدل على تصنيفه بالموسيقى كنوع صوت أو تكنيك صوت، أنا بصف نوع الصوت أكثر لأن في رجال أصواتهم بشكل طبيعي رفيعة وحادة. الكاونتر تينور نوع صوت رجالي نادر كتير، بيكون بشكل طبيعي عالي ورفيع وحاد مثلا ووكي حتى لما بيحكي صوته هيك، الكاونتر تينور نادرين بالطبيعة ولما بينوجدوا غالبا بيتوجهوا للأوبرا أو المسرح، يعني ووكي حالة كتير كتير نادرة إنه توجه لموسيقى البوب .

مساحة الصوت: 3 أوكتاف وتلت علامات يعني قريب من 3 أوكتاف ونصف، تالت أوسع مساحة صوت بسوجو بعد كيوهيون وهيتشول، طبعا هي مساحة صوت ممتازة.

تصنيف الصوت: صوت ذو تموضع مرتفع، مغني بصوت رأس عالي، High range belter يعني مغني بيعمل مكس على العلامات المرتفعة بالجزء الأعلى من صوته، صوت متطور بانتقالات متطورة، بهالتصنيفات ووكي بيقدر يغني أي شي بده اياه وبيقدر أكيد ينجح بالأوبرا وبالمسرح الموسيقي.

المرونة والألوان الغنائية: عادة اللي أصواتهم كاونتر تينور نوعية صوتهم بتحد من مرونتهم شوي، بس هي أبدا مش حالة ووكي، ووكي مغني مرن جدا، وهالشي بيدل على ثقافته الموسيقية العالية وحبه الكبير للموسيقى. شفنا ووكي بيغني بوب، روك، جاز، سول، الكترو، R&B ، هيب هوب، بالاد، وغيرهم وبالكل نجح صراحة. شفناه بالمسرح الموسيقي وتألق فيه، غنى بعودة سوبر جونيور الجزء الرابع تروت لأول مرة وأداؤه كان مفاجأة الي. أنا بحب صوت ووكي كتير ببعض أنواع البالاد وبالسول اسمعوا أغنيته المنفردة Hello كتير لابقله هالنوع من الموسيقى وحابة شوف ووكي عم يجرب الأوبرا علما انو جربها شوي صغيرة.

بأغنية Burn the floor المقطع اللي بيرقصوا فيه هيوك ودونغهي بتسمعوا بالخلفية صوت أوبرالي عم يقول (لا لا لا لا لا لااااا) اي هاد ووكي ووكي أدى هاد الجزء.

ميزات الخامة الصوتية: صوت ووكي حاد، رفيع، وعالي، لكن نقي جدا وكبير. صوته جدا متميز واله شخصية يعني منقدر نعرف إنه هو اللي عم يغني بدون ما نشوف الفيديو أو نعرف أي مقطع مقطعه.

صوت ووكي قادر يكون دافي وبارد بنفس الوقت، حنجرته مرنة وأحباله الصوتية كتير قوية ومتطورة. غالبا العضلات عنده المرتبطة بصوت الرأس متطورة جدا. ومنقدر برياحة نقول من التمكن العالي اللي عنده إنه ووكي حدا كتير بيتمرن وبيتعب عحاله. صوته أوقات ببين أوسع من مساحته الأساسية، بيخلينا نحس إنه صوته غير محدود أوقات.

ميزات التكنيك ونقاط قوة ريووك كمغني: من الآخر ريووك أحسن مغني بيغني من أنفه بالعالم! ريووك من اللي عندهم تكنيك خاص فيه بالغناء.

ووكي تكنيكه بيعتمد كتير على الغناء من الأنف، صوته رفيع وحاد متل ما ذكرنا بس ريووك بيخففه وبيحاول يتحكم بالحدة بإنه يغني من أنفه، بفرقة كمان للSM بس فرقة بنات في بنت بتغني بنفس التكنيك وكمان من الفوكاليست الكتير أقوياء بالكيبوب

الفكرة إنه لما منحط الصوت بالأنف طول الوقت رح نحدّ من إمكانيته إذا ما كنا فاهمين صوتنا منيح، لكن هي مش حالة ووكي. ووكي فاهم صوته وعارف يستخدمه كتير منيح.

ووكي بيحط صوته بأنفه، وصوته ما بيعلق هونيك، بالعكس بيفتح وبيطلع حر أكتر وبيخفف حدة صوته العالية. وبالتالي ووكي مغني ذكي فاهم خامة صوته منيح وعارف يوظف التكنيك ليحسن الخامة.

صوته بيضل متوازن وثابت وقوي.

الجزء الأعلى من صوت ريووك أقرب للمثالية، صعب التصديق لأي درجة مثالي، بيعمل belts عالعلامات العالية كأن ولا شي. بيغني علامات عالية بلا جهد يذكر صراحة. مثلا علامات متل A4 و B4 بيغنيهم وبيطلع صوته عميق ما حدا بيحس إنه عم يغني أصلا بصوت عالي، لأن صوته وهو مرتاح عالي، هيك طبيعته.

ريووك للمفاجأة مش قليل أبدا بالعلامات الواطية، بحبيبة الجماهير SPY غنى بعلامات واطية وأنا تفاجأت صراحة لأن كنت متخيلة عهيك صوت رفيع وعالي يطلع صوته همس بهيك علامات منخفضة، لكن أثبتلي العكس. علماً إنه الكل الآخرين بالفرقة عندهم مساحة صوت أوسع بالعلامات المنخفضة من ووكي لكن هي طبيعة صوت ووكي. هي هيك.

المكس المفتوح على صوت الرأس عند ووكي يمكن أكثر مكس مفتوح متطور ومثالي سمعته من آيدول شب على صوت الرأس والعلامات العالية.

صوته بيطلع خفيف رشيق، ما في مشاكل بالانتقالات ولا شي.

لازم نذكر كمان الاذن الموسيقية الخارقة اللي عنده، صوته لأي درجة متصل ببعضه وقوي، التحكم بالنفس الرائع عنده بيدل على حدا كتير بيتمرن، بيستخدم كل منطقة ممكنة يشيل فيها نفس بشكل مثالي لهيك مستحيل يعلق صوته بمكان معين أو يطلع محدود.

وأكيد لازم نذكر إنه بيغني بإحساس حلو واستخدامه الجيد لحليات الصوت بكتير كتير أغاني يعني بصراحة صعب جدا عدد.

نقاط ضعف ونقاط يمكن تحسينها: بصراحة ما في! كتكنيك ما في عنده نقاط ضعف. كخامة منقدر نقول إنو بالجزء المنخفض من صوته ما عنده كتير ليعمله. ما في كتير علامات مقارنة بالآخرين، مع هيك هي طبيعة صوته وهو باللي عنده عامل شي خارق وأكثر من رائع.

بفرقة غير سوبر جونيور، هل ممكن يتغير موقع ريووك؟ الإجابة هي لا، ريووك Main Vocalist مع سوجو وبغير فرقة رح يكون نفس الشي. عنده career جيد بالمسرح الموسيقي وكمغني منفرد، لكن لو ما راح عالSM أو لو ما قبلوه، متل كيو كان ممكن نشوفه بالأوبرا.

أسئلة شائعة: ليش ببعض الأغاني صوت ريووك وسونغمين بيتشابهوا شوي؟ وليش كانت مقاطعهم تجي ورا بعض؟ أول شي سونغمين و ريووك أصواتهم مختلفة بس أوقات لما سونغمين بيغني بطبقة مستعارة وبيستخدم حدة صوته بطريقة معينة بيطلع صوته قريب من صوت ووكي وفي فترة الSM كانت تجبره يغني بهاد الصوت لأن صرنا منعرف إنه الSM بيحبوا الأصوات الرفيعة والعالية. أما ليش مقاطعهم بتجي ورا بعض غالبا؟ لحتى ما يصير فرق كبير على أذن المستمع، ووكي صوته عالي كتير مقارنة بالباقي، لما بيغني مقاطعه كانوا يخلوا سونغمين يغني ورا ليعمل تدريج بنزول العلامة، سونغمين صوته تينور بس عالي شوي. هالشي كان يستخدم غالبا بأغاني البوب والسينث والالكترو، وكانوا يعملوا الشي نفسه مع أصوات الباريتون يخلوهم يغنوا ورا بعض. لو بتحبوا سلسلة عن هالموضوع نحلل أغاني سوجو وليش المقاطع موزعة بشكل معين خبروني.

لو ريووك غاب لظرف ما، مين أفضل شخص يغني مقاطعه؟ كيوهيون بيقدر يشيل جزء كبير من المقاطع العالية وييسونغ قادر كمان بس رح استثنيه لأن في مقاطع عالية كتير قادر يغنيها لأن تمرن وحكينا عن الموضوع لكن رح استثنيه لأن ممكن يتعب إذا غناها عالمدى الطويل. سونغمين أفضل مرشح بيقدر يشيل جزء كبير من مقاطعه بأقل فرق ممكن، واذا استخدم طبقة مستعارة بيشيل المقاطع العالية كمان.

بسوبر جونيور M جومي وهنري قادرين ياخدوا بعض مقاطعه بس بتفرق عليكم الأغنية شوي، وبستثني هنري من المقاطع اللي فيها علامات عالية كتير.

أداء جدير بالذكر: في كتير كتير، مرة تانية بعاني وانا بكتب هالجزء:

-أداء ريووك المنفرد بSS6 لأغنية Crescent Moon و أغنية nevet got to say I love you.

-أداء ريووك المنفرد بSS2 لأغنيته insomnia .

-ريووك كان من أفضل المشاركين ببرنامج immortal songs كل أداء اله أحلى من الثاني.

-أداء ريووك ببرنامج The king of masked singer.

-ريووك بميوزكال The face of death بمونولوج Sonata of a flame غنى بطبقة واطية بأولها كتير أداؤه جيد.

-صوت ووكي بأغاني مثل Good person و The melody و This is love وMamacita وBonamana وBelieve وour love وTraveller وTicky tocky وI think I وSuper clap وأغنيته المنفردة little prince و Hello وغيرهم كتير. صوته كان مثالي بالكل من دون أي مبالغة!

هذا كان كلشي بيخص صوت ووكي، اتركولي ارائكم واسئلتكم بالتعليقات.

جميع حقوق هذا التحليل الصوتي محفوظة لمدونتي الخاصة

Lama