شايني- أونيو/ تحليل صوت:

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد كبير لأعملها. شكرا لتفهمكم.

اليوم بيصادف عيد ميلاد ليدر واحدة من أفضل الفرق بالكيبوب ومن أكثرها تكامل ومثالية صوتياً وبنفس الوقت واحد من أفضل الأصوات الرجالية بالساحة بين الآيدولز الذكور، أونيو قائد شايني. منتمناله عيد ميلاد سعيد، وصاحبة المدونة الكسولة صدفت إنها مشتاقة تكتب تحليل صوت لهيك رح استغل عيد ميلاده ليكون تالت عضو بشايني بحلل صوته بعد جونغهيون وتيمين،(عقبال الجميع، كيبوم انطلب مني كتير وبأكتر من مناسبة ومينهو أنا حابة حلل صوته بقا لنشوف هل رح اقدر كمل الكل؟😂) أونيو فوكاليست أساسي مع شايني مع هيك برأيي هو underrated بالرغم من موقعه، خلونا نتعمق أكتر بصوته ونشوف.

نوع الصوت: تينور بس فيه عرض كتير حلو تموضعه متوسط لمنخفض هالشي مثالي للأوبرا وشفناه عم يأدي أوبرا من قبل.

مساحة الصوت: تلاتة أوكتاف وعلامتين مساحة صوت ممتازة، أغلب المغنيين الجيدين مساحة أصواتهم بحدود الاوكتافين وفوق.

تصنيف الصوت: صوت ذو تموضع متوسط لمنخفض Mid-range belter يعني مغني بيعمل مكس على الجزء الأوسط من صوته، كمان High-range belter بيعمل مكس عالجزء الأعلى من صوته، صوت مسرحي، Well rounded vocalist، وكمان مغني بصوت رأس جيد، صوت بباور عالي.

المرونة والألوان الغنائية: متل أغلب شايني أونيو عنده مرونة غنائية جيدة جداً, وشفناه مع شايني جرب مختلف أنواع الموسيقا، عند أونيو أسلوب مسرحي جدا بالغناء بيناسبه المسرح الغنائي الكلاسيكي وشفناه مع شايني بيغني بوب و هيب هوب و R&B وصوته بيناسب الجاز والسول والموسيقا الالكترونية الحديثة، أونيو يعتبر واحد من أعلى الأعضاء مرونة غنائيا بشايني ولازم اذكر إنه أول آيدول صوته Well rounded بيحققلي أمنياتي بإنه يجرب الأوبرا.

ميزات الخامة الصوتية: صوت أونيو دافي جداً جداً، أغلب شايني عندهم جرحة وكهربائية معينة بصوتهم بتعطي فوكال شايني الكاراكتر الخاص فيه والنكهة الخاصة بستايلهم وموسيقتهم، أونيو الوحيد اللي صوته كتير Smooth ودافي وما فيه هالشغلتين ومع هيك صوته مناسب جدا ومكمل جدا لفوكال شايني من دون أدنى شك، عنده خامة جدا مميزة ومريحة للأذن، صوت أونيو كبير كتير وتقيل وعريض أعرض من اغلب أصوات التينور الشائعة بالصناعة لهيك مناسب للأوبرا والمسرح الموسيقي الكلاسيكي، بيدمج بشكل رائع ليزيد حتى من حجم وكبر صوته وهالشي رح نحكي عنه بتفصيل أكتر بالفقرة القادمة، صوته فيه باور عالي هي نقطة بيتشاركها مع كل أصوات شايني تقريباً، وبالرغم من تقل صوته وعرضه عنده باور أعلى من اللي عند تيمين اللي صوته أرفع وأعلى وأحد.

ميزات التكنيك ونقاط قوة أونيو كمغني: تعريف تكنيك أونيو بكلمة واحدة؟ التوازن! أول شي أونيو من أفضل الBelters بالصناعة، يعني تكنيك الmixing والbelting عنده ممتاز وقوي جدا جدا، الRange تبع صوته كبير متل ما لاحظنا وبيعرف يستخدمه كله من أوطى علامة لأعلى علامة وبجودة جدا عالية وهالشي قليل لنشوفه عند آيدول مساحة صوته كبيرة، صوته ثابت لحد كبير وتكنيك توزيعه للنفس ممتاز لهيك لا شك ليش قدر يجرب الأوبرا، كمان بيفتح فمه كتير بشكل واسع بيسمح للهواء يدخل ليستخدمه بدمج الصوت ويعطي Support لصوت الرأس فبيطلع صوته عالي ومدموج وقوي وهاد التكنيك هو السر ورا أطول High note اللي هو صاحب رقمها القياسي، إضافة لتخزينه النفس منيح وتوزيعه على عدة مستويات من الجسم والصوت، بيطلع صوته كبير ومدموج جداً ومتوازن لأن بيوزع منيح بين صوت الراس وصوت الحلق وصوت الصدر، حتى صوت أنفه ببستخدمه منيح ليخفف صوته بدون ما يعلق الصوت هناك أو يطلع nasal ،يمكن توزيعه هو واحد من أحسن التوزيعات اللي مرت عليي بهالسلسلة. كتيرين يمكن ما يصدقوا، بس أونيو عنده nasality بصوته بس ما بتسمعوها لأن صوته عريض أولا ولأن حتى هي اللي تعتبر غالبا نقطة ضعف هو بيعرف يستخدمها لصالحه كنقطة قوة بسبب جودة الدمج عنده لهيك بيطلع صوته مفتوح كتير وولا ممكن تلاحظوا ال nasality فيه أو تسمعوها. بالمنطقة المنخفضة للوسطى من صوته، بيكون صوته الأفضل فيها، وهالشي طبيعي لأن صوته الأعرض بين أصوات التينور التلاتة بشايني (أونيو، جونغهيون،تيمين) صوته بهالمنطقة بيكون تقيل وغني جداً. يمكن ما كتيرين بيلاحظوا بسبب تكنيكه وطبيعة صوته بنفس الوقت بس أونيو بيعتمد كتير على صوت الراس والفالسيتتو وتكنيكه فيهم كتير قوي أعلى من مستوى مغني بوب عادي، وهو بيميل ليستخدم صوت الراس أكتر من باقي الايدولز الذكور وهاد الشي ذكي لأن عم بحقق فيه متطلبات الوكالة اللي هو فيها المعروف عنها تفضيلها للاصوات الرفيعة والعالية بدون ما يخلي صوته يعلق أو يكسر أو يسكر. تكنيكه المتوازن بيخليه ما يدفش صوته كتير لورا ولا لقدام، بيطلع صوته full وكبير ومتصل ومدموج جدا. نقطة أخرى بتحسب اله هي الثقة بالنفس الكبيرة، أونيو بيغني متل المحترفين عالمسرح من لما كان روكي.

نقاط ضعف ونقاط يمكن تحسينها: يمكن أغلبكم متوقع إنه ما في نقاط ضعف لأن قليل لتشوفوني مصنفة فوكاليست Well rounded وذاكرة نقاط ضعف بس للأسف في، بس شي كتير بسيط. صدقوا أو لا تصدقوا، بس أونيو عنده مشكلة التحكم بحدة الصوت أو الpitch وهي بظن سببها ستايل الفرقة اللي هو فيها، ذكرت قبل إنه شايني عندهم تنوع أصوات كتير كبير وتنوع كبير كمان بس مع قواسم مشتركة كتيرة متل جرحة الصوت وكهربائيته والباور العالي وغيرها (بس اعمل Vocal Shadowing لكل الفرقة بحكي بتوسع عن هالموضوع ) بس أونيو هو أقل واحد عنده من هالقواسم المشتركة بيناتهم ولهلسبب بيواجه هالمشكلة ببعض المناسبات، مثلاً وقت يستخدم الnasality اللي عنده ليرفع ويخفف صوته وهالشي شائع جدا بالكيبوب وخاصة عند الSM اللي بتفضل أصوات التينور الرفيعة والعالية، اللي بيصير أوقات إنه صوته بيكسر عند مطرح معين لأنه صوته بالأساس أتقل واعرض من باقي التينور بالفرقة ونفس المشكلة موجودة عند كيبوم اللي هو باريتون فصوته بشكل طبيعي عريض، أونيو إذا شد كتير وهو عم يستخدم الnasality اللي عنده بتصير هالشغلة بيلاحظ هالشي فبيحاول يرجع يضبط حدة الصوت عنده، بس لما بيكون مرتاح ما بتحصل هالمشكلة، وما سمعناها بولا أغنية مسجلة لشايني صارت بمناسبات قليلة عالمسرح وبالكاد ملحوظة. عدا عن هيك أونيو من أقوى المغنيين بالصناعة لا شك بهالشي وunderrated جدا.

بفرقة غير شايني، هل ممكن يتغير موقع أونيو؟ الجواب هو لا، أونيو حاليا Main vocalist اللي هو أعلى موقع صوتي لأي حدا بفرقة وبغير فرقة ما بيتغير أي شي، مؤهلاته بتحطه دائماً فوكاليست أساسي.

أسئلة شائعة أو قد تكون شائعة: ليش منحس أوقات صوت أونيو ممكن ينتمي لفرقة تانية؟ الإجابة مرت بهالمقال، شايني كلهم عندهم قواسم مشتركة بأصواتهم مع اختلافات فريدة وكافية تعطي هوية كتير اوريجنال للفرقة، مع هيك أونيو بيزيد عنده عدد الاختلافات عن عدد القواسم المشتركة.

بمقال Vocal Shadowing اكسو، ذكرت إنه لاي عنده بصوته ستايل بيناسب كتير شايني ولو منضم للSM قبل ترسيم شايني وارد كتير كان يترسم معاهم، ليش عم اذكر هالشي هنا؟ لأن أونيو ستايل صوته أقرب لستايل اكسو لهيك في كتير اكسوال بعرفهم بيقولوا إنه اونيو الصوت المفضل عندهم برا اكسو، ويمكن لو اونيو انضم للSM بعد ترسيم شايني كان وارد كتير يترسم مع اكسو.

مين أفضل شخص ياخذ مقاطع أونيو بالفرقة؟ ذكرت قبل إنه كل شخص بشايني صوته مختلف عن التاني كتير, لهيك غياب أي حدا رح يترك فراغ ويخلي الأغنية تفرق, التينور الوحيد المتبقي بالفرقة غير جونغهيون هو تيمين ومع هيك ما برشحه نظراً للاختلافات الكبيرة ببنية الصوت، كيبوم باريتون بس عنده باور عالي وتحسن مؤخراً كتير الhigh register اللي بصوته وهالشي بيأهله أكتر يعوض غيابات أونيو، مع هيك تيمين بيقدر يشيل هالمقاطع بعد كل هالتطور اللي عمله عصوته بس رح تفرق الأغنية كتير، أفضل مرشح بدون ما تفرق الأغنية لدرجة كبيرة هو كيبوم.

أداء جدير بالذكر: بصراحة أونيو قوي جدا عالمسرح صعب كتير نختار أفضل أداء لايف لأن كل أداء اله قوي من لما كان روكي!

-أداء أونيو لأوبرا Nessun Dorma هو طبعا برأس القائمة، تحية كبيرة للجرأة اللي بمحلها.

-أداء أونيو لأغنية please don't go برفقة جونغهيون.

-صوت أونيو بأغنية Blue من أجمل الاغاني.

-أداء أونيو بأغنية Friend ما في داعي أذكر ليش هالأداء عالقائمة بظن😁

-بأغنية Encore بتسمعوا الlow register الرائع اللي بصوته واللي نادر لتينور يكون بالجودة.

-صوت أونيو بالأداءات اللايف لأغنية Hold you وone minute back مثال عن التكنيكات اللي حكيت عنها.

- صوت أونيو بأغنية Replay و Hello وStand by me وone of one و alarm clock تألق جدا، وبالألبوم الجديد لشايني صوته حقق اكتمال عالي.

هذا كان كلشي بيخص صوت أونيو، اتركولي ارائكم واسئلتكم بالتعليقات.

جميع حقوق هذا التحليل الصوتي محفوظة لمدونتي الخاصة

Lama🦋