حديث عن ألبوم NCT127 الجديد Sticker:

الألبوم يمكن ما حدا لاحظ هالشي بس هو Concept Album يعني في Storyline بتتطور عبر الألبوم أغنية ورا أغنية بشكل كتير عبقري.

الشغل والمجهود اللي انوضعوا بالألبوم كتير كبار واضحين، خلينا اعطي أول شي تحية للتنويع والجرأة سواء بالموسيقا، الألحان، الكلمات أو المواضيع، إضافة تحية للشباب التسعة اللي محققين كلهم تطور كتير كبير ولطلعتهم برا الصندوق تبعهم واحد ورا التاني بالأغاني هالشي جد بيستحقوا تقدير عليه.

رح احكي بهاد المقال عن كل أغنية على حدى، رح اذكر الأغاني اللي حبيتها كمان، رح اذكر مين كانوا نجوم أغنية معينة والسبب، كمان رح نعمل شي جديد ولا مرة عملته بهي المدونة وهو انو رح نحكي عن مفهوم الألبوم كيف عم يتطور على مدى الألبوم وهالشي حسيته ضروري فقط لترابطه الشديد مع مواضيع الأغاني والكلمات.

مهم جداً وقبل ما نبدأ: هذا المقال مجهودي الشخصي وأخذ وقت من العمل والاستماع والكتابة والتعاون مع أصدقاء كوريين ليراجعولي الترجمات المتوفرة للأغاني ويدققولي اياها, لذلك لو حبيتوا المحتوى بتمنى تشاركوه حصراً من المدونة ولا تنسخوا وتلصقوا أو تنقلوا بشكل عشوائي. (احفظ حقوق الناس تحفظ حقوقك) شكراً لتفهمكم 💚💚💚 خلونا الأن نبدأ:

اللي ما سمع الألبوم اسمعوه من فضلكم، الألبوم فيه مزيج حلو يرضي كل الأذواق إضافة لجودة عالية جدا بالألحان والكلمات.

كمان الأغاني متنوعة بطريقة عاطية فرصة لكل حدا من الفرقة يشع ويسطع نجمه ويتألق، مع العلم ان وحدة 127 فيها أكبر مزيج صعب الشغل معاه من الأصوات، تنوع الأصوات اللي فيها فيه شويه تحدي بس هاد الألبوم أكتر ألبوم لحد الآن متعاملين فيه مع أصوات الكل بطريقة مرضية جدا.

حبيت كمان كيف الفوكال لاين مساهمين بالراب والراب لاين مساهمين بالفوكالز فشفنا تعدد المواهب والتمارين والجهد اللي عم يحطوه.

-المفهوم:

اوكي هون من هلأ ما رح تسمعوا الشغلات تاني بتشوفوها بكل غروب كيبوب تبع مفهوم جريء وكيوت ومدري شو، هون رح نحكي عن الstoryline اللي وراها كل الألبوم وأغانيه وهي اللي خلت هالعمل كله على بعضه عبقري من وجهة نظري.

اسم الألبوم Sticker وصار في لعب على هالكلمة خلال الترويجات لأقصى مدى ممكن وهالشي مش جديد على NCT وكان ممتع كتير كتير، شفنا الأولاد اللي هم بالنهار طلاب معهد التكنولوجيا NCIT اللي هو لعب على كلمة NCT "مرة تانية تحية للظرافة والذكاء اللغوي اللي بحبه عندهم " وبالليل نفس الأولاد بيشتغلوا هاكرز، وابتدت الترويجات بالبحث عن مين هو الsticker بينهم.

مارك قال إن Sticker بتعني انهم حابين To stick with their fans يعني يضلوا قريبين من الفانز.

تايونغ قال إضافة لهاد الشي الأغنية الرئيسية كتير تجريدية وفيها كتير أفكار غير هيك.

انعمل لبعض الأغاني الجانبية بالألبوم فيديوهات ترويجية وهالشي لقيته كتير حلو، رح احكي عن فكرتهم بس احكي عن الأغاني نفسهم.

بس عموما مفهوم الألبوم جامع عالم الشباب/المراهقة وبنفس الوقت في شي من الأحلام، ازدواجية الليل والنهار، أحلام الشباب وغيرها من المواضيع رح تشوفوها على مدى الألبوم عم تطور أغنية ورا أغنية، حبيت فكرة Sticker مع مفهوم طلاب معهد التكنولوجيا ولأي درجة الستيكر على بساطته ممكن ينشاف من وجهات نظر إبداعية مختلفة وبصراحة الشباب ما قصروا من هالناحية، استثمروا كلمة sticker بكل تأويلاتها الممكنة!

-الأغاني:

1- الأغنية الرئيسية Sticker:

متل أي أغنية رئيسية لNCT هي الأغنية بتعطيكم انطباع الNCT أو خلينا نسميه ال NCT Experience 😂 و اللي هو ببساطة انو تسمعوا أغنية وتقولوا لحظة لحظة شو هاد اللي سمعته من شوي، بعدها بتعيدوا سماعها على كذا مرة وبتلاقوا إن الأغنية it makes sense.

وصف تايونغ للأغنية بالتجريدية من الناحية الموسيقية دقيق وما بختلف معاه، لأن الأغنية فعلاً تجريدية كتير كموسيقا وكتير ماشية بعكس الtheory وهالشي كتير NCT لأن معروفين بستايلهم المستقبلي والخارج عن المألوف. الأغنية صايرة Trap مع لحن فلوت بالlead حاطينله synthesiser وهالشي كتير جديد بالtrap وما حدا قبلهم عامله بالمناسبة، إضافة لغيتار الباص والغيتار الكهربائي والكمنجات الكهربائية وتنوع الايقاعات المدهش والحلو كتير.

حابة شوف هي الأغنية بمشروع لSM Orchestra رح تطلع حلوة كتير بتخيل.

خلونا نحكي هلأ بالكلمات الجريئة نوعاً ما، هي اكيد مش أجرأ أغنية لNCT127 بس هي حتماَ الأجرأ بهالألبوم، واعذروني ما رح اشرحهم بس كبناء على الموضوع نفسه بعتبر كلمات الأغنية جيدة جدا.

الأغنية حسب ما قال مارك مهداة للفانز وهالشي غير تقليدي لأغنية رئيسية بس حبيته كتير.

بالمناسبة تايونغ ومارك مساهمين بمفهوم الألبوم وبكلماته ككل.

وعلى سيرة المفهوم افتتاح الألبوم بهي الأغنية فكرة جيدة، عدا عن إنها الرئيسية بس باللاين تبع تايونغ بيقول فيه شي بما معناه stick whatever you like on me، رح نشوف بالأغاني اللاحقة كيف فكرة كل الألبوم مرتبطة بالأحلام والابداعية والأشياء اللي منبنيها بأنفسنا من خيالنا.

منجي الأداء كتير في باور بأسلوب الغناء ولا مرة شفنا دويونغ عم يغني بهيك باور حبيت كتير، لهيك قلتلكم هي الأغنية والألبوم ككل كتير NCT بس كمان عم يعملوا شغلات ولا مرة عاملينها قبل.

كمان دويونغ لسا متأثر شكله بالمسرح الموسيقي، كتير عم يغني بأسلوب مسرحي بهي الأغنية بس هالشي حبيته كتير.

حبيت إنو عند دخلة الكمنجات خفضوا الkey شوي بطريقة تسمح لجوني ويوتا يغنوا بمنطقة راحتهم وهاد اللي بسميه الاستخدام الصحيح للأصوات. ونفس المقطع غنوه دويونغ وجايهيون عنفس مستوى الكمنجات فحسينا انو سمعنا مقطعين مختلفين بس هو نفسه.

بناء الأغنية كتير حلو، في جسر كبير وتوزع تقريبا على كل الفرقة وجزء منه غنوه الكل، الجزء المفضل عندي بالجسر هو لاين جايهيون ويوتا اللي فيه ميلودراما ومونودراما هاد لاين memorable بامتياز واختيار هالاتنين ليغنوه بأصواتهم الرخمة والمسرحية والمثيرة بنفس الوقت كتير اختيار موفق.

نجوم هي الأغنية: دويونغ لأن متحسن كتير الباور تبع صوته وواضح عم يتمرن كتير، جايهيون لأن كتير غنى بتكنيكات ولا مرة سمعته عم يغني فيهم معناها كمان عم يتمرن كتير، يوتا لأن غنى أكتر لاين بيعلق بالذهن بكل الأغنية.

كمان لازم قول الكل أدوا حلو بهي الأغنية، تايل وهيتشان هي أغنية بتناسب أصواتهم بشكل طبيعي، كمان جوني كتير واضح عم يتمرن.

2-الأغنية الثانية Lemonade:

سمعت كتير عالم بدهم Lemonade تكون أغنية رئيسية، الأغنية عم تحكي عن الهيترز فما بعتقد إنها فكرة جيدة لتكون أغنية رئيسية بس الTrap اللي فيها بيجنن، بشرق آسيا بس حدا يغار منك أو عليك أو ينقهر منك بيقولوا عنه محمض منك متل لما نحنا منقول مفلفل منك هيك شي تقريبا 😅 بعتقد وضحت فكرة الأغنية.

مع هيك رح ضيف إني حبيت كيف مارك ذاكر أسماء كتير من أغانيهم ضمن الراب تبعه بطريقة تخليهم جزء من اللاين يعني في لعب عاللغة كتير حلو وممتع هون.

منجي هلأ للأداء، حبيت كتير وجود جايهيون كرابر بهي الأغنية للي ما بيعرفوا جايهيون قدم على SM ليكون رابر بس SM اختاروا يحطوه كفوكاليست فحبيت كتير إنه عم يعمل الشي اللي كان حابب يعمله أساسا بهي الأغنية وهالشي كان واضح بأداؤه.

حبيت استخدام صوت دويونغ ويوتا وهيتشان وتايل بالخلفية كتير عبقري خاصة ورا بعض مقاطع الراب.

الراب السريع اللي انعمل بين الراب لاين كلهم واو!! مسرحية!

هي الأغنية من لما نزلها فيديو تشويقي كنت متحمستلها كتير لأن فيها مجهود كتير حلو، كمان توزيع المقاطع من بياخد كل جزء كتير حلو ومنطقي ومريح للاذن.

مراعيين تنوع الأصوات بطريقة جيدة جداً حتى عند الرابرز تتالي المقاطع متوزع بطريقة حلوة ومريحة كتير.

بتخيل هي الأغنية نزلها فيديو تشويقي لأن عرفوا الفانز رح يحبوها ولأن بتمم جزء من القصة ككل إلى جانب الأغاني اللطيفة اللي نزلها فيديوهات تشويقية هي نزلت لتمثل الduality اللي حابين يقدموها أصلا.

معلش كمان نحكي عن جونغوو عم ينضم كمان للراب لاين بهي الأغنية؟ ما توقعت عنده هيك صوت إذاعي ورخم، مع إنه عنده حنجرة مثيرة للاهتمام كتير خاصة وقت شفته وهو بيحكي وهو بيقلد أصوات باقي الأعضاء وضحكاتهم.

أما الآن جينا للطبق الدسم عالمائدة، يوتا أخد جسر الأغنية! وإذا ما خانتني الذاكرة في أغنية تانية بالألبوم أخد جسرها كمان، الأداء اللي عمله وراه تمرين كتير واضح، صوته كتير كان مفتوح وحلو وبصوت يوتا في هيك تأثير كتير بيلبق لهي الأغنية فهالشي زاد من جمالية هي الأغنية وكنت متوقعة هو أكتر واحد يسطع نجمه فيها.

نجوم هي الأغنية: كل الراب لاين وكل اللي أخدوا مقاطع راب، يوتا طبعا بشكل خاص عالتطور الحلو اللي عمله وجايهيون وجونغوو لأن شفناهم عم يعملوا شي جديد ولا مرة شفناهم فيه.

3-الأغنية الثالثة Breakfast:

كيبوبرز الجيل الثاني رح تحبوا هي الأغنية كتير! هي الأغنية كتير فيها نكهة كيبوب الجيل الثاني على نوستالجيا على NCT.

كمان لاحظت الأشخاص اللي ما بيسمعوا كيبوب بالعادة عجبتهم هي الأغنية كتير، ابتداء من هي الأغنية في عنا Storyline واضح، كلمات هي الأغنية عاطفية وجريئة ومثيرة وعم تحكي ببساطة عن لما منفيق الصبح ومنتمنى وجود الشخص اللي منحبه جنبنا.

منجي للأداء، تايل وجونغوو وجوني هي الأغنية مصممة الهم كتير مناسبة لأصواتهم كتير عم يغنوا بارتياح، يوتا وانا بسمعه صرت صفق تلقائيا! كتير متحسن عنده تكنيك الmixed voice والbelting بشكل مثير للإعجاب والheadvoice اللي استخدمه وقت غنى اللاين مع جوني "اللي كان عم يعمل راب" أنا فعلا صفقت ماعم امزح 😆.

تايونغ كالعادة بيأدي الراب تبعه باستخدام صوت الصدر وهو من الرابرز اللي كتير قليلين اللي بيعملوا هالشي وبهي الأغنية كتير هالتكنيك عطى لصوته تأثير حلو.

4-الأغنية الرابعة Focus:

هي إحدى مفضلاتي بهالألبوم "إذا يمكن ما كانت المفضلة بس بحس بحبها هي وdreamer بنفس الدرجة"، الأغنية جميلة بشكل والكلمات شعرية وعالية الجودة واللحن كتير حالم وحلو.

هي أغنية بوب وR&B حديث رح تفرح قلب أي Millennial! خاصة اللي كانوا فانز لفرقة Blue البريطانية بالألفينات، كتير في لمسة الR&B الرايق تبع الألفينات مع نكهة الحداثة تبع NCT على شوية تأثير هاوس كتير حالم، لأي حدا كتب الموسيقا شكرا كتير كتير عمل موفق!

كلمات الأغنية بتحكي عن حالة ما قبل الاعتراف بالحب، وقت نكون منحب وخايفين من مشاعرنا واللي جوانا اكبر من إن نقوله وحاسين وشبه متأكدين إن اللي قدامنا بيحبنا كمان بس لا نحنا ولا هم عم نبادر.

الكلمات حالمة وشعرية وفيها تساؤل حلو كتير وتردد هيك شي بيجيب فراشات بالمعدة خاصة هاللاينز "I can't wait no more" و "What you gonna do" بطلب من الSM تستثمر بكل اللي غنوا هدول اللاينز بالمسرح لأن الأداء صادق بشكل خلوني حس إني فعلا حبيبتهم اللي ما عم تبادر "قطعولي قلبي أقسم بالله"😂 خاصة يوتا صوته كتير كبير وfull واكتر واحد أخد هاد اللاين وعمل تلوين بالtone تبعه وبالنبرة يستحق نشوفه بالمسرح عليه شي يوم إضافة لأن غنى بإحساس حلو كتير.

الأغنية أبدا مو سهلة للأداء بالمناسبة، مكتوبة على key أوطى شوي من اللي بتختاره الSM بالعادة بس جاي بشكل مناسب لكل الأصوات بالفرقة ومرة تانية هالشي ذكرني بفرقة Blue كان عندهم تنوع بالأصوات كتير بيذكرني باللي عند NCT127 وكتير كانوا يغنوا هالستايل خاصة بالأغاني الجانبية.

دويونغ يفتتح هي الأغنية هو أفضل خيار بصوته الbreathy اللي كتير حالم ولطيف وبيندمج بشكل حلو مع هيك موسيقا، هيتشان كمان صوته بيندمج حلو كتير مع هي الموسيقا وكان أداؤه كتير كتير جيد وفي نضج وتطور بحنجرته لازم ينحكى عنهم شي يوم.

مرة تانية تايونغ وصوت الصدر اللي بيستعمله بالراب كتير جاي مناسب لهي الأغنية وحبيت تدرج الأصوات اللي عملوه بتوزيع أشطر الراب من الصوت الأعرض بالفرقة والراب لاين تايونغ بيجي بعده جوني للصوت الأرفع بالراب لاين مارك، هي حركة فيها استخدام صحيح للاصوات ومريحة للاذنين كتير.

كمان صوت جوني تم استخدامه بالخلفية مع إيفيكت إذاعي وLo-Fi شوي وهالشي زاد من التأثير الحالم اللي بهي الأغنية.

جايهيون أخد مقطعه الأهم بعد الراب لاين وقت وطي الkey أكتر بالأغنية والحركة اللي عاملينها ذكية لأنها اولا مريحة اله كصوت باريتون تانيا رح تخلي صوته يزبط أكتر بهي الأغنية.

استخدام أصوات تايل ودويونغ وهيتشان ويوتا وجونغوو بالخلفية حلو كتير وزاد التأثير الحالم على الأغنية.

الكل كانوا نجوم بهي الأغنية لهيك حبيتها كتير.

بنصح بشدة تسمعوا الأغنية وتشوفوا الكلمات لأي درجة حلوة لأن بدها حديث لوحدها الكلمات.

5-الأغنية الخامسة The Rainy Night:

هي أغنية بشكل خاص للفوكال لاين الرئيسي والأساسي تبع الفرقة وأبدعوا بأدائها بصراحة.

حبيت دخلة البيانو بأول الأغنية، عندي صديق موسيقي ما بيسمع كيبوب بس كتير عجبته الأغنية هي و breakfast وRoad trip.

الأغنية أغنية بالاد ومن الآخر هي فعلا قصيدة، الكلمات كتير شعرية ومتعوب عليها، ضمن الكلمات رح تكتشفوا إن المطر هو دموع الشخص بطل الأغنية وإن الريح اللي بتملأ صدره هي الحب اللي بتغمره فيه حبيبته، كمان بصورة شعرية تانية الحبيبة هي المطر اللي عم ينسكب بغزارة وكرم على بطل الأغنية لدرجة عم يتسائل إذا كان بيستحق كل هالحب، كتير جميلة ومليانة صور شعرية قد ما أحكيلكم.

الأغنية عاطفية وحزينة بالكلمات بتحسوا في عاشق قاعد باللحظة الحالية مع الشخص اللي بيحبه بس عم يهلوس بانفصال، شي بيشبه اللي ممكن تحسوه بكلمات أغنية K لفرقة Cigarettes after sex بس بالمقلوب لأن بأغنية K الانفصال حدث فعلا بس الهلوسة عم تكون باللحظات الجميلة اللي انعاشت قبل.

هي الأغنية بعد Focus بتمم قصة معينة لأن بالحالتين في حلم وفي هلوسة.

لاحظوا إن Breakfast بتمثل أول مرحلة الحب وقت بيكون في إنجذاب وهوى خلينا نقول، بتجي بعدها Focus اللي بتمثل الوقوع بالحب الحقيقي، وبعدها هي الأغنية اللي بتمثل الخوف من فقدان اللي منحبه. قلتلكم ما في ولا شي عشوائي بهالألبوم.

جايهيون يفتتح الأغنية فكرة جيدة لأن الأغنية بتبدأ واطية وبعدها بتعلى، هيتشان متحسن كتير الrange تبع صوته وعم يغني عالواطي حلو كتير هو وجونغوو، أما تايل فهو نجم هالأغنية بدون أي منازع لأن قدر يستخدم كل جزء بصوته فيها وأخد مقاطع انتقالية وصوته وتكنيكه عمل صلة وصل بين جايهيون الباريتون الوحيد بين الخمسة اللي عم يغنوا "هيتشان، جونغوو، جايهيون، دويونغ وتايل " وبين الباقيين اللي أصواتهم كلها تينور ما عدا هيتشان كاونتر تينور.

6-الأغنية السادسة Far:

هي الأغنية كتير حلوة، مزيج من الروك والTrap مع بعض عاطي كتير باور حلو.

حبيت كيف اللازمة مقسمة ما بين فوكالز وراب ولاين الراب باللازمة كتير قابل للتذكر وبيعلق بالذهن "get ready get ready dreaming area" خاصة مع الأصوات الgreedy للراب لاين اللي عم تعاكس أصوات الفوكال لاين بشكل كتير حلو.

انا مبسوطة إنه في أغنية روك بالألبوم هي من الشغلات اللي كنت متمنية شوفها، الأغنية عم تحكي عن شاب عم يلاحق أحلامه لأبعد مدى ومهما كلف الثمن ورح تشوفوا ارتباطها القوي بالأغنية اللي بعدها.

منجي للأداء: تايونغ افتتح هي الأغنية كما يجب أن تفتتح، رح تكملوا سماعها اكيد بعد هيك افتتاحية كتير الايقاع كان جيد.

جوني أخد لاين مش سهل غنائياً وغناه حلو، يوتا بيحب الروك وكان واضح استمتاعه وهو عم يغني كتير منعكس على أداؤه، دويونغ وهيتشان روك ستارز بالفطرة، وهيك أغنية ناقصها بس high note كهربائي من تايل وحصلنا عليه بالفعل.

الكل دون استثناء نجحوا بالأداء بس حبيت أذكر الأداءات اللي لفتتني كتير.

7-الأغنية السابعة Bring the Noise:

هي الأغنية كمان بعتبرها Classic NCT وإذا كانت The Rainy Night هي أغنية الفوكال لاين فهي الأغنية للراب لاين بامتياز.

أغنية Trap مع إيقاعات كتيرة ومتنوعة وكمية كبيرة من المؤثرات الصوتية الممتعة، على عكس الأغاني اللي قبل هون ما مستخدمين التدرج الصوتي بتوزيع اللاينز بل معتمدين عالتعاكس وهاد استفادة جيدة من تنوع الأصوات الصعب اللي عند NCT127 من جهة، وبيليق جدا بالtrap والموسيقا الحديثة من جهة أخرى.

مع إن هيتشان أخد راب لاين صغير بس ترى اله مستقبل! هيتشان حنجرته متطورة وصوته صح مثير للاهتمام وكتير فيه كاراكتر بس مرونته الغنائية مدهشة "لازم نعمل تحليل صوت انطلب كتير مني".

منجي للفوكال لاين دويونغ وهيتشان بشكل طبيعي أصواتهم بتلبق كتير كتير للموسيقا الحديثة، يعني وجودهم بمواقعهم مع NCT ومفهوم NCT كفريق قائم على فكرة الحداثة والثقافة التكنولوجية والمستقبل ككل هو الشي الصح بدون أدنى شك!

وحبيت لاين "getting out of control fly " كتير كانوا عم يأدوه هيتشان وجونغوو بكهربائية بتحسوه طالع من لعبة فيديو.

الأغنية حماسية وحلوة وعم تحكي عن NCT! وجودها بعد Far بالألبوم مش عشوائي طبعا! Far بتحكي عن شاب بيلاحق أحلامه، هاد الشاب هو أي عضو من NCT لهيك اجت هي الأغنية لتخبركم شو أحلام هالشاب.

8-الأغنية الثامنة Magic Carpet Ride:

أغنية حالمة ورايقة كتير، كلمات الأغنية بتحكي عن شخص عم يحلم يكون علاء الدين ويطير عالبساط السحري ليلتقي بالأميرة ياسمين.

الأغنية مرة تانية فيها موضوع الرحلة والحلم والرحلة عبر الأحلام تحديدا، باللاين اللي بيغنيه هيتشان بيقول فيه Ride the dream and fly منفهم من هاد إن الحلم فعلا هو وسيلة النقل لنسافر لعوالم أخرى ونلتقي باللي منحبهم يمكن! الأغنية مليانة خيال والكل غنوا فيها فوكالز ما عدا مارك.

الأغنية مكتوبة على key أخفض من اللي بتسمعوه عادة مع أغاني الSM وهالشي مرة تانية مريح كتير للأصوات اللي بNCT127 .

كيبوبرز الجيل الثاني رح تحبوا هي الأغنية، فيها نكهة من بعض أغاني سوبر جونيور الجانبية القديمة بس مع لمسة حالمة ومستقبلية تلبق لNCT ولمفهوم الألبوم ككل.

الايقاع كتير حلو ومتنوع بهي الأغنية.

خلونا نحكي بالأداء، هي الأغنية ماشية على ثوابت معينة لأن بصراحة وبسبب التنوع الصوتي اللي بNCT127 صعب بعض اللاينز يغنوها أكتر من عضو ويطلعوا نفس الشي، والمشكلة اختلافهم ما رح يطلع حلو لمفهوم هي الأغنية. مثلا الجسر بعد اللازمة اللي بيغنيه تايونغ ولا حدا بالفرقة رح يقدر يغنيه متل تايونغ وصوت دويونغ بالخلفية وراه كتير كان عامل تعاكس حلو.

أصوات جوني وجونغوو بتندمج حلو كتير جنب بعض وأنهم يغنوا مع بعض لايناتهم بهي الأغنية فكرة حلوة.

هي الأغنية كتير بتلبق للأصوات العريضة أو الكبيرة وذات الطابع الاذاعي بنفس الوقت بالفرقة تايونغ وجوني وجايهيون ويوتا وهالشي بيفسر ليش آخدين مقاطع كتير فيها.

تايل صوته استخدم كتير بالfreestyling بالخلفية مع انو طابع صوته وتكنيكه ومرونته كلهم بيسمحوا انه يغني مقاطع أكتر بهي الأغنية، بس بتخيل المنتجين كانوا حابين يتألق ويعمل شي ما حدا غيره بالفرقة بيقدر يعمله.

وبالمناسبة هي الأغنية اذا اي حدا غاب وعوض غيابه فيها حدا تاني رح تفرق عليكم بشكل.

ليش مارك ما غنى بهي الأغنية؟ الخيار الافضل لمارك هو انه يكون رابر بهي الأغنية لأن صوته بالفوكالز فيه طاقة عالية وpitch مليان حيوية ما رح يناسب أغنية متل هي.

هي الأغنية نزلها فيديو تشويقي بالمناسبة، وكتير حمستني لأنها فرجتني التنوع الكبير اللي ناطرنا بالألبوم. وبالفيديو منشوف الأولاد مع كتير هوايات ونشاطات إبداعية أو الها علاقة بالحركة، التنقل، السفر، الطبيعة الحية والصامتة.

9-الأغنية التاسعة Road Trip:

هي محبوبة الجماهير، لحد الآن ما شفت حدا ما عجبته! حتى اللي ما بيسمعوا كيبوب من معارفي وسمعتهم الألبوم اختاروها كأغنيتهم المفضلة.

الأغنية كموسيقا فيها كوردات كتير حلوة ولطيفة وفيها هارموني كتير حلو.

الكل غنوا متل ما شفتوا وغنوا مرتاحين بمنطقة الراحة تبعهم وهي الأغنية بعتبرها الأغنية اللي مكتوبة بطريقة إنه فعلا فيها لاين لكل عضو! الكل كان قادر يغني فيها لأنها مكتوبة لتناسب الكل، لهيك الكل نجوم الأغنية بس أنا حابة من عندي قول إنو مارك وتايونغ تألقوا كتير كتير.

كمان الأغنية عن رحلة لمكان ما حدا بيعرفه غير المستمع وNCT والاغنية اللي بعدها بالألبوم رح توضحلنا شوي وين هالمكان أو شو هو، بس رح اعطيكم تلميح بالشطر الأول اللي بيغنيه تايونغ بيقول فيه This is liberating so baby don't sleep.

هي الأغنية كمان نزلها فيديو تشويقي، وفيه جو الdorm تبع طلاب معهد التكنولوجيا اللي شفناه بالترويجات.

كمان الفيديو التشويقي كتير مرتبط بالاغنية القادمة، بيبدأ الفيديو بالاولاد وهم عم يراقبوا المطر بتذمر متل لو ان الroad trip تعطلت بسبب الطقس، بنفس الوقت بتشوفوهم بعدها عم يزيحوا الاثاث ويقربوه للنافذة، بتشوفوا البعض نعسانين، وأجواء كتير cozy مع كتير مخدات وبطانيات متل لو انهم رح يناموا بالصالة ويسافروا للمكان اللي ما حدا غيرهم بيعرفه بالأحلام، مرة تانية الموضوع هاد عم يتطور خلال الألبوم أغنية ورا أغنية.

10-الأغنية العاشرة Dreamer:

هي الأغنية الأولى اللي نزلها فيديو تشويقي وتقريبا كل ال theme العام تبع الألبوم قائم عليها.

يمكن سبق وحكيت انهت أغنيتي المفضلة بالألبوم جانب Focus، بتذكر وقت نزل الفيديو ضليت عيده وابتسم لساعات لأن كتير حبيت الconcept.

لاحظوا الموسيقا الحالمة والتجريدية هي الtheme لكل الألبوم تقريبا بس هي الأغنية على العكس مرحة وطفولية وحيوية ونشيطة جدا! الفيديو التشويقي فكرته ككل بالديكور واللبس الملون المزركش وكلشي متل كأن NCT 127 مجموعة لعبات ببيت اللعب! حتى بتشوفوا من اول لقطة جايهيون بيضغط عالزر ليشغل لعبة القطار وبيكون هو وجونغوو وهيتشان قاعدين عم يلعبوا بالقطار اللعبة وألعاب تانية ومنشوف جونغوو معاه منظار، بالمقابل باقي الأعضاء كانوا بقلب مقطورات القطار وهناك في حفلة، في كتب، في ورود، في المزيد من الألعاب! وبتلاقوا بلمسة سحرية التلاتة اللي كانوا بيلعبوا وبيمثلوا الأطفال خلينا نقول بينضموا للي بقلب القطار اللي بيمثلوا الدمى وبيصيروا جزء من لعبتهم!

كلمات الأغنية بتدعي المستمعين ينسوا همومهم ومشاكلهم ويروحوا مع NCT برحلة عبر الأحلام لعالم بيبنوه بخيالهم، عالم طفولي وجميل! أحلى لاين بالاغنية Ding ding get on the elevator عبساطته بيفرجيكم انو وسيلة النقل لعالم الأحلام مصعد من السرير للسماء! بفيديو Road trip شفنا الأولاد حاطين ألعاب وعاملين متل House party وهالقصص.

حبيت كيف يوتا استفتح الأغنية وإن هي الأغنية هي اول أغنية نزلها تيزر هي لوحدها لتخبرنا انو ناطرنا كتير من اللي مش متعودين عليه بهي العودة .

التوزيع والايقاع بهي الأغنية كتير حلوين ومع إنها ما فيها كتير كسر قواعد موسيقية وخروج عن المألوف متل عادة NCT بس كان ولابد من شي حركة يستثمروا فيها اختلافات وتنوع أصواتهم هالمرة كمان بس بالاتجاه المعاكس! هالمرة لعبوا على تنافر الأصوات أكتر من الهارموني، مثلا جوني ودويونغ أصواتهم ما بتندمج أبدا بسهولة بل على العكس بتتنافر، بس استخدموا هالتنافر لصالح موضوع الأغنية وعطوهم لاين يأدوه سوا وحطوا عليه إيقاع بيشبه لاين راب تايونغ فصار المقطع راب ميلوديك وعطى تنافر أصواتهم تأثير طفولي مناسب لموضوع الأغنية والايفكت نفسه طلع بيشبه كيف ماسمع الأصوات لما منكون بين الحلم والصحوة وهالشي كتير حبيته بصراحة، خاصة انو دويونغ ما كان عم يأدي كل اللاين جزء وجزء فبتحسوا حالكم شوي عم تسمعوا هالتنافر وشوي عم تطلعوا منه ومن بعدها عم ترجعوله!

11-الأغنية الأخيرة Promise :

هي الأغنية بتختم الStoryline تبع الألبوم بشكل مثالي، كلماتها بتحكي عن شو صار بنهاية هالرحلة عبر الأحلام! NCT بيوعدوا المستمعين يلتقوا فيهم بالواقع ويقضوا وقت سعيد مع بعض. وعم يطلبوا منهم يضلوا معهم مهما صار "So Stay" نفس فكرة البداية بالالبوم Sticker بيقولولنا NCT انهم حابين يضلوا ملتصقين فينا وقريبين منا متل الستيكر بس كمان بنهاية الألبوم بيطلعوا من المستمعين يكونوا هيك معهم لأن بيوعدوهم ما يتخلوا عنهم.

الأغنية بوب ومرحة وحيوية وفيها لمسة احتفالية شوي، مناسبة لخاتمة الألبوم. حبيت صوت الغيتار الكهربائي فيها كتير.

حبيت افتتاحية تايل للأغنية وكمان الكل دون استثناء كانوا نجوم فيها!

هي كان كلشي بيخص ألبوم Sticker، لو وصلتوا لهون بالقراءة بهديكم قلبي🥰💖

شو اغنيتكم المفضلة بالألبوم؟ وشو أكتر شي حبيته بالألبوم؟ شاركوني بالتعليقات.

اذا عندكم أسئلة أو اقتراحات ارسلوها الي .

كل الحب🦋

Lama🦋