الكاسب الأكبر - لي سومان الأذكى في لعبة SM/Hype

أذكى واحد بكل هي اللعبة هو سومان!! سومان هالرجل داهية وكتار منكم كانوا متوقعين إنه مستحيل يعمل شي عشوائي، وشكله فعلا هيك.

صرلي من امبارح حابة اكتب مقال مفصل حول الموضوع كوني عم تابع مجريات القصة باهتمام شديد واليوم لقدرت.

شيلكم عن إنه رمى ورا ضهره الوكالة اللي أسسها وما سأل عن الفنانين وراح، وشيلكم حتى عن مومنتاته اللطيفة مع الفنانين وخلينا نناقش شو عمل سومان بالضبط بموضوعية.

سومان بحركة واحدة انتقم من كريس لي وطلع كاكاو داخلياً برا وخلاهم يعيدوا كلشي عملوه ليوصلوا للSM من أول وجديد، وبنفس الوقت ضحك على هايب! اي نعم ضحك على هايب، وإذا بالبداية الصفقة كانت مبينة الكم إنه هايب حاطة فيها شروط تعسفية بحب قلكم طولوا بالكم لأن كلشي صار بعد كشف شروط هايب وتفاصيل عقد استحواذهم بعدها بيدل فعلا إن هايب مضحوك عليهم بل حتى سومان راسم من خلال هي الصفقة خطة الموت البطيء لهايب للعشر سنوات القادمة.

طبقا للمقالات والعقود:

-هايب أصرت إصرار شديد من سومان على انهم ياخذوا حقوق وصلاحيات إدارية منه على الSM، سومان برأيكم قلهم تكرموا يا عيوني؟ لا طبعا.. قلهم بيصير (مع ابتسامة بزنس خبيثة) بس كلشي لحال، الأسهم سعرها كذا...وحقوق الإدارة سعرها 70 بليون وون يعني 53.3 مليون دولار + تمويل سنوي بقيمة 7.5-10.5 مليون دولار لحملتي لغرس الأشجار لمدة عشر سنوات هالشي بيفسر ليش هايب اخدت قروض. وهايب وافقت!🙂 (متخيلين الدهاوة والذكاء؟؟؟ خلى هايب تدفعله زيادة على حقوق الإدارة اللي هو أصلا ما بقا عنده اياها من لما الSM أقالوه من منصبه العام الماضي يعني هايب حرفيا بتشتري بالهوا، وما بعرف قبل ما يوافقوا على هيك عرض أو يطلبوا هيك طلب وين كانوا أصلا وليش ما سمعوا اخبار اقالة سومان من منصبه الاداري، ومش بس هيك، سومان طلب منهم مساهمة سنوية لتمويل حملة غرس الأشجار تبعه، يعني هايب ملزمة سنوياً تساهم لسومان بالأموال وإذا منرجع لشائعات التهرب الضريبي تبع سومان منلاقي إنه هي الحركة خبيثة وذكية جدا لتلميع صورته وغسيل الأموال بنفس الوقت في حال كان فعلا التهرب الضريبي صحيح، يعني صح بعدوه عن الانتاج والوكالة لتلت سنوات بس الزمهم بالدفع اله لعشر سنوات وهو عارف وحاسب ان الصفقة اكبر من هايب وانهم already اخذوا قروض ليستوفوا هالشرطين وانهم ولا ممكن يعوضوا اللي خسروه بهي الصفقة خلال الثلاث السنوات القادمة هذا اذا نجحوا بالاستحواذ أصلا!! وملزمين لعشر سنوات يدفعوله بالملايين يعني من الاخر هايب بهي الصفقة حفرت قبرها بنفسها ولا أظن خلال العشر سنوات القادمة تطلع منها غير منهارة مادياً ومديونة بشكل كبير!! هاد غير انهم ساعدوا سومان يغسل أمواله من التهرب الضريبي على حسابهم بمبالغ بتطلع قد ميزانية فرقة عندهم ولعشر سنوات القادمة، هايب أخذت خطوة كتير طائشة وغير محسوبة هون دخلتهم بصراع مع الSM نفسها رح نشوف تفاصيله لاحقا بالمقال، إضافة لأن كتير مثير للاستغراب ثقتهم بإنهم قادرين مش بس يستحوذوا لا كمان رح يرجعوا اللي خسروه خلال الثلاث سنوات القادمة لهيك حطوا ضمن شروطهم إبعاد سومان عن الساحة خلالهم من دون الأخد بعين الاعتبار المنافس الهم على الأسهم كاكاو، وكل الأموال اللي دفعوها لسومان already والقروض اللي اخذوها وكمان انو عقود معظم فنانين الSM بتخلص السنة او السنة الجاي بقا خسارة شو اللي رح تعوضوها ما بعرف بصراحة! يا أما هايب أكلها الغرور يا أما هم فعلا طايشين وأغبياء!!).

-سومان باع أسهمه لهايب ولكن أسهمه من الشركات الفرعية اللي تحت SM واللي هي شركات مسؤولة عن تنظيم الحفلات واللقاءات وSM الوكالة نفسها هيي صاحب الحصص الأكبر بكل من الشركتين، وهي مرة تانية بتدل على سذاجة هايب لأنهم ما انتبهوا لأن الأسهم اللي اشتروها موزعة أصلا على شركات فرعية وليست داخل الSM نفسها، هايب من الآخر اكلت مقلب كبير بسبب الاستعجال والطمع وقلة البحث والعشوائية بالشغل من دون استشارة الخبراء. كان فكرهم الأسهم ضمن الوكالة وهالشي بيضمنلهم حقوق إدارية ولكن طلعوا ناسيين انو سومان من زمان بيبيع بأسهمه والأسهم اللي ضلتله بالوكالة نفسها قليلة وما باعها لهايب وإنما باعهم الحصة الأكبر اللي مقسومة بشركتين فرعيات تحت SM ولكن ما الهم شغل لا بإنتاج الموسيقا ولا بالإدارة المباشرة للوكالة + وكالة SM نفسها هيي صاحبة الحصص الأكبر بكل من الشركتين + الفرعين هدول تقريباً كانوا أفرع خاسرة يعني هايب رح تضطر تستثمر فيهم لسا اكتر من اللي دفعته كسعر لحتى تحولهم لشي رابح. حصة هايب من كل واحدة من الأفرع حوالي 20- 24% اللي هم نفسهم بالمناسبة بيشكلوا ال14.8% اللي اشتروها هايب من سومان بينما ال 75-80% الباقيين هم حصة الSM + حصص هنا وهناك بأسماء أقارب وأفراد عائلة سومان اللي بيقدروا بسهولة يرجعوا يبيعوه اياها ويرجع للشركة ويقلهم فاجأتكم ما هيك؟

يعني بهي الحالة هايب ما بتمون حتى على إستلام إدارة واحدة من هالشركتين الفرعيات أصلا لتستلم إدارة الوكالة كلها حتى ولو كانت صاحب أكبر نسبة أسهم لكن المهم وين هي الأسهم، يعني سومان عمل مع هايب متل لما بتعطي النقود الفراطة (الفكة) لأخوك الصغير وبتاخد العملة الورقية الك وبتقول لأخوك شوف انت معاك مال اكثر مني!!

-هايب دخلت الSM مقوية ظهرها بسومان ومن اليوم الأول كشفت كل أوراقها بعشوائية وبدون احترافية واستخدمت اسلوب الفرض والنفخ الاعلامي اللي معروفة فيه وحتى وصلت فيها لتقول نحنا بمارس رح نعمل تصويت لاختيار مجلس الإدارة وهدول مرشحيننا من هايب، هالشي كان مرفوض تماما من عند الSM موظفين وإدارة ومنتجين وشفنا الفيديوهات والمقالات اللي نزلت ومتأكدة الوكالة قامت كلها فوق راس كريس لي وبهدلوه بصفته هو السبب ولذلك طلع بفيديو وقدم استقالته من الادارة مع الرغبة بالاستمرار كمنتج فيها (سومان شربه من نفس الكاس تماما)، وشفنا كيف الSM ما سكتولهم لهايب وقالولهم بما معناه ان انتوا شو هي صلاحياتكم لتدخلوا بهالشكل ومين عطاكم اياها أصلا؟ هايب قالت وقعنا مع سومان كذا وكذا، الSM ردت هالرجل صلاحياته الإدارية منتهية من زمان، وهون ابتدت أشياء من ورا الكواليس أدت لإفلاس الطرفين واللي هيي الصراع على الادارة، هايب قانونيا بدها تاخد الإدارة لأنهم صاحبين أكبر حصة في الوكالة وSM قانونيا بدها تثبت عدم شرعية هالطلب، والاتنين دفعوا فلوس كتيرة للمؤسسات الحكومية ليصير هالشي وانتهى الموضوع بفوز SM مش بس هيك! الSM حطت شروط تقييدية على هايب تمنعها من بيع اسهمها بالSM الا بالسعر اللي بتقرره وبتوافق عليه ادارة الSM هالشي رح يضر هايب ماليا جدا ويحولها هالصفقة من صفقة العمر لتعويض خسارة تجنيد BTS وTXT لصفقة خاسرة بكل امتياز، لكن الطرفين حطوا مليارات على هي القضية اللي لسا ما انكشفت تفاصيلها، وهالشي خلى هايب أصلا الطرف الخاسر بهالاستحواذ وخلاها تلجأ للقروض وللتلاعب الاعلامي وتقلد SM بتنزيل الفيديوهات على أمل إنها تجذب أنظار المشاركين ليساعدوها وهالشي ما تم استقباله بشكل لطيف من الشارع الكوري على الإطلاق نظرا لاستخدام هايب تشابيه الها علاقة بفترة الاحت.لال الياباني لكوريا وتنزيل الفيديوهات بعد يوم واحد من الاحتفالات الوطنية بذكرى الاستقلال مما أدى لانتقاد شديد الهم من الكوريين (شايفين العشوائية بالشغل؟).

-بنفس الوقت SM صرفت كتير أموال لترجع حقوق الإدارة ومخططها السنة فيه عدد قليل من العودات مقارنة بعدد الحفلات ولقاءات المعجبين وهالشي مقلق لأن يبدو الوكالة ما عندها الميزانية الكافية لتنتج لفرقها، كمان معظم فنانين الSM بتنتهي عقودهم السنة أو السنة القادمة والوكالات ابتدت فعلا تتواصل معاهم، كمان البعض منهم already بلشوا يشوفوا عروض غير وكالات لأن مستقبلهم مع الوكالة غير مضمون سواء بوجود هايب أو كاكاو وحتى لو أي من الطرفين ما استحوذوا الوكالة لوحدها عم تنهار ماليا وما عندها ما يكفي لتنتجلهم وبالمستقبل لتدفعلهم حتى.

-منجي لكاكاو: سومان كسب اليوم الدعوى القضائية اللي رفعها ضد كريس لي وSM بسبب إدخالهم لكاكاو الصفقة بشكل غير قانوني، وللي ما بيعرف كيف كاكاو دخلت فجأة وليش سومان رفع دعوى على الSM ضد دخولهم، رح نشرحلكم اللي صار، كريس لي اقترح على SM إنشاء أسهم إضافية لتشتريها كاكاو هيك صارت حصة كاكاو 9% بس هي ال9% هيي أسهم غير موجودة مسبقاً واشترتها كاكاو بل أسهم جديدة تم إنشائها حديثا لتشتريها كاكاو، وهالشي تم بدون موافقة واستشارة باقي الشركاء المساهمين واللي هو ضد القانون التجاري الكوري، رح نشرحلكم شو اللي عملته SM لتدخل كاكاو بشكل غير قانوني وأدى لغضب الشركاء المساهمين ورفع سومان دعوى قضائية عليهم، لنفترض الشركة هيي كعكة وعنا عدد X من الضيوف كل ضيف اله حصة من هالكعكة وبيحقله يبيعها أو يعمل فيها اللي يريده، وفجأة دخل ضيف دخيل (كاكاو) قرر ياخد حصة ولكن ما لقى مين يبيعه، راح الخباز (إدارة الSM) قرر يقطع الكعكة لقطع أصغر هيك بيكثر عددها وبيقدر الضيف الجديد يشتري قطع كعك منها بس اللي صار هون إن باقي الزبائن صغرت قطعهم! تماما!! هاد اللي عملته SM خلقت أسهم جديدة لتشتريها كاكاو بدون استشارة الشركاء المساهمين وهيك صغرت حصصهم بالشركة لكل 1% بيمتلكوها صارت 0.96% وهالشي أدى لأن سومان يقاضيهم ويكسب بالنهاية، وبكل الأحوال حتى لو سومان ما قاضاهم كانوا رح يتقاضوا من باقي المساهمين. وهالشي اللي صار بيخلي كاكاو-داخليا- برا، لكن هل بيعني إن هايب كسبت؟ لا طبعا، كاكاو بتقدر لسا تشتري الأسهم خارجيا لأن طبقا لقرار المحكمة طلعت داخليا من الصفقة ولكن لسا بتقدر تقدم عروض خارجية لأصحاب الأسهم بس هالشي ما بيعطيها صلاحيات إدارية مهمة الا اذا اشترت نسبة كبيرة من الأسهم واللي هو شي مش صعب على كاكاو من الناحية المالية، لكن نظرا للمنافسة الشديدة على استحواذ الSM من طرفي كاكاو وهايب، أسعار أسهم الSM بارتفاع، هالشي ممكن يقوي أصحاب الأسهم ويكبر رأسهم ويخليهم ما يقبلوا أي عرض، ونحنا already منعرف هايب ما عندها قدرة تدفع أسعار باقي الأسهم وهي هيك فكيف لو ارتفعت؟ + التزاماتها على فرقها وعلى سومان لعشر سنوات هايب ممكن تنهار ماليا لو ما حسبت خطواتها وتراجعت لأن إذا ما دفعت لسومان لعشر سنوات لقدام، سومان قادر بسهولة يقاضيهم لأنهم وقعوا معاه بموافقتهم! كمان لازم ما ننسى إن بيع الأسهم بيتوقف كمان على موافقة أصحاب الأسهم بالدرجة الأولى ولحد الآن ما سمعنا شي من الأخيرين.

#إضافات على الهامش:

بعض القراء سألوا إن ليش سومان عمل كل هاد ما هو كان أصلا قادر يطرد كريس لي ويخلص من كل هالقصة بدون إدخال هايب؟

الجواب: في backstory للموضوع ضروري تعرفوها هون:

سومان ما كان بيقدر يطرد كريس لي لما صارت الصفقة لأن ما كان عنده صلاحيات إدارية بالوكالة أساسا، هو سومان غلط لما حط كريس لي بمنصب إداري وعطاه صلاحيات كتيرة، وكريس لي طماع ومفكر نفسه ذكي وقادر ينقلب على عمه ويطلعه برا، كريس لي تحالف مع كاكاو وقوى ظهره فيهم وادخل كاكاو للصفقة بشكل غير قانوني لذلك سومان رفع دعوة على الSM وعلى كريس لي واليوم طلع الحكم وكسب لي سومان + لي سومان عنده مشاكل مع الإدارة من قبل والSM كان فيها مشاكل إدارية أساسا استغلها كريس لي مع تهم التهرب الضريبي على سومان اللي لحد الآن غير مثبتة مع استغلال كريس لي صلاحياته الادارية ليقيل سومان من منصبه الإداري بدون علمه، وليكسب تأييد الشركة بهالقرار صرف زيادات لكل الموظفين ما عدا موظفين مكتب سومان، لاحقا سومان قدم استقالته فعلا من منصبه الاداري وكل هذا حصل قبل وقت طويل من صفقة الاستحواذ لهيك فعلا هايب اشترت حقوق الإدارة بالهوا من سومان متل اللي اشترى شي غير موجود والمشكلة بما انهم هم اللي طلبوا هالشي بأنفسهم بموجب العقد اللي هم كتبوه ما فيهم يقاضوا سومان لأن القانون لا يحمي المغفلين.

سومان وقت ابتدت الصفقة كلها كان مستقيل من الإدارة قسرياً يعني ما بيقدر يطرد حدا.

من الآخر سومان وقع الطرفين هايب وكريس لي بحركة واحدة وأثبت انه داهية من سابع ارض والكاسب الاكبر من كل هالقصة هو سومان بينما كريس لي وهايب رح يغرقوا وكاكاو ما منعرف بعد فوز سومان بالمحكمة شو ممكن تعمل، بتقدر تشتري أسهم خارجياً لكن لازم نتذكر ان موضوع بيع الأسهم بيتوقف على موافقة أصحاب الأسهم على البيع أيضا، بالإضافة لأن نظراً للتنافس الشديد على استحواذ الSM من طرفي كاكاو وهايب، أسعار أسهم الSM بارتفاع وهالشي ممكن يقوي كتير أصحاب الأسهم ويخليهم متمسكين فيها.

ما منقول غير إن شاء الله يطلعوا الفنانين من هي الفوضى على خير.

أنا بصراحة محضرة البوشار ومتحمسة شوف شو رح يصير بعدين لأن اللي حاسب لكل هاد أكيد حاسب لبعدين، شو بتتوقعوا لسا مخبي سومان؟ وشو ممكن يصير بعدين عالوكالة وعلى الفنانين؟ شاركونا بالتعليقات!

أخيرا بتمنى لو حبيتوا تشاركوا المقال ما تنسخوا الكلام وتشاركوا من رابط المقال نفسه بالمدونة 🙏💖