عن كلمات أغنية كيم جينهو Firecrackers and Stars:

مقال من طلب Arthur Morgan@ على غروب كيبوب مكس، شكراً كتير للإقتراح.

الأغنية بتلاقوا فيها ترجمة الكلمات بس تفعلوا الSubtitles على يوتيوب. رابط الأغنية هنا.

دورة حياة النجوم أقل إثارة ومتعة ودهشة من دورة حياة الألعاب النارية، مع إن الألعاب النارية بريقها بيسطع للحظات، بينما النجوم بتسطع بشكل أبدي ومع هيك الناس بتلاحظ بريق الألعاب النارية اللي تفجر شعاعها للحظات وما بتلاحظ جمال بريق النجوم مع إنه موجود من زمان وكل يوم وللأبد! بهي التركيبة وهذا المفهوم كيم جينهو حب يترجم دورة حياة الفنان وعمله الفني اللي بتكون مثيرة ومدهشة وخطرة بنفس الوقت! الأغنية بتحكي وبتختصر مسيرة جينهو مع فرقة SG Wannabe وكمنفرد، وكمان فيها Mirroring لحياة زميله بالفرقة الراحل تشاي دونغ ها Chae Dong-ha.

-بنية الأغنية:

الأغنية مكونة من مقطعين ولازمة وجسر قصير ما قبل اللازمة وجسر خاتمة هو عبارة عن نفس لحن اللازمة بزمن وايقاع ابطئ وتغيير صغير بالتوزيع. الشغل كله عالموسيقا بهالتقسيمات، لأن الأغنية صايرة قصيدة بالاد على ريترو روك شوي وحتى اللازمة وما قبل اللازمة ما بيتشابهوا بالكلمات كتير بين المقطع الأول والثاني، التشابه عم يكون بس بالتقطيع واللحن.

-الموسيقا: الأغنية غنية كتير موسيقياً وفيها استخدام كبير لآلات موسيقية خام، صوت الساكسفون فيها رائع، إضافة للغيتارات ولغيتار الباص ولعدة وتريات أخرى مستخدمة في كمنجات، فيولا، تشيللو وغيرهم. بالإضافة للدرامز. التوزيع كتير حلو، والمغني نفسه جاي من فرقة رباعي فوكالز على مستوى عالي جداً.

-الكلمات: اللي قاريين قبل مقالات الي عن أغاني بيعرفوا الخطة اللي بشرح فيها الكلمات عادة، رح اتبعها نفسها هون، رح يكون شوي طويل بس رح يكون شامل. هي الأغنية رح نقسمها لقسمين أساسيين وقسم أخير ثانوي، كل قسم أساسي رح يتضمن المقطع وما قبل اللازمة تبعه واللازمة لأن هي الأغنية ترتيب كلماتها صاير على نسق قصصي شوي، لهيك ما بينفع قطعها أكتر من هيك.

القسم الأول: بتبدأ الأغنية مع صوت غيتار الباص وكوردات غيتار الأكوستيك مع صوت فيولا بالخلف، الكلمات بتبدأ بسرد قصة الفنان اللي منشوفه بالMV ماشي مع غيتاره بينظر بحيرة للأيادي اللي عم تتمد اله. شبه الفنان نفسه بالألعاب النارية، شي مليان بهجة وألوان وطاقة وفرح، لكن بحاجة للشخص الصح اللي بيعرف يركبها ويطلقها، لهيك بيقول بهالمقطع انتظرت لاقي الشخص الصح اللي رح يعرف يطلقني. وفعلا لقى هاد الشخص "اللي ممكن بيرمز للفرصة، الزمن المناسب، الفرقة، أو أي شي تاني ساعد الفنان لينطلق بمسيرته الفنية" ، وبعد ما انطلق متل الألعاب النارية وصار يلمع بالسماء الناس صارت تهتف وتشجع وتصفق بحماس! ردة الفعل الطبيعية لما نشوف ألعاب نارية! هو حب هالموقع اللي هو فيه وعجبه كتير. طيب ليش اختار هالموقع؟ بيجي هون جسر ما قبل اللازمة وبيقلنا فيه إنه كان مفكر إذا اختار هالطريق رح يوصل للنجوم، رح يكون قريب منها كتف لكتف ورح يقدر يلمسها. لهيك بعد ما سقط عالأرض بعد ما خلص انفجار الألعاب النارية انتظر مرة تانية لحتى حدا يطلقه مرة تانية للسماء. أعتقد كلمات هالمقطع فيها تلميح لزميله الراحل دونغها، للي ما بيعرف دونغها وجينهو كانوا مع عضوين آخرين بفرقة رباعي فوكالز اسمها SG Wannabe وترسموا سنة 2004، هالشي مختلف شوي عن فرق الآيدولز لأن ما بيتضمن الرقص مثلا وغيرها من الأنشطة اللي بيعملوها الآيدولز، الفرقة حققت نجاح كتير كبير وقتها، دونغها كان فعلا مترسم سولو بسنة 2002 مع هيك ترسم بال2004 مع الفرقة ويمكن الفرقة بترمز للشي اللي قادر يطلق الألعاب النارية مرة تانية للسماء! لهيك بهالجزء بيقول بالكلمات إنه بحث عن مين يرجع يطلقه للسماء مرة تانية ورجعوا الناس هتفوا وتحمسوا، الفرقة إذا كانت فرصة دونغها الثانية للسماء! وحتى في فرص ثالثة للسماء إذا بدكم، دونغها رجع ترسم سولو وترك الفرقة بعد عدة سنوات من النجاح، ترسيمه السولو حقق نجاح مهم وروج بعدة دول آسيوية وبسنة 2011 أنهى حياته بأخذ جرعة زايدة من أدوية الإكتئاب والأرق بعد معاناة طويلة مع الاكتئاب. وهون منشوف كيف ذكر جينهو بأغنيته كيف الألعاب النارية تحولت لرماد تناثر عالأرض. قبل ما تحقدوا عالراحل، يبدو إن روح دونغها عاشقة للحرية، وكان عنده توقعات مختلفة شوي عن عالم النجومية ورح نشوف هالشي أكتر بالمقطع الثاني، ومع إنه انطلق عدة مرات لكن ما كان راضي ولا حاسس بالحرية، هالشي بتشوفوه من مقطع اللي بيقول فيه: "أنا مجرد ألعاب نارية تروّض بأيديهم" دليل على كيف الفنان ما بيحصل أوقات على حريته الفنية عند شركات الإنتاج وغيرها. بتميزوا اللازمة من المقطع من ما قبل اللازمة هون بسبب النقلات الموسيقية والتوزيع وتغيير الكوردات.

القسم الثاني: هاد المقطع ممكن ياخد عدة تأويلات، أول تأويل هو إن النجوم بترمز لعالم الفن نفسه، لرغبة الفنان ليعطي الفن على شكل الحب اللانهائي واللامشروط. كمان لقاء الألعاب النارية بالنجوم ممكن ترمز لرحلة دونغها بعد الموت للسماء. بعد ما طلعت الألعاب النارية للسماء والتقت بالنجوم وحققت حلمها وهدفها من الانطلاق نحو السماء اللي حكينا عنه بالقسم الأول، سألت النجوم عن سر بريقها الدائم، وعن إنها بتتمنى تكون بنفس القدرة على الاشعاع للأبد هيك، النجوم ردت بإن الناس ما بتلاحظ النجوم ولا بريقها إلا لما يكونوا وحيدين أو يائسين مع إن النجوم دائما بالسماء، الناس بتلتفت للألعاب النارية كل ما انطلقت! الإنسان فعلا بيتونس بالأعمال الفنية بوحدته وحزنه، ومش أي أعمال فنية! غالبا بيختار الأشياء ذات الجودة العالية، اللي بترتبط بالحب الغير مشروط واللانهائي! يمكن النجوم بترمز لعالم الفن اللي دونغها وجينهو كانوا حابين يكونوا جزء منه والألعاب النارية بترمز لمسيرتهم كفنانين. يمكن النجوم بترمز لمثال أعلى كانوا شايفينه بالفن أو حتى لهدف معين ولما وصلوا لعنده خاب أملهم لأن ما كان بالسعادة اللي متخيلينها، لأن بيرجع بيذكر باللازمة هون إنه :" نزلت الألعاب النارية عالأرض وتناثرت كرماد، الناس لما شافت سقوطها قالوا إنها خلصت!" هالشي بيرجعنا لأيام معاناة دونغها مع الاكتئاب لما مدير أعماله والشركة والكل بيعرف إنه عم ينطفي متل شمعة، متل ألعاب نارية تفجرت لأقصى مستوى، ومع هيك بأيامه الأخيرة كان بيروج باليابان وادعى إنه ضيع أدويته ليحصل على أدوية اكتئاب إضافية من طبيبه.

القسم الأخير: هاد الجسر الخاتم لحنه نفس لحن اللازمة بس أبطئ وتوزيع مختلف، بيقول فيه إنه النجوم رج تضل تضوي السما والألعاب النارية رمادها رح يندمج بالتربة ويضوي الأرض، نحنا المعلقين بين السماء والأرض وأنا "على لسان الألعاب النارية" أنا بنظر للجهة المقابلة، للجهة اللي لازم انظر عليها، للسماء. المثير بالأغنية إنه مستخدم صيغة المتكلم ليحكي على لسان الألعاب النارية، لحتى ياخدنا بمسيرته المهنية ويذكرنا بمسيرة زميله الراحل. بنصحكم تسمعوا أغاني SG Wannabe وتطلعوا على مسيرتهم وعلى مسيرة الراحل دونغها المثيرة والقصيرة والمدهشة بنفس الوقت لما ترسم مع الجيل الأول منفرد سنة 2002 وترسم مع الجيل الثاني مع فرقته سنة 2004 ورجع ترسم منفرد سنة 2008 ليغادرنا بسنة 2011. الجدير بالذكر إن جميع أعضاء SG Wannabe حاليا منفردين، علما إن الفرقة ما زالت موجودة لكن أنشطتها متوقفة من سنة 2015 على ما اعتقد (صححولي إذا غلطانة).

هاد كان كلشي بهالمقال، إذا عندكم أسئلة أو اقتراحات تركوها بالتعليقات. اي وصوتولي لأحسن كاتب على غروب كيبوب مكس منشان حلل صوت الآيدول المفضل عندكم 😁💖

جميع الحقوق محفوظة لمدونتي الخاصة.

Lama 🦋

#KpopMixAwards2021