NCT/ يوتا- تحليل صوت

نعم أنا كنت مشغولة كتير لفترة طويلة ولسا فعلا مشغولة بس ما بعرف امبارح كنت بدردش مع صديقة بتحب يوتا كتير وكانت بتحكيلي عن تحضيراتهم لعيد ميلاده وشي جواتي قلي لازم شارك! الحب اللي عندها اياه ليوتا بيخلي شي بقلبي يدفى ويفرح وانا كمان بحب هالصديقة كتير، كمان اشتقت اكتب تحليل صوت بصراحة وصرلي كم يوم عايشة بألبومات NCT127 لهيك كله اجى لصالح يوتا🤷‍♀️.

لهيك عيد ميلاد سعيد يوتا! 💖واعذرني هاد المقال مهدى لصديقتي أميرة اللي بتحبك كتير قبل ما يكون مهدى الك "لا تزعل بعرف انها رح تهديك اياه وقلبها سوا" 😁

يوتا موجود مع NCT بكل كبرها، ومع NCT 127 كفوكاليست ورابر موقعه أوقات بيكون جيد وأوقات ثانوي ومع NCT U بيتغير موقعه كتير.

متل ما منعرف وجود أي حدا بفريق كبير متل NCT بيعطي الفرصة ليجرب ويغير موقعه كتير , يوتا من الناس اللي صاير موقعهم بيتغير كتير حتى مع الوحدة الثابتة اللي هو فيها.

أنا متحمسة لحلل صوت يوتا لأنه فوكاليست جدا underrated حتى عند الSM, لذلك خلونا نبدأ:

نوع الصوت: تينور بس بتموضع متوسط لمنخفض بيخلي بصوته عرض وكبر حلوين متل عند أصوات الباريتون بس بنفس الوقت قدرة على الطلوع بسهولة وطابع لين ورفع بالصوت متل أي صوت تينور.

مساحة الصوت: بصراحة لأن يوتا ما بياخد كتير لاينز وما في تنويع بنوعية اللاينز اللي بياخدها هالشي عذبني شوي لحتى قدر مساحة صوته، رح قدرها بحوالي أوكتافين ونصف أو أقل بشوي، بس الشي الأكيد لا تقل عن أوكتافين ومعظم المغنيين الجيدين مساحة أصواتهم بهالحدود.

تصنيف الصوت: صوت ذو تموضع متوسط لمنخفض، صوت إذاعي، صوت مسرحي، أصوات تجارية. بهيك تصنيفات يوتا بيقدر يكون مغني بوب جيد ويغني أي موسيقا حديثة وبالتمرين ممكن يغني شي مسرحي أو كلاسيكي، إحساسه العالي وقت الأداء جدا بيساعد، يوتا كمان صوته مناسب جدا للراب والإذاعة والالقاء والمسرح خاصة كإلقاء مسرحي وصوته مناسب للدوبلاج كمان.

المرونة والألوان الغنائية: بداية وبعيداً شوي عن يوتا خلينا نتفق على إن وجود أي حدا بفريق كبير متل NCT فيه تنوع صوتي رهيب بيفتح على أي حدا بابين: إما تجربة كتير أنواع موسيقى وألوان غنائية ومفاهيم جديدة وعرض العضلات بالمرونة اللي عنا أو بس التسلية والمغامرة بهيك شي "في أمثلة عهيك عالم بNCT لو بتحبوا ممكن اكتب عن الموضوع"، أو انو نلعبها Safe شوي ونضل ضمن اللون اللي بيلبقلنا. لسا ما عندي كتير فكرة عن لأي درجة الSM عاطية حرية انتاجية وفنية لNCT بموسيقتهم بس اللي فهمته لحد الآن إنها عاطيتهم مساحة مقبولة وأحياناً كبيرة كتير للإبداع بأغانيهم بأنفسهم.

منرجع ليوتا، يوتا بقى من الفريق الأول، اللي بيجرب أنواع موسيقا كتير وبيغامر وبيحاول! الولد بيحب يغني جدا لدرجة إنه بسبب حبه لTVXQ تخلى عن حلمه بإنه يكون لاعب فوتبول لحتى يصير مغني.

مرونة يوتا الغنائية عالية ولافتة، ومعظمها مصدره العمل الجاد، طبعا من دون تجاهل إن يوتا عنده بنية صوتية جدا بتساعد وللي مستعد لمفاجأة من العيار الثقيل شوي، يوتا عنده بنية صوتية وخامة جدا قريبة من اللي عند تايل بس تكنيك مختلف واضعف من تايل واستخدامه لصوته مش بنفس جودة وقوة استخدام تايل لصوته لهيك يوتا مش بنفس موقع تايل بالفرقة، بس لا تنسوا تايل من اصحاب المرونة الغنائية العالية جدا بNCT (تحليل صوت تايل متوفر اضغطوا هنا وبتروحوا عليه) لهيك تشابه بنية أصواتهم بيفتح نفس الباب على يوتا بدون أدنى شك، من دون ما ننسى إنه يوتا جريء وبيحب يجرب كتير، لكن نظرا للفرق بالتكنيك رح قول مرونة يوتا محدودة شوي مقارنة بتايل لكن هالشي ما بينفي أبدا إنها عالية وبالتمرين قابلة للتطور.

من عندي بقول يوتا صوته وطريقة أداؤه مناسبة جدا للموسيقا الحديثة، للبوب والروك والهيب هوب الحديث بشكل خاص وبصوته في ايفيكت حلو كتير وتلوينة جدا حلوة بيزيدها مع احساسه بالأداء بتخلي صوته بيلبق لموسيقى الهاوس وللTrap والتكنو.

وجوده مع NCT هو المكان الصحيح اله بفرقة بتعتمد على الموسيقا الحديثة والتكنولوجيا.

كمان رح ضيف شي، يوتا صوته كتير كبير وfull لتينور وبيغني بإحساس عالي وبيلون كتير بالtone وهالشي بيرشحه ليكون مغني بالاد جيد جدا.

ميزات الخامة الصوتية: صوت يوتا فيه ليونة ودافي بس قادر يكون دارك ومشرق بنفس الوقت.

صوته بشكل طبيعي منسق وهالنوع من الأصوات ما بيعذب كتير بالاستديو، بحب إن صوته كبير كتير وfull والجزء الأوسط للمنخفض منه كتير جيد وبألبوم sticker فرجانا تطور كبير بالجزء الأعلى من صوته.

حتى أصغر لاين بيقدر يوتا يعطيه حجم لأن صوته نفسه كبير.

صوته إذاعي ورخم جدا وقت يحكي وكمان قادر يعطي لصوته كاراكتر وقت بده لهيك ما رح اتفاجئ اذا اكتشفت انو بيقلد أصوات شي يوم.

في بصوته حدة خفيفة بس حدة رجولية جدا، يعني ما بتخلي صوته رفيع بقدر ما بتخليه أوقات كهربائي وجارح شوي وهالشي بيناسب الموسيقا الحديثة والروك كمان. هي الحدة والجرحة ما فيكم تشوفوها كتير بلايناته مع NCT بس فيكم تسمعوها بوضوح بصوت ضحكة يوتا.

صوت يوتا قوي وصحي وعنده Tone جدا مسرة ومريحة للسمع سواء كان عم يغني أو عم يحكي.

كمان صوته بيندمج بشكل جيد وهالشي سبب بإنه بينحط صوته lead عبعض المقاطع الجماعية أحيانا، بتلاقوه عم يغني مع حدا تاني احيانا، وكمان بينعطى مقاطع انتقالية أكتر منها أساسية.

ميزات التكنيك ونقاط قوة يوتا كمغني: يوتا حقق تطور بالتكنيك كتير كبير كان ظاهر الفرق بآخر ألبوم جدا، حللت ألبوم ستيكر بالمناسبة وحكيت شوي عن تطور يوتا الصوتي فيه الرابط هنا.

أول نقطة قوة لصالح يوتا هي الrange الجيد بصوته ولو إنه ما ببستخدمه كله منيح، لكن الجزء المنخفض والوسط من صوته كتير جيدين وبالرغم من إنه صوته ذو تموضع متوسط لمنخفض بس اغلب لايناته بالأوكتاف الرابع والتالت وهو متمرن منيح ليغني بهالمنطقة بشكل مرتاح جدا.

كرياضي سابق وأحد الدانس لاين هالشي بينعكس على قوة النفس اللي عنده وتحكمه فيه وهالشي واضح عنده تحكم بالنفس جيد جدا وهو أحد أفضل أعضاء NCT بهالتكنيك "حتى أفضل من بعض الmain vocalists بالفرقة وما عم بالغ ولا تطلبوا مني سمي بس حلل أصواتهم بذكرها كنقطة ضعف😁".

يوتا عنده ثبات صوت جيد جدا وأذنه موسيقية وبيتبع الميلودي والايقاع بشكل جيد وعنده projection كتير جيد وon point وبيعرف يوزع النفس منيح ويستخدمه لهيك منحب صوته اللايف كتير لأن ما بيخيب أملنا أبدا وما بيفرق عن التسجيل كتير.

أغلب الprojection تبع صوت يوتا صاير من صوت الصدر وهالشي مفهوم لأن عارف نقاط قوته وهاد سبب ليش صوته بيطلع full وكبير كتير.

يوتا بصوته فيه باور وبيستخدمه بشكل جيد وقت يلزم.

يوتا بيلون كتير وبيحلي بصوته وهالشي بتشوفوه بس ياخد نفس اللاين بالأغنية مثلا اسمعوه ب focus وحتى ب favourite استخدم هالشي وبSave وغيرها.

صوت الرأس عند يوتا قيد التطوير لكنه جيد وتحسن بشكل كبير وما بنكرلكم انو لسا عنده potential ليتحسن كمان وكمان، اسمعوه بbreakfast مثلا.

كمان كتير آخر ألبوم فرجانا تطور بالmixed voice وبالbelting عنده لهيك ترفعله القبعة انا متأكدة بعد sticker ما في رجعة ورح تسمعوا صوت يوتا أكتر بالأغاني.

يوتا كمان صوته منسق بشكل طبيعي، وعنده هارموني جيد "تعلم هالشي من حبه لTVXQ" وأذن موسيقية جيدة لهيك صوته بيندمج بسهولة وييسر وبيعطوه لاينات مع الآخرين أكتر من لاينات لوحده.

كمان نقطة مهمة ولو ان ما دخلها كتير بالتكنيك بس تعتبر نقطة قوة، يوتا بيغني بإحساس كتير عالي ومن قلبه ولما بيكون مستمتع بالأداء سهل تلاحظوا هالشي وانا بحب هالشغلة فيه.

نقاط ضعف ونقاط يمكن تحسينها: لسا يوتا لازم يطور الجزء الأعلى من صوته لحتى يقدر يستفيد من صوته كتينور متل باقي أصوات التينور بالفرقة.

بالرغم من التطور الهائل والفرق الكبير اللي حققه بآخر ألبوم لكن لسا يوتا لازم يشتغل شوي أكتر عالmixed voice ليصير بنفس مستوى الفوكال لاين بالفرقة.

يوتا بالسابق كان يدمج بس من صوت الصدر وهالشي بيضر عالمدى الطويل والحمدلله تخلص منه، باقي بس يتمكن أكتر من التكنيك اللي تعلمه.

كمان يوتا كان أحيانا ما بيكمل المكس المفتوح وصوته بيعلق بأنفه وهالشي صار بkick it مثلا بس نظرا لعرض صوته وتموضعه المنخفض شوي لتينور هالشي أنقذ الموقف وما سمعنا أي nasality بصوته بس لو صوته رفيع لكانت صارت هالمشكلة.

ما سمعناها بالألبوم الأخير بس خلال لقطات التسجيل صارت أحيانا لهيك كمان لازم يشتغل على هي.

عدا عن هيك يوتا عنده صوت جميل جدا وهو مغني جيد جدا بأذن موسيقية وتحكم وتوزيع نفس جيد وثبات صوت عالي وكل هاد بيخليه مغني جيد على العموم.

بفرقة مختلفة، هل ممكن يتغير موقع يوتا؟ اللي بيقرأ تحليلات الصوت اللي بكتبها غالبا بيعرف هالفقرة لكن فقط مع NCT رح اتجاوز هالفقرة، لأن منرجع ومنقول وجود أي حدا بNCT بيعطيه الفرصة يغير موقعه حسب الأغنية والفرقة الفرعية والمفهوم اللي عم يشتغلوا عليه. لكن نظرا لأن يوتا موقعه بتغير حتى بالوحدة اللي ثابت فيها،ولأن موقعه صاير مع وحدته الثابتة أقرب للفوكاليست الثانوي وهو عنده potential أعلى من هيك، رح احكي عنه وما رح اتجاوز هالفقرة.

بفرقة تانية ووكالة تانية يوتا بيكون بسهولة lead vocalist، يوتا كمان بيقدر يشيل سولو مناسب اله وبتوقع يكون lead vocalist بالوحدة اليابانية بس تفتح.

أسئلة شائعة: ليش لاينز يوتا وتايل بيتبعوا بعض غالبا؟ وليش يوتا أغلب لايناته انتقالية أو بالاشتراك مع حدا تاني؟ الإجابة على السؤال الأول هي التالي: نظرا لتشابه البنية الصوتية للإثنين فهالشي رح يخلق راحة للسمع وراحة للمنتج بالشغل كمان.

أما السؤال الثاني فعدا عن التمييز اللي بتعمله الSM مع الايدولز الأجانب، يوتا واضح من هالتحليل انو هو صاير الجسر الواصل بقلب وحدة 127 بين الفوكال لاين والراب لاين، كمان تموضع صوته وتكنيكه كله جاي بالوسط ونوعية صوته عم تخلي المنتجين يحطوه بهالموضع كتير.

بتمنى يحسن يطلع الكاراكتر اللي بصوته أكتر بالمستقبل ليستفيد من لاينز أكتر.

لو يوتا غاب لظرف ما، مين أفضل شخص يغني مقاطعه؟ تايل أفضل مرشح على الإطلاق! عنده بنية صوت وخامة قريبة جدا مستحيل الأغنية تفرق ولا شوي!

أداء جدير بالذكر:

أنا بحب صوت يوتا بأغنية Angel بحسه عم يغنيها من كل قلبه، صوت يوتا بBack 2 u كتير جيد، صوت يوتا بresonate كمان اللاين تبعه بيعلق كتير مع انو في غيره غنوا نفس اللاين بس مستحيل لأن يوتا بصوته بيخلي حتى اللاين الثانوي كبير ومثير.

اكيد اكيد breakfast, far, favourite,dreamer،Lemonade, pilot كل هدول صوته فيهم كان تطور كتير كبير وشفناه عم يفتتح أغاني بآخر عودة وعم ياخد جسور أغاني حتى لهيك أنا فخورة فيه كتير.

بأغنية sticker بتشوفوا صوته الرخم المسرحي والاذاعي وكمان بأغنية chain وgimme gimme وsimon says وlips بتسمعوا صوته كيف بيروح بشكل كتير جيد بالموسيقا الحديثة.

كمان بFly away with me وlong slow distance وback 2 u رح تشوفوا وخاصة باللايف توزيع النفس الجيد اللي عنده وثبات صوته واحساسه الحلو.

ب end to start بتسمعه الحدة والجرحة اللي حكيت عنها.

وأكيد From Home وهي الcover اللي عملها لأغنية White لTVXQ أكدوا لأي درجة بيلبقله البلاد!

هاد كان كلشي بيخص صوت يوتا! منتمنى السنة الجاي نحتفل بعيد ميلاد يوتا وهو ليدر الوحدة اليابانية، و بتمنى يكون عجبكم و إذا عندكم أي أسئلة تركولي بالتعليقات.

جميع حقوق هذا التحليل الصوتي محفوظة لمدونتي الخاصة

Lama 🦋