NCT/تايل- تحليل صوت

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد لأعملها. شكرا لتفهمكم

قصة طريفة! تحليل صوت تايل انطلب مني من تلت شهور بالضبط, وكان هو السبب بإني اسمع NCT وحبهم.

وبما إن لقيت الفريق كله مثير للاهتمام عموماً, قررت خبي تحليل صوت تايل ليوم عيد ميلاد صديقتي ديلا اللي طلبته منشان أولاً عايدها بعيد ميلادها على طريقتي عيد ميلاد سعيد ديلا!💖, وثانياً لحتى تختمر شوي تجربتي مع الفرقة ومع صوت تايل ومع موقعه غنائياً ككل.

لهيك إذا طلبتوا مني تحليل صوت لحدا من فرقة أنا ما كتير بسمعلهم أو بعرفهم وتأخرت فيه فأسباب التأخير (غير السبب اللي كلكم بتعرفوه إني كسلانة) بس غالباً بكون ابتديت صير فان للفرقة وحابة اعرفهم أكتر.

تايل مع NCT 127 وبNCT عموماً هو من الفوكاليست الأساسيين بالفرقة, ومن دون أدنى شك من الأقوى كتكنيك.

متل ما منعرف وجود أي حدا بفريق كبير متل NCT بيعطي الفرصة ليجرب ويغير موقعه كتير, لحد الآن غالباً شفناه بموقع فوكاليست أساسي, لكن ما منعرف بالمستقبل والمشاريع المستقبلية شو ممكن يجرب.

أنا متحمسة لحلل صوت تايل لأن في مفاجأة ضمن هالتحليل رح تصحح كتير مفاهيم خاطئة عند الجمهور تجاه شو اللي بيخلي شخص معين مغني جيد أولا, عم جهز مقال موسع عن هالموضوع بالمناسبة, رح يجي قريباً, لكن تايل رح يكون مثال جيد عن أحد الجوانب اللي رح ناقشها بالمقال القادم, لذلك خلونا نبدأ:

نوع الصوت: تينور.

مساحة الصوت: هون المفاجأة, جاهزين للمفاجأة؟ مساحة صوت تايل هي 2 أوكتاف وعلامتين فقط! نعم فقط! وهو main vocalist وفي lead vocalists بفرقته وبغير فرق مساحة أصواتهم أوسع بكتير, حتى في عالم بالراب لاين معاه بنفس الفرقة مساحة أصواتهم أوسع تخيلوا! بمناسبات قليلة حسيته طلع نص علامة أعلى من العادة ونزل نص علامة أوطى من العادة يعني ممكن نقول مساحة صوته قد تكون أوكتافين وثلاث علامات يعني قريب جداً من أوكتافين ونصف, لكن بما إن ما سمعت هالنصف علامة أعلى والنصف علامة أوطى كتير, رح أقول عالأرجح صوته أقرب ليكون أوكتافين وعلامتين, وبالأيام الجيدة اله ممكن بيزيد علامة نصف بالجزء الأعلى من صوته, والنصف الثاني بالجزء الأخفض من صوته, يعني عنده احتمال كبير يوسع مساحة صوته أكتر وأكتر.

طيب هذا بيدل على شو؟ هذا بيدل على إن مساحة الصوت ما الها أي دخل أو علاقة بجودة إمكانيات المغني كمغني وما بتحدد أبداً المغني الجيد من السيء, تذكروا إنه مؤخراً تايل أخذ ترتيب بين أفضل خمس مغنيين ذكور بكوريا للسنة, وعالقائمة معاه كان في عالم مثل كيوهيون من سوبر جونيور اللي مساحة صوته أربعة أوكتاف وهو صاحب أوسع مساحة صوت بين الآيدولز الذكور بكوريا حالياً, كمان تشين من إكسو كان عنفس القائمة اللي مساحة صوته ثلاثة أوكتاف وثلاث علامات يعني تقريباً ثلاثة أوكتاف ونصف (تحليل صوته قادم قريباً), طيب كيف؟ الموضوع أبداً ما دخله بعدد العلامات الموسيقية اللي بيقدر مغني يغنيها. هل هو نقطة قوة تحسب له؟ طبعاً, لكن وجودها وعدمه مش قضية وما بيحدد إذا رح يكون مغني قوي أو لا, رح اتوسع أكثر بالمقال اللي رح احكي فيه عن هالموضوع بخصوص هي النقطة كشرح, لكن مبدئياً خلينا نقول إن الحنجرة هي آلة موسيقية وبتقدر تعزف عدد معين من العلامات, مش مهم كم مفتاح موسيقي بتقدر حنجرتك اللي هي آلتك الموسيقية البيولوجية تعمل, المهم بالموضوع هل إنت بتقدر تعزف؟ المقارنة هي مثل لما بيكون عنا شخصين, واحد منهم موهوب موسيقياً وأذنه موسيقية أو تعلم العزف أو كلاهما, والثاني ما عنده لا الموهبة ولا المعرفة, الأول معاه أورغ صغير أو MIDI Keyboard ب16 مفتاح (اوكتافين), والثاني عنده بيانو كلاسيكي كبير ب88 مفتاح ( 7 أوكتاف), برأيكم مين منهم بيقدر يعزفلكم أغنية كاملة وصحيحة؟ أكيد الأول اللي بيعرف يعزف حتى لو كانت الآلة الموسيقية اللي بإيديه صغيرة ومحدودة! لأن حتى لو بدلت الآلات الموسيقية واعطيته البيانو الكبير رح يعرف يتعامل معاه ورح يعزف عليه صح, ونفس الشي الحنجرة وبالتمرين مساحة الصوت قابلة للتوسيع والشغل عليها, وعنا أمثلة بهالمجال مثل يونهو من TVXQ وتيمين من شايني.

لهيك ضروري نعرف إن عدد الأوكتافات بحنجرة أي حدا ما بيخلي منه مغني جيد بالضرورة إذا ما كان بيعرف يتعامل بحرفية مع كل ربع علامة بهالمساحة الصوتية, ويعرف ينتقل بين العلامات ويمسك النوتة ويحافظ عثبات صوته.

وبالمناسبة تايل مش الوحيد الفوكاليست الأساسي اللي مساحة صوته أقل من تلاتة أوكتاف, الكينغ تايون ما غيرها مساحة صوتها أوكتافين ونصف وعلامة, وفي بSNSD بنات مساحة أصواتهم أوسع بس بالنهاية هي الكينغ تايون الفوكاليست الأساسية للفرقة وإحدى أفضل المغنيات بكوريا!

وللي لسا مفكر إن مساحة الصوت شي كتير مهم بحب قلكم الست أم كلثوم مساحة صوتها أوكتافين عالقد القد 16 علامة تماماً, بس بالنهاية هي الست أم كلثوم, أستاذة بل مدرسة بالغناء الشرقي لليوم بيدرسوا تكنيكها وصوتها بكل أكاديميات الموسيقى بالعالم كمثال عن الغناء العربي. اقتنعتوا؟

تصنيف الصوت: صوت ذو تموضع متوسط لمرتفع, Mid & High range belter يعني مغني بيعمل مكس على الجزء الأوسط والأعلى من صوته, well rounded vocalist, مغني بصوت رأس مرتفع, صوت بPower عالي, صوت مسرحي. بهيك تصنيفات تايل طبعاً مغني متمكن جدا و Main Vocalist طبعاً طبعاً ومن أفضل المغنيين بكوريا بدون أدنى شك. وبيستحق سولو وبيستحق انتباه واهتمام وتقدير أكتر بNCT وبالSM.

المرونة والألوان الغنائية: بداية وبعيداً شوي عن تايل خلينا نتفق على إن وجود أي حدا بفريق كبير متل NCT فيه تنوع صوتي رهيب بيفتح على أي حدا بابين: إما تجربة كتير أنواع موسيقى وألوان غنائية ومفاهيم جديدة وعرض العضلات بالمرونة اللي عنا أو بس التسلية والمغامرة بهيك شي "في أمثلة عهيك عالم بNCT لو بتحبوا ممكن اكتب عن الموضوع"، أو انو نلعبها Safe شوي ونضل ضمن اللون اللي بيلبقلنا. لسا ما عندي كتير فكرة عن لأي درجة الSM عاطية حرية انتاجية وفنية لNCT بموسيقتهم بس اللي فهمته لحد الآن إنها عاطيتهم مساحة مقبولة وأحياناً كبيرة كتير للإبداع بأغانيهم بأنفسهم.

منرجع لتايل، تايل من المغنيين الأعلى مرونة غنائية بNCT, الولد ثقافته الموسيقية واضح عالية جداً, وهو بيفهم الموسيقى وبيحسها وبيعرف منيح يتعامل مع صوته وحنجرته, ب2.2 أوكتاف بس وبيقدر يعمل كل هذا بصوته! خلونا بالأول نشيل NCT 127 وNCT عموماً على جنب لأن صدقوني مع NCT تايل ما عم يفرجيكم ولا حتى عشرة بالمية من اللي بيقدر يعمله بصوته.

لحسن الحظ كتير بيعمل كوفرز وكتير عنده أداءات سولو, لهيك كان في مادة دسمة عالانترنت تعطيني فكرة عن مرونته الغنائية المدهشة للصراحة! الولد متمكن جداً وصوته بيشتغل وين ما بتحطوه. بدكم بوب؟ بيشتغل وبكل أنواع البوب, بدكم روك؟ خامته وتكنيكه بيخلوه من أجمل الأصوات بالروك وحتى متمكن من عمل Metal Belt لهيك عنده الاحتمال يجرب كتير أنواع روك, بدكم هيب هوب؟ بيقدر وشفناه Already مع NCT 127 بعدة أغاني هيب هوب وR&B. حتى بيقدر يغني سينث والكترو وريترو, وصوته بيطلع حلو كتير بالجاز والسول وبالتعاون Purple اللي رح احكي عنه أكتر بالفقرة القادمة, هي أغنية جاز وروعة كانت! بتخيل حتى بينجح بالمسرح الموسيقي بكل أنواعه بسبب احساسه الحلو وحليات صوته الجميلة جداً, كمان بيغني بالاد حلو كتير كتير. وسمعناه عم يعمل راب و Trap بأغاني NCT 127 القديمة. مرونة غنائية عالية و خارقة ومثيرة جداً وتستحق الاحترام والتقدير.

ميزات الخامة الصوتية: صوت تايل كتير دافي وقوي و كبير وتقيل وفيه وزن كتير كبير وباور كتير عالي, عنده خامة جداً جميلة وحنجرته حنجرة مغني بامتياز,

وعنده حليات أو عرب حلوة كتير بصوته وبيعرف منيح كيف يستخدمها ويبرزها بالوقت بالمناسب. ومع إن صوته كتير فيه باور وقوي, بس فيه بحة خفيفة كتير بالكاد بتبين بس ببعض الأغاني بيعرف يظهرها وبتعطي تأثير Smoky على صوته بشكل حلو, كمان بيعرف يستخدم صوته ليعطيه طابع مشرق ببعض الأوقات, هالشي بيدل إن عنا مغني مش بس بيفهم الموسيقى بل بيحس فيها بشكل جميل, وبيعرف يتحكم بحنجرته بطريقة تخليه يوصل إحساس الأغنية بشكل جميل جداً. بيقدر بالجزء الأوسط من صوته وبس يدمج يطلع بصوته تأثير hooty ممكن يخلي قلبكم يدوب من جمالية الإحساس! وعلى الجزء الأعلى من صوته ممكن تسمعوا صوت كهربائي من قوته, اسمعوا الhigh note بGimme gimme. وهو بالرغم من مساحة صوته اللي مش كتير كبيرة وتموضع صوته المتوسط للمرتفع, إلا عنده low register جداً جداً يحترم ومثير للدهشة بشكل! اسمعوه بهالتعاون الحلو بأغنية Purple, اضغطوا على اسمها وبتروحوله, أو حتى بCherry Bomb.

ميزات التكنيك ونقاط قوة تايل كمغني: تايل عنده تنوع بالتكنيك مثير للاهتمام جداً, سبق وحكيت عن قدرته بالتحكم بطابع صوته. وبقدر قلكم إنه تايل غالباً من النوع اللي بيتعلم بالمراقبة, يعني بيراقب مغنيين كتير وبيلقط تكنيكهم بالغناء, هالشي بتقدروا تلاحظوه من الكوفرز اللي بيعملها وكمان من التنوع الكبير بالتكنيك عنده (برجه الجوزاء والتعلم بالمراقبة خيار وارد لمواليد هيك برج وما بعرف شو قصتي مع أبراج NCT بس كل ما احكي عنهم بمقال لازم احكي بالأبراج! ههههههه!).

كمان بقدر اتوقع من قدرته الكبيرة على التحكم بطابع صوته والتنوع بالتكنيك عنده, وارد يكون عنده موهبة تقليد الأصوات أو تقليد الفنانين, ما بعرف صراحة إذا عنده هيك موهبة أو إذا سبق وعملها, سيزني اللي عم يقرأوا اللي بيعرف يقلنا!

منجي لنفصل تكنيكات تايل, تايل الحلو فيه إنه بيستخدم تكنيكات متنوعة بس بدون مبالغة, ما بيستخدم أي تكنيك بأسلوب مبالغ فيه.

تايل أوقات بيستخدم صوت الصدر بس بدون مبالغة, بيغني أحياناً بأسلوب Breathy شي كلاسيكي لمغني بوب, لكن ما بطريقة تحسوا فيها إن هاد هو الديليفيري الوحيد لصوته على عكس دويونغ اللي بيستخدم هالتكنيك كتير وكتير وكتير يعني بتحسوا النفس والصوت واحد عند دويونغ (no offence بس دويونغ من الأصوات المفضلة عندي بالكيبوب بالمناسبة وهو البايس عندي بNCT بس حبيت اذكر هالشي).

تايل بيستخدم كل تكنيك بحرفية, بيغني وهو مرتاح جداً, بيفتح فمه كفاية ليسمح للهواء يدخل لصدره, وليخلي صوته يطلع بكل حرية, بيستغل مرونة صوته بشكل ممتاز, وبيعرف أيمت يستخدم حليات صوته ومرة تانية بدون أي مبالغة.

بالرغم من إن صوته ذو تموضع متوسط لمرتفع, إلا إنه عنده Low register ممتاز وثابت بالنظر لمساحة صوته أيضاً وبيعرف يستخدمه بشكل رائع لدرجة مثيرة للدهشة, وبقدر اضمنلكم إنه متأثر بمغنيين تينور أصواتهم ذات تموضع منخفض وعندهم low register ممتاز ومتعلم منهم هيك تكنيك وخاصة كيوهيون من سوبر جونيور, لاحظت تايل بيستخدم كتير تكنيكات بيستخدمها كيوهيون,

كمان من أسرار قوة صوته هو الباور مكس العالي اللي عنده! الأمثلة لا تعد ولا تحصى بأغاني NCT 127 وانتبهت إن صوته بينحط كتير بالخلفية وبينعطى كتير مساحة ليعمل Free styling وهالشي طبيعي فوكاليست أساسي.

أوقات تايل بيستخدم بالمكس العالي صوت الصدر فبيرفع الباور تبع صوته كتير وبيطلع صوته كبير ضخم ومشرق وغير محدود متل لو إن بحنجرته عدد هائل من الأوكتافات وكأن الrange تبع صوته مرتين اكبر من الواقع! مثال عن هالشي الhigh note بkick it. وأوقات بيعمل تكنيك بيستخدموه مغنيين الميتال وكيوهيون نفسه بيتسخدمه, هو إن بيحط جزء كبير من الصوت بالرأس وبيدفع من الصدر وشوي من الحلق بيطلع الصوت كهربائي وخارق وعالي, مثال عن هالشي الhigh note بأغنية Gimme gimme.

عموماً بيعرف منيح يستخدم صوت الصدر وهو belter قوي جداً وعنده أفضل mixed register بNCT بدون أي مبالغة.

لازم كمان اذكر لأي درجة بيكون مرتاح وهو بيغني Falsetto. وتوزيع النفس والصوت مرة تانية عنده اللي كتير جيد, طبعا هدول ميزات بتجي مع بعض لما بيكون المغني عنده مكس قوي كتير أو Belter قوي.

تايل لما بيعمل مكس صوته بيكون مدموج كتير منيح ومتصل وقوي, غالباً بيستخدم صوت صدر مسيطر بالمكس بس أوقات بيستخدم صوت راس مسيطر وهذا بيدل إن بيعرف يستخدم كل ربع علامة بمساحة صوته بكل كفاءة.

كمان لازم نحكي عن ثبات الصوت الممتاز اللي عنده, وعن لأي درجة بيغني بإحساس عالي وبديناميكية نادرة!

نقاط ضعف ونقاط يمكن تحسينها: بتصدقوا إذا بقلكم بالكاد في نقاط ضعف عنده؟ كتنكيك لا غبار عليه ويعني حرفياً تايل من الآخر Flawless كتكنيك, يمكن بس منقدر نقول إنه لما بيطلع النص علامة زيادة اللي بيطلعها أوقات ما بتكون مثالية متل باقي العلامات بالrange تبعه لكن هل بتكون جيدة؟ اي جيدة وجيدة كفاية حتى! وأكيد إذا تمرن أكتر ممكن يوسع مساحة صوته بس صدقاً هو ما بحاجة, ب2.2 أوكتاف وعنده تكنيك خارق ومرونة خارقة وخامة وديليفري ومن جميعه, يعني high register و low register وmixed register كله ممتاز وعشرة على عشرة, صدقاً بيعمل mixing و belting بالعلامات بلا جهد يذكر وبكل سهولة كأنها الشغلة شغلته والمصلحة مصلحته!

خلوني اقفل هالفقرة لكن لأن يفترض تكون نقاط ضعف بس ما لقينا وشكلها رح تقلب المزيد من نقاط القوة! المهم الله يحمي تايل وSM رسموه منفرد!

بفرقة مختلفة، هل ممكن يتغير موقع تايل؟ اللي بيقرأ تحليلات الصوت اللي بكتبها غالبا بيعرف هالفقرة لكن فقط مع NCT رح اتجاوز هالفقرة، لأن منرجع ومنقول وجود أي حدا بNCT بيعطيه الفرصة يغير موقعه حسب الأغنية والفرقة الفرعية والمفهوم اللي عم يشتغلوا عليه. الشي الأكيد إن تايل بينجح طبعاً كمغني منفرد وبالمسرح الموسيقي وبانتظار نشوف شو بيطلع منه.

أسئلة شائعة: ليش أغاني NCT ما كتير بتعطينا فرصة نشوف شو بيقدر تايل يعمل بصوته ؟ الإجابة على هالسؤال هي التالي: تايل موجود بشكل ثابت مع NCT 127 اللي فيها مزيج مثير للاهتمام وللتحدي من الأصوات والستايلات, لذلك شي غير سهل نعمل تركيبة ملائمة بأغنية وحدة تفرجي اللي بيطلع من كل حدا فيهم, ومع هيك تايل فرجانا مرونة خارقة معاهم! مع NCT U ما حسيت كتير عنده مشاركات مقارنة بغيره, لكن بتمنى بالمستقبل شوفه جزء من مشاريع فيها تنوع اكتر مع NCT U وما تكون بالاد بليز! ما كل فوكاليست شاطر تحشروه بالبالاد يالSM!

لو تايل غاب لظرف ما، مين أفضل شخص يغني مقاطعه؟ مع NCT 127 رح تضل الأغنية تفرق لأن الVocal line تبع الفرقة ما فيه كتار بيشبهوا بعض, والموضوع هون بيعتمد عالأغنية وعالعلامات اللي فيها, ورح رشح صوت تينور ما كتير آخد حقه واللي هو جونغوو, هالشخص بيقدر يشيل جزء كبير من مقاطع تايل, كمان دويونغ وهيتشان بيقدروا بس رح تفرق عليكم الأغنية. المقاطع اللي علاماتها واطية لمنخفضة بيقدروا يشيلوها يوتا أو جوني أو جايهيون, بس برشح يوتا أكتر شي لأن رح يقدر يعطي طابع صوت أقرب إضافة لأن ما كتير بياخد لاينز بالفرقة. مع NCT U الموضوع يعتمد عالأغنية بس شياوجون أكتر شخص بيقدر يغني بتكنيك وطابع قريب من تايل. لهيك ممكن NCT 127 يستعيروه ليعوض غياب تايل لو شي مرة حصل!

أداء جدير بالذكر:

عنا كتير كتير! خلونا نبدأ بGimme gimme اللي الأداء فيها أبهر الجميع وضلوا يحكوا فيه لأسابيع, رح ضيف عليهم Kick it و Whiplash, بأغنية firetruck شفنا جانب مختلف من صوته, بcherry bomb منشوف الجزء المنخفض الحلو من صوته,بأغنية simon says بتسمعوا مكس ولا أقوى!

كمان لازم نذكر مشاركته ببرنامج The King of masked singer, إضافة لعدد كبير من الكوفرز والأغاني اللي غناها أيام SM Rookies هي Playlist فيها تشكلية حلوة من هالأغاني والأداءات المنفردة اللي ساعدتني بتحليل الصوت هذا.

هاد كان كلشي بيخص صوت تايل! كانت تجربة مثيرة للاهتمام اشتغل عصوته وممتنة لليوم لديلا على هالاقتراح العظيم اللي كان سبب بإني اتعرف على NCT وحبهم ويصير كتير شغلات تانية حلوة تلون وتحلي حياتي ديلا فقط بتعرفهم، بتمنى يكون عجبكم و إذا عندكم أي أسئلة تركولي بالتعليقات.

جميع حقوق هذا التحليل الصوتي محفوظة لمدونتي الخاصة

Lama 🦋