تحليل صوت تيمين-SHINee/SuperM:

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد كبير لأعملها. شكرا لتفهمكم.

بعرف كتيرين طلبوا مني أصوات عالم تانية, لكن بالرغم من العجقة, تحليل صوت تيمين اجى بالنسبة الي هدية عيد ميلاد لصديقة عزيزة لحد الآن حللت أصوات كل بايساتها وما ضل إلا تيمين, لهيك This is for you Naya! عيد ميلاد سعيد!💖

أما الآن, صوت تيمين, خلينا ندخل بالموضوع الرئيسي:

أول شي اللي متابعين تيمين وشايني من أيام الترسيم (معاكم شاول من أيام Replay سنة 2008) رح يعرفوا لأي درجة أنا مستمتعة بالحديث عن صوت تيمين لأن فعلاً تحليل صوته تجربة مختلفة. تيمين صوته كتير تطور عن قبل وتجربته كمغني كتير غنية بصراحة لأن كانت جاي مع النمو بالمراهقة وكل تغييراتها الفيزيولوجية إضافة للاجتهاد والتمرين والشغف الكبير.

أول شي تيمين ابتدأ مع شايني كمغني ثانوي, نعم مغني ثانوي, اللي تعرفوا على تيمين عن طريق SuperM بصفته مغني أساسي فيها أو عن طريق أغانيه السولو وقت ترسم منفرد غالباً ما رح يصدقوا, بس الحقيقة هذا كان موقع تيمين بالفرقة وقتها. طبعاً مع التمرين والاجتهاد والنمو, تطور صوت تيمين وابتدأ صوته يكتمل وصار ياخذ مقاطع أكثر, وبعد رحيل جونغهيون تيمين صارlead vocalist بشايني (عملت قبل تحليل صوت لجونغهيون لو بتحبوا تقرأوه اضغطوا هنا) وبعدها صار Main Vocalist بSuperM يعني متله متل بيكهيون تخيلوا الاجتهاد شو بيعمل! فمنقدر بكل بساطة نقول What a glow up! طبعاً بدون ما ننسى انه ترسم فعلاً كمغني سولو وقدم شغل كتير حلو, تيمين من دون أدنى شك متل يونهو من TVXQ من المغنيين اللي بنصحكم تتابعوا مسيرتهم الغنائية لو حابين تتعلموا تغنوا (تحليل صوت يونهو موجود لو بتحبوا تقرأوه اضغطوا هنا) ولو بتحبوا اكتب مقال عن المغنيين بالكيبوب اللي بنصحكم تتابعوا مسيرتهم الغنائية إذا حابين تتعلموا تغنوا خبروني من فضلكم.

نوع الصوت: تينور بس مع High register لافت جداً وطابع صوت قريب كتير من الكاونتر تينور!

مساحة الصوت: 3 أوكتاف وعلامتين، وخليني خبركم شي: أغلب مساحة الصوت هي جابها بالاجتهاد والتمرين المستمر هو أبداً ما بدأ مسيرته الغنائية هيك. لذلك هو على رأس القائمة عندي بين أكثر آيدولز حققوا تطور بقدراتهم الغنائية وأصواتهم, لهيك ذكرت إني بنصحكم تتابعوا مسيرته الغنائية لو حابين تتعلموا تغنوا, طبعاً هي مساحة صوت جيدة جدا، بعض أفضل مغنيين العالم مساحة أصواتهم بهالحدود.

تصنيف الصوت: صوت ذو تموضع متوسط لمرتفع وقريب جداً من الكاونتر تينور بالمناسبة، mid-range belter يعني مغني بيعمل مكس على العلامات بالجزء المتوسط من صوته، صوت غنائي خفيف, هي تصنيفات كلاسيكية لبوب ستار محترف, وتيمين حقق تطور هائل بصراحة خلال السنوات الماضية وخاصة على صعيد الMixed voice رح نحكي بالتفصيل عن الموضوع.

المرونة والألوان الغنائية: متل أغلب شايني تيمين عنده مرونة غنائية جيدة جداً, قد تكون محدودة مقارنة بالباقيين بس وجوده مع شايني ومع SuperM وبالسولو خلانا نشوف مغني كتير Well rounded وRisk taker وعنده استعداد يجرب شغلات جديدة, نايا صديقتي بتقول إن صوته وصوت تن قريبين من بعض (تحليل صوت تن للي حابب يقرأ هنا), وهالشي صحيح التنين تينور وفي تشابه شوي بميزات الصوت مع اختلافات بسيطة أولها إن تيمين عنده باور أعلى بالصوت وبيستخدم أوقات تكنيكات مختلفة شوي, وكمان التنين مرونتهم محدودة لكن الفرق إن تن شوي Safe Player من هالناحية بينما تيمين Risk Taker وبيجرب ألوان غنائية مختلفة وهالشي أعتقد لأن خلال مسيرته الغنائية تيمين تعرض لسخرية وانتقادات غير عادلة, وانفرض عليه ينمى ضمن حياة الآيدولز الصعبة ويتعرض لكل أنواع الانتقادات بعمر كتير صغير, لهيك تعامل مع الموضوع وصارت شخصيته أقوى وصار ما عنده خوف من الجديد, سمعنا تيمين غنى بوب والكترو وديسكو وسينث بوب وروك وموسيقى تجريبية وبالاد وكتير ستايلات مع شايني وغيرهم. أنا بحب تيمين كتير بالبوب وبالموسيقى الريترو بكل أنواعها جدا مناسبة لصوته وهالشي بيفسر ليش أخذ مقاطع كتير بآخر أغنية لSuperM أغنية We Do .

ميزات الخامة الصوتية: رح احكي بالمقطع القادم شوي أكثر عن التغييرات الهرمونية اللي بتصير على الصوت خلال مرحلة المراهقة لأن تيمين مادة دسمة لهلموضوع بصفته ترسم بعمر 15 سنة, لكن خلينا نحكي حاليا عن خامته الصوتية كرجل بالغ, صوت تيمين كهربائي! كتير منعش, كتير خفيف ورشيق, رفيع لكن كتير قوي, فيه طابع مشرق وحي وشبابي و عالي وفيه باور عالي جداً بشكل طبيعي ولو إنه لسا برأيي عم يتعلم يستخدمه ويتحكم فيه ويتعامل معاه, ولكن وجود هيك باور بصوته مع طابع صوته وخامته هذا كله بيفسر ليش صوته بيندمج بسهولة ويسر مع السينث بوب والالكترو بوب والريترو بوب متل لو إنه جزء من الموسيقى الخلفية, وما بنكر المنتجين اللي اشتغلوا مع شايني استفادوا جداً من هالميزة وحطوا جزء كبير من صوت تيمين بالمقاطع الانتقالية و بالخلفية وقت كانت الأغاني فيها هالنمط من الموسيقى, ورح ركز عفكرة إنهم استخدموا هالشي كتير بالذات أيام ما كان فوكاليست ثانوي وهالشي بيفرح عفكرة لأن استخدام صحيح للصوت, بصراحة شايني من الفرق اللي قليل جداً أو يمكن ولا مرة حسيت إن انعمل خيارات موسيقية غلط معهم. الحلو بالموضوع إن طابع صوت تيمين العام ما تغير بالرغم من النمو, اللي صار بس تغيير بالتكنيك ومساحة الصوت وهالقصص اللي رح نحكي عنها بتوسع أكثر بعدين.

ميزات التكنيك ونقاط قوة تيمين كمغني: هذا المقطع رح يكون طويل من هاللحظة عم قلكم, رح حاول اختصر قدر الإمكان, لكن خلينا نبدأ أولاً بتيمين وقت الترسيم, تيمين لما ترسم كان من أصغر الآيدولز وقتها, كان عمره 15 سنة فقط, وطبعاً كلنا منعرف بهيك عمر التغيرات الفيزيولوجية والهرمونية اللي بتحدث بأجسام المراهقين لحتى ينتقلوا من مرحلة الطفولة للبلوغ, هي التغييرات بتشمل الصوت طبعاً وعفكرة كتير منكم يمكن يفكر إن تغييرات الصوت بتصير بس عالأولاد لكن الحقيقة تغييرات الصوت بتشمل البنات أيضاً (معاكم واحدة هنا عانت جداً أيام المسرح الغنائي والكورال هههههه) لكن أكيد الأولاد بيكون التغيير أكبر بكتير. ممكن كتير أولاد وبنات خلال مرحلة النمو هي إذا كانوا بيتمرنوا وبيغنوا على صغر طبعاً , إن يكونوا متعودين يغنوا علامات معينة أعلى أو أوطى ما بقى يقدروا يغنوها متل قبل لأن الRegister تبع الصوت عم يتغير والأحبال الصوتية عم تطور, أوقات ممكن بهالعمر حتى يحسوا إنو صوتهم عم يتكسر أو الsupport تبع صوتهم عم يخرب وهذا كله طبيعي, وبس تخلص مرحلة المراهقة بسلام بيتغير كله للأفضل.

تيمين طبعاً كان ضحية هالشي, والمشكلة إنه ما سلم من الانتقاد ومن السخرية ببعض الأوقات حتى, اللي متابع شايني من زمان بيعرف إنه حصلت ببعض برامج المنوعات إنهم كانوا أوقات بيسخروا من قدراته الغنائية بالوقت اللي كتير هو كان حابب يتطور غنائياً, طبعاً حط جهد كبير واشتغل عحاله وتمرن لوصل للي وصله حالياً. مع هيك مرة تانية المنتجين اللي اشتغلوا مع شايني ووقتا ومعاهم العبقري الراحل جونغهيون اللي لحن ووزع كتير من أغاني شايني, الكل يشكروا من القلب على الاستخدام الصحيح لصوته بهديك المرحلة.

حكينا قبل إن صوت تيمين بشكل طبيعي قريب كتير من الكاونتر تينور, هالشي بيخيله بيغني بالمنطقة الاخفض من صوته أو بالLow register عنده لكن بتحسوه عم يغني هاي نوت, هذا لأن صوته بشكل طبيعي عالي (بيغني من علامة G2-B5 وهذا طبعاً بيتصنف على إنه Register عالي لرجل), في أصوات بتشبه تيمين بهي الميزة بالSM في عندكم التينور سونغمين من سوبر جونيور والتينور تن من إنسيتي والكاونتر تينور ريووك من سوبر جونيور والكاونتر تينور هيتشان من إنسيتي(تحليلات أصوات تن وريووك موجودة على المدونة بس اضغطوا عأسمائهم لتقرأوها, سونغمين قريباً وهيتشان انطلب مني كتير فوارد قريبا جدا), هي كلها أصوات لما بيغنوا بالمنطقة الأخفض من صوتهم بتبين إنها كأن هاي نوت بس لأن طبيعة أصواتهم هيك. بناء عهاد الحكي تيمين بيستخدم بالغالبية النوتات اللي هو مرتاح يغنيها, بقدر قول هو نوعاً ما محظوظ, طبيعة صوته جداً بتساعده بكل سهولة يحصل على نتائج بالاداء آخرين بيحطوا وزن وجهد كبير ليوصلولها. لكن بنفس الوقت ممكن تحد من اللي ممكن يعمله صوته. هذا الحديث كله الغرض منه وصلكم لفكرة هي إن تكنيك تيمين معتمد بدرجة كتير كبيرة على طبيعة صوته.

تيمين كتير طور الmix voice عنده, والحلو فيه إنه عنده وعي لحدة ورفع صوته لهيك بيعرف منيح يتحكم بهي الحدة, وبيعرف منيح يتحكم بحنجرته وبصوته, وأعتقد هالشي إجى من كونه انحط بموضع آيدول بعمر صغير وتطلب منه يتعامل مع صوته مع كل تطوراته بهيك عمر, كتير بوب ستارز ذكور بيتشاركوا هالميزة كان القاسم المشترك بينهم هو الشهرة المبكرة متل جاستن بيبر كمثال.

نتيجة لطبيعة صوته المرتفعة بشكل طبيعي, الhigh notes ما بتعتبر مشكلة بالنسبة لإله. بيقدر بسهولة يطلعلن, مع هيك ذكرت سابقاً إنه لسا عم يتعلم برأيي يتعامل مع باور الصوت العالي, وهاد يمكن الشي اللي بيخليه يفرق بأداؤه عن أداء جونغهيون وقت تيمين بياخد مقاطعه مثلاً.

بالmix تبعه تيمين بيعتمد كتير على صوت الراس, الموضوع مش اختياري, ,وإنما صوته لحاله ما بيقبل بشكل ما يتعامل مع صوت الصدر وبيطلع فوراً لصوت الراس, للأمانة هذا مش شي سلبي, بالعكس كتير آيدولز الفالسيتتو وصوت الراس يعتبر كابوس بالنسبة الهم, والSM بتحب متل ما منعرف هالنوعية من المغنيين وهالشي طبعاً عطى فرصة للGlow up الكبيرة اللي حصل عليها تيمين بالأخير متل ما حكينا. بس مشكلة هالتكنيك إنه ممكن يحد شوي من الباور تبع الصوت ومن الوزن تبع الصوت. وهالشي أوقات غير محبب ببعض أنواع الموسيقى.

بس على عموم صوته بشكل طبيعي stylized فما بيعذب أبدا بالاستديو, وبيندمج بسهولة وتجربة وضع صوته بالخلفية لكتير من أغاني شايني بالسابق علمته يعمل هالشي, وجوده بفرقة متل شايني ما فيها ولا صوت بيشبه الثاني علمه الهارموني.

تيمين بيقدر يعمل belting و mixing لحد علامات C#5/D5 وهالشي بيخليه كتير قريب من الكاونتر تينور.

وهو جداً واعي للrange تبع صوته وما بيطلع عنه لا أعلى ولا أوطى وتعلم هالشي من وجوده بفرقة متل شايني فيها تنوع صوتي كبير, ولهيك ما شهدنا معاه حالات نشاز كبيرة أو خربطة, على العكس صوته كان ثابت كتير عالمسرح. وجزء كبير من تكنيكه معتمد على طبيعة صوته اللي هو واعي الها, إضافة للشغلات اللي تعلمها من الأكبر منه بالفرقة. ومرة تانية شكراً لمنتجين شايني ولهيونغز الأربعة بشايني اللي انتبهوا عتيمين وحققوا أفضل استخدام ممكن لصوته بكل المراحل خلال مسيرته الفنية لوصل للمستوى اللي كتير حلو اللي وصله.

نقاط ضعف ونقاط يمكن تحسينها: أول شي خلينا نتفق إن تيمين قد يكون اكثر فوكاليست حقق تطور هائل على صوته بالSM ويمكن واحد من أكثر الفوكاليست اللي حققوا تطور عحالهم بالكيبوب, لكن لسا في أمور بينشغل عليها لتصير أحسن.

أول شي استخدام صوت الصدر عند تيمين يكاد يكون معدوم أوقات, محدود جداً جداً على عكس زميله بSuperM تن اللي حكينا عنه قبل إنه مغني بصوت صدر مسيطر, اللي بيضحك بالموضوع إنه تيمين عنده باور أعلى بشكل طبيعي بس ما بيعرف يستخدمه لأن صوته لسبب ما ما بيقبل يدمج عند صوت الصدر, أما تن باور صوته أوطى بس صوته ببين أكبر بكتير لأن بيعرف يستخدم الباور تبعه عن طريق استخدامه الجيد لصوت الصدر. صوت تيمين ما بيقبل يندمج لسبب ما عند صوت الصدر, بيطلع المكس فوراً معاه بطلوع لصوت الراس, هالشي صدقاً آيدولز تانيين ممكن يحسدوه عليه, ومتل ما ذكرت سابقاً هو مش نقطة ضعف تماماً وإنما مش مستحب, يعني مش غلط تكنيكي مية بالمية, بالتمرين طبعاً كل شي بيصير, وأنا واثقة إن تيمين أكثر شخص بيعرف التمرين شو ممكن يعمل.

النقطة التانية واللي هي كمان بسبب طبيعة صوته, مثل الأمثلة اللي ذكرتهم فوق باستثناء سونغمين, الأسماء اللي ذكرتها فوق كلها عندها نفس المشكلة واللي هي إن بالكاد في low register باصواتهم على علامات واطية جدا, بس خلينا نفكر هل فعلاً بيحتاجوه بالنسبة للcareer تبعهم بفرقهم.؟ الجواب هو لا, لأن في عالم تانية تشيل هالجزء بكل كفاءة, بحالة تيمين مع شايني عنا صوتين باريتون وعنا صوت تينور عريض بlow register ممتاز وبهي الحالة مثل ما حكينا بتحليل صوت جونغهيون ما رح يحتاج الهم لأن في مين يشيل هالنوتات عنه. ومع SuperM في عنا بيكهيون عنده low register افضل وعنا كاي صوته باريتون وعنا لاين الرابرز أصواتهم اثنين منهم باريتون وواحد باريتون باص ففي أصوات عريضة كتير تشيل الجزء المنخفض من الأغنية بسهولة وكفاءة أكثر من تيمين وتن.

لما بيدمج عند الجزء الأوسط للأعلى من صوته أوقات بيخسر الثبات تبع صوته لأن متل ما ذكرنا ما بيستخدم منيح صوت الصدر, وبيعلق صوته عند صوت الراس (كتير آيدولز عالأغلب بيحسدوه عهالشغلة ولو انها نقطة ضعف بس إنو مين ما بده فالسيتو رباني D: ) بس لازم ذكر إنه هالشغلة بتخلي صوته أخف وهي مع إنها مش غلط, بس غير مستحبة أوقات لأنها بتقلل من وزن وحجم وباور الصوت.

بفرقة غير شايني، هل ممكن يتغير موقع تيمين؟ الجواب already تحقق واللي هو اي! تيمين ابتدأ كمغني ثانوي بشايني وبعدا صار lead vocalist واجتهاده خلاه يوصل لmain vocalist مع SuperM! اللي مو مصدق هي بروفايل SuperM شوفوه :)

أسئلة شائعة: ليش تيمين غالباً بياخد جسر الأغنية بأغلب أغاني SuperM؟ خفة صوته هي السر! أغاني SuperM. أغلبها أغاني ذات باور عالي وتقيل, تيمين صوته فيه باور بشكل طبيعي متل ما حكينا بس صوته خفيف, والجسر بأغاني SuperM عم يكون غالباً المقطع الأروق والأخف بالأغنية, فعم يختاروا الصوت اللي بيقدر يقدم هالجزء بخفة بس بدون ما تخسر الأغنية الباور العالي تبعها والطابع القوي اللي موجودة فيه.

مين أفضل شخص ياخذ مقاطع تيمين بالفرقة؟ مع SuperM الإجابة سهلة جداً! تن هو أفضل أفضل مرشح, في تشابه كتير بمساحة الصوت وخواصه والطابع الصوتي بس فروقات بالتكنيك وببعض التصنيفات الصوتية, وما حدا يزعل بس في مقاطع ممكن تن يغنيها بكفاءة شوي أعلى حتى! الموضوع لنكون دقيقين مش كفاءة أعلى بالضبط قد ما هو تكنيك تن رح يخلي الأغنية تبين شوي أعلى جودة لأن رح يعطي الصوت وزن أعلى شوي بس هالشي ما بيلاحظه إلا موسيقي أو شخص إذنه خارقة, لهيك لا حدا يتفلسف على تيمين ههههه! تاني مرشح بSuperM هو بيكهيون كمان صوت تينور وفيه باور رهيب وبيقدر ياخد مقاطع تيمين ويتبنى تكنيك مشابه شوي لو حب. أما بشايني, ذكرت قبل إنه كل شخص بشايني صوته مختلف عن التاني كتير, لهيك غياب أي حدا رح يترك فراغ ويخلي الأغنية تفرق, التينور الوحيد المتبقي بالفرقة غير تيمين هو أونيو وبالتالي هو أفضل مرشح بالرغم من إن طابع وخامة الصوت والتكنيك كلهم مختلفين تماما عن تيمين, كيبوم كتير وسع مساحة صوته واشتغل عحاله فكمان وارد يعتبر مرشح جيد يشيل مقاطع تيمين, ورح يعطيها بشكل طبيعي وزن وباور أكثر لأن صوته باريتون وبحاجة ليحط وزن وباور لما بده يطلع بصوته.

أداء جدير بالذكر: :

-أداء تيمين المنفرد لأغنية Love بMusic Bank سنة 2017 هي من المرات القليلة اللي كان صوته فيها عم يطلع كبير وعم يستخدم فيها صوت الصدر أحسن من العادة.

-أداء تيمين المنفرد ل(Hypnosis) كمان بMusic Bank سنة 2016, أغنية بالاد حلوة كتير وبتفرجينا المرونة والجانب الrisk taker عند تيمين كمغني.

-أداء تيمين المنفرد لأغنية Sayonara Hitori أغنية الكترو بوب وهاوس كلاسيكية بتلبق كتير لصوت تيمين.

-أداء تيمين المنفرد لأغنية Rise وSolider بجولة Tour Sirius Concert 2018

-أداء تيمين المنفرد لأغنية Two Kids, الأغنية شوي ستايل بوب غربي أكثر ما هي بوب كوري بس أداء تيمين فيها حلو كتير.

- صوت تيمين بأغنية Replay و Lucifer هو مثال ممتاز عن الاستخدام الجيد لصوته, بأغنية Hello كانت بدايات تألق صوته وبدايات اكتماله, بأغنية one of one تألق جدا وبالألبوم الجديد لشايني أظهر تألق كتير كبير وبالأخص بأغنية Atlantis. ومع SuperM شفنا تطور كتير كبير وأكبر كمية ممكنة من التألق (وكل من لا يتفق في شي بمخه أكيد أو إنه لساته بيبي شاول اسمع أغاني شايني القديمة وبعدا منحكي) تحديداً كان بارز بTiger inside وبعتبرأغنيتهم الأخيرة We do من أفضل ما غنى كمان ب100 وOne (Monster & Infinity) وغيرهم. وهل لازم ننسى بحفل الSM Town الاخير بال2021 اللي دائما بيختموه فنانين الSM بأغنية Hope لأول وأقدم فرقة كيبوب فرقة H.O.T (في مقال قصير عنهم هنا تعرفوا عليهم عيب كيبوبر ما يعرفهم)وقتا تيمين أخد جسر الأغنية! هالشي كتير صراحة خلاني فخورة فيه.

هذا كان كلشي بيخص صوت تيمين، اتركولي ارائكم واسئلتكم بالتعليقات.

جميع حقوق هذا التحليل الصوتي محفوظة لمدونتي الخاصة

Lama🦋