شايني جونغهيون- تحليل صوت:

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد كبير لأعملها. شكرا لتفهمكم.

ملاحظة ثانية: هذا المقال نشرته بالأساس بذكرى وفاة جونغهيون بديسمبر لكن حذفته بالغلط, وهي برجع بنشره :)

بالرغم إنه لسا ما خلصت من سوبر جونيور، لكن ولأجل إحياء ذكرى الرائع جونغهيون بيوم وفاته، رح اعمل استثناء وحلل صوته لحتى نتذكر مع بعض لحظاته الغنائية الرائعة خاصة بعد ما غيابه ترك فراغ كبير بعالم الموسيقى

بعدا رح نرجع نكمل سوبر جونيور وبس نخلص منهم رح نرجع لشايني وللفرق الثانية. لو حبيتوا المحتوى رجاء شاركوه من المدونة ولا تنقلوه بشكل عشوائي لأن بياخذ مني جهد كبير لينعمل.

كيم جونغهيون 1990-2017

نوع الصوت: تينور

مساحة الصوت: 3 أوكتاف وشي تلات علامات يعني أكثر بشوية من ثلاثة أوكتاف، هي مساحة صوت جيدة جدا، بعض أفضل مغنيين العالم مساحة أصواتهم بهالحدود.

تصنيف الصوت: فوكاليست بصوت رأس عالي، صوت ذو تموضع متوسط لمنخفض، mid-range belter يعني مغني بيعمل مكس على العلامات بالجزء المتوسط من صوته، well rounded vocalist، صوت غنائي خفيف. بهي التصنيفات كل مواصفات السوبر ستار تنطبق على الراحل جونغهيون، رح نشوف بالتفصيل أكثر.

المرونة والألوان الغنائية: جونغهيون واحد من أصحاب أعلى مرونة غنائية بشايني، بالرغم من إنه للأسف ما لحقنا نشوف الكثير، لكن شفنا الكافي. صوته القوي مناسب لأنواع محددة وصعبة من البوب، سمعناه بيغني بالاد حلو كتير، صوته بيلبق للR&B والهيب هوب، وبيطلع حلو ببعض أنواع الروك بسبب الBelt المميز اللي ببستخدمه أوقات، صوته بيطلع حلو بالبوب القديم الريترو تبع الثمانينات أو موسيقى الديسكو تبع السبعينيات.

ميزات الخامة الصوتية: أول ما سمعت صوت جونغهيون سألت حالي، هل هذا مايكل جاكسون الكوري؟ حدا فكر بنفس الشي؟ صوته كثير بيشبه صوت مايكل جاكسون!

صوت جونغهيون خفيف لكن Well rounded وكبير وقوي ومليان طاقة! طابع صوته مشرق وفيه شباب وكله حيوية، وصوت جونغهيون قادر ينعش أي أغنية!

صوته اله هوية وشخصية، من دون ما نعرف أي مقطع بالذات مقطعه رح نعرف بسهولة ومن دون ما نشوف فيديو أيمت عم يغني، صوته غير محدود وهو بيعرف يستخدمه بشكل مثالي. ومع إنه صوته رفيع شوي وخفيف بس فيه بحة وجرحة خفيفة حلوة كتير، وصوته نقي جداً.

ميزات التكنيك ونقاط قوة جونغهيون كمغني: جونغهيون مغني قوي ومتمكن جدا، والحلو فيه إنه بيفهم صوته منيح وبيعرف يستخدم كل جزء فيه، والشي عبقري أكثر إنه هو طور هالاستخدامات ليعمل كثير اختيارات معينة ويخلق أسلوب بالغناء وتكنيك خاص فيه اسمه أسلوب جونغهيون!

لاشرحلكم أكثر، بيحط جونغهيون جزء من صوته بالخلف، بيخففه من الصدر وبيطلع صوته قوي وغني ومليان طاقة وكبير، بيفتح فمه بشكل واسع بيخلي صوته يفتح ويطلع بشكل حر. أوقات بيخفف صوته من أنفه بدون ما يخلي الصوت يعلق هونيك، المكس تبعه رشيق جدا وصوته رشيق جدا! وفيه توازن وثبات هائلين.

صوته ثخين بالمنطقة المنخفضة منه وبيستخدمه بشكل رائع، خفيف لكن قوي بالمنطقة الوسطى منه، وبالمنطقة العليا جرس إنذار!! عالي ورائع رائع!

مكس صوت الرأس وال falsetto تبع جونغهيون يمكن أحلى صوت رأس سمعته بالكيبوب. وصوت الرأس عنده اكثر صوت رأس متطور سمعته من آيدول صوته تينور، وبيستخدمه بثقة وبشكل استثنائي.

كل منطقة بصوته بتشتغل بشكل جيد، عنده تحكم حلو وانتقال جميل بالعلامات الموسيقية وأذن موسيقية نظيفة، وحليات صوت جميلة بيستخدمها أوقات بشكل حلو.

الثقة بالنفس والاحساس العالي شغلتين مالن علاقة بالفوكالز لكن نقاط قوة تحتسب لجونغهيون بالأداء.

نقاط ضعف ونقاط يمكن تحسينها: ما في كتير شغلات قابلة للتحسين وعموما ما عنده نقاط ضعف تذكر. بقدر قول إنه كان أوقات بيقدر يغير شوي بخياراته بالغناء ليزيد تحكمه بحدة صوته.

والمنطقة المنخفضة من صوته أقل تطور مقارنة بباقي صوته لكن بصفته تينور ما بيحتاجهم صراحة، وبفرقته في شخصين باريتون واحد منهم صوته عريض ومنخفض كثير، وفي تينور عريض، ففي ثلاثة أشخاص قادرين يشيلوا النوتات المنخفضة بشكل جيد جدا لهيك يمكن ما كان بحاجة يشتغل عليهن كتير.

بفرقة غير شايني، هل ممكن يتغير موقع جونغهيون؟ الجواب هو لا، جونغهيون فوكاليست أساسي بشايني وبفرقة غير رح يكون نفس الشي. كنا منتمناله مسيرة أطول كمغني منفرد، لكن غادرنا قبل هالشي ما يصير وكانت خسارة كبيرة .

أسئلة شائعة: ليش أغاني شايني القديمة عم تفرق كثير بعد رحيل جونغهيون؟ لأن صوته اله شخصية، ولأن بيغني 90 بالمية بأسلوبه وتكنيكه الخاص، رح يترك فراغ كبير، جونغهيون أكبر خسارة للموسيقى بكوريا.

مين أفضل شخص ياخذ مقاطع جونغهيون بالفرقة؟ رح تضل الأغنية تفرق، بس أونيو بيقدر يشيل جزء كبير وتايمين بعد ما طور مهاراته بيقدر يشيل جزء تاني كمان، شايني كل فوكاليست فيها مختلف عن الثاني بشكل كبير لهيك غياب أي واحد بيترك فراغ كبير للغاية.

أداء جدير بالذكر: في كثير صراحة، ضيفوا اي شي تاني بتحبوه عالقائمة:

-أداء جونغهيون المنفرد لأغنية Crazy (guilty pleasure) اسمعوها كتير شي مختلف عن اللي منسمعه مع شايني.

-أداء جونغهيون المنفرد لDeja-boo وCrazy كان مايكل جاكسون العادة!!

-أداء جونغهيون المنفرد لأغنية Y si fuera ella هالأغنية كان فيها نداء استغاثة واضح ما بعرف ليش ما حدا انتبهله الاحساس رهيب! التحكم رهيب! كل شي رائع!

-أداء جونغهيون المنفرد لأغنية I'm Sorry اسمعوا صوت الرأس الرهيب عنده.

- بكل أغاني شايني صوت جونغهيون تميز وتألق وأضاف طاقة وحيوية ونكهة منعشة للأغنية، رح خص أغنية Hello و Juliet و Replay و one of one و بExcuse me miss اسمعوا صوت الرأس شقد خارق عنده.

وأكيد بأحد أوستاتي المفضلة من الكيدراما Stand by me من مسلسل Boys over flowers.

هذا كان كلشي بيخص صوت جونغهيون، اتركولي ارائكم واسئلتكم بالتعليقات.

لقد أحسنت صنعاً جونغهيون!

لترقد بسلام

جميع حقوق هذا التحليل الصوتي محفوظة لمدونتي الخاصة

Lama