NCT/WayV/SuperM تن-تحليل صوت:

#NCT_V

#WayV_V

#SuperM_V

#كيبوب_تحليل_صوت

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد لأعملها. شكرا لتفهمكم

عدنا لتحليل الصوت! واليوم بمناسبة عيد ميلاد شيتافون AKA تن، رح نحلل صوته.

تن أول شخص بحلل صوته من الجيل الثالث/رابع، وأول حدا من NCT و WayV و SuperM بحلل صوته، وأول شخص موجود بأكتر من فرقة بحلل صوته!

لازم نوه لشي، أنا لسا جديدة على NCT بكل تفرعاتها، لكن already بعتبر حالي فان كبيرة الن. وحبيت اعمل تحليل صوت تن بعيد ميلاده لفاجئ فيه صديقة عزيزة بتحبه كتير.

أنا متحمسة احكي كثير عن تن، لأن تن لفت نظري جدا بحفل SM Town 2021، الولد موهوب ومتعدد المواهب بشكل رهيب، وهالشي بيفسر وجوده بأكتر من موقع وأكتر من فرقة، ولسا المستقبل قدامه كتير كتير كبير طبعا.

بلا طول حديث وخلونا نبدأ:

أول شي وعلى عكس العادة، رح حاول "وبشكل استثنائي فقط مع NCT" اتجنب أدخل بالمواقع صوتيا للأعضاء، السبب هو انو NCT فرقة كتير كبيرة ووجود فرق فرعية كتير ومفاهيم كتير وNCT U بيعطي فرصة فعلياً لكل عضو يكون بموقع مختلف كل مرة، ولهيك تحليل أصواتهم يمكن يكون تحدي الي، بس مستقبلاً توقعوا المزيد من تحليلات أصواتهم بالمستقبل.

عموماً، بحسب ملاحظتي مع WayV تن عم يكون بالفوكال لاين الاساسي ومع SuperM هو lead vocalist ومع NCT U بيتغير موقعه حسب الأغنية.

نوع الصوت: تينور.

مساحة الصوت: تن لسا جديد وأنا حتى لسا جديدة عليه وعلى صوته، حاولت اسمع كمية كبيرة اليوم قد ما فيي، تقديرياً مساحة صوته ممكن تكون أقل بشوي من تلاتة أوكتاف يعني تقريبا تلاتة، وطبعا هي مساحة صوت ممتازة، ومن ملاحظتي جزء كبير من هالمساحة محصله نتيجة التمرين وممارسة الغناء لمدة طويلة، واضح انو هالولد بيغني من هو وصغير.

تصنيف الصوت: أصوات تجارية، صوت ذو تموضع مرتفع، صوت إذاعي، صوت مسرحي. بهالتصنيفات تن بيقدر يكون بوب ستار، بيقدر يجرب المسرح الغنائي بس مش الكلاسيكي لأن ما بيناسب طابع صوته، بيقدر يكون رابر كمان، وبيقدر يغني هيب هوب و R&B.

المرونة والألوان الغنائية: بداية وبعيداً شوي عن تن خلينا نتفق على إن وجود أي حدا بفريق كبير متل NCT فيه تنوع صوتي رهيب بيفتح على أي حدا بابين: إما تجربة كتير أنواع موسيقى وألوان غنائية ومفاهيم جديدة وعرض العضلات بالمرونة اللي عنا أو بس التسلية والمغامرة بهيك شي "في أمثلة عهيك عالم بNCT بس اتعمق فيهم اكتر ممكن اكتب عن الموضوع"، أو انو نلعبها Safe شوي ونضل ضمن اللون اللي بيلبقلنا. لسا ما عندي كتير فكرة عن لأي درجة الSM عاطية حرية انتاجية وفنية لNCT بموسيقتهم بس اللي فهمته لحد الآن إنها عاطيتهم مساحة مقبولة وأحياناً كبيرة كتير للإبداع بأغانيهم بأنفسهم.

منرجع لتن، تن يبدو إنو عم يتواجد غالبا بأغاني الكتير بوب، بالهيب هوب والR&B وبشوية أغاني ستايلها ريترو كمان، وهاد لطبيعة صوته كلو يعتبر Safe لأن الولد واضح انو عارف منيح شو بيلبق لصوته، وبعتقد أكبر مخاطرة عملها لما غنى Baby don't Stop بس النتيجة كانت مذهلة! تن صوته صراحة كتير بوب وكتير R&B وبيلبقله البوب الغربي كتير وبعض أنواع البوب الريترو القديم، وصوته جيد للهيب هوب، شفت مقاطع فيديو وهو عم يعمل جامز مع زملاؤه بالفرقة وعم يغني شغلات مختلفة شوي وعم تطلع حلوة، بس اللون الأفضل لصوته هو الR&B وبتخيل بيطلع حلو بالسول، مرونته مقبولة لكن مقارنة بالباقيين حوله بNCT ما منقدر نعتبره الأعلى مرونة أو مرن جدا غنائياً، بتخيل تن ينجح بعد التمرين بالمسرح الغنائي بس لازم ما يكون شي كلاسيكي من ستايل المسرحيات اللي بيشاركوا فيها كيوهيون وريووك من سوبر جونيور مثلا، بتخيل مسرحية أو فيلم غنائي تكون أجوائه على ديزني شوي يكون مناسب جدا لطبيعة صوت تن وطريقة غنائه.

ميزات الخامة الصوتية: صوت تن اله طابع مشرق جدا ولطيف عالسمع، من دون أدنى شك هو من الأصوات اللي بتحبا الSM ومنقدر نشوف هالشي بكمية الlines اللي بياخدها مع WayV وكمان بتواجده بكتير فرق وبكتير أغاني لNCT، صوته رفيع وعالي ومشرق ومفتوح، وبصوته في رشاقة حلوة كتير خاصة لما بينتقل من صوت الصدر لصوت الراس بيطلع صوته كتير Melodic والنقلة بتكون كتير رشيقة وخفيفة وحلوة، بتحسوا أحباله الصوتية عندها نفس رشاقته ومرونته كراقص! صوته ناعم وخفيف ولطيف جدا عالأذن وصعب تسمعه وما تستلطفه.

ميزات التكنيك ونقاط قوة تن كمغني: تن مغني بصوت صدر مسيطر، بقدر قول ان هالولد كان غالبا يسمع كتير بوب غربي وكتير أغاني لمغنيين عندهم نفس طبيعة صوته لأن بيغني بتكنيك مشابه شوي، بتخيل انه بيسمع كتير لجاستن بيبر ما بعرف ليش هيك إحساسي بيقلي، بس الستايل اللي بيغني فيه صاير ستايل بوب غربي أكتر ما هو بوب كوري أو صيني والSM على حظه مبسوطة عليه كتير، على أيام هنري من سوبر جونيور اللي بيغني بتكنيك شوي مشابه ما كانوا الSM مبسوطين عليه كتير بهالتكنيك بس ما علينا!

استخدام تن لصوت الصدر جدا متطور وحلو كتير، ذكرت من قبل انه عنده رشاقة بالانتقال من صوت الصدر لصوت الراس وهالشي بيعطي أو بيزيد وبعزز الطابع المشرق اللي بصوته، بتحسوا صوت تن ما بيزبط كتير على أغاني حزينة بسبب هالشغلة، بس بعتقد بيطلع معاه اذا جرب يلعب بتوزيع صوته.

المكس عنده حلو وصوته فيه ثبات رائع بالأداء اللايف، أنا وقت سمعته ما صدقت إنو هاد مغني صرله بس أربع لخمس سنين تقريباً بالمجال، صوته كتير ثابت عالمسرح وعنده أذن موسيقية حلوة وحس بالايقاع والميلودي جيد جدا.

الSupport تبع صوته كمان جيد وهاد كمان بيساعده اكتر يظهر بهالثبات بالأداء اللايف.

صوته بالمنطقة العليا منه حلو كتير وبيشرق اكتر شي بهالجزء وهذا سبب تاني ليطير عقل الSM فيه لأن فعلياً نوعية صوته من الأصوات اللي كتير الSM بيحبوها.

حنجرة تن "كآلة موسيقية" جدا متصلة ومرنة، وهالشي مرة تانية جنب الرشاقة بالانتقال من صوت الصدر لصوت الراس والرشاقة بالمكس والرشاقة بالانتقال من علامة لعلامة بيخلي صوته هيك يطلع مدموج بشكل رهيب "اسمعوه بLove Talk لتعرفوا قصدي، أداؤه فيها أفضل مثال عن هالحكي".

تن كمان صوته هو نفسه بأغلب الأغاني وهاد دليل إن قليل ليغير بالتكنيك "هاد شي مو سيء بس كمان دليل انه هو Safe player برجه الحوت عادي P: "

بيحط هوا كتير بصدره وبيستخدمه حلو لما بيدمج لأن طريقته بالغناء كتير بتعتمد عصوت الصدر، وعفكرة تكنيك المكس تبعه بيعتمد على إن يشيل جزء كبير من وزن صوته عن طريق صوت الراس، هالتوزيعة هي بتدل إن هو فاهم تموضع صوته العالي بالنسبة لتينور أصلا، وبتدل كمان إنه فاهم شو أجمل مناطق صوته وشو نقاط قوته وين بيتألق صوته أكتر شي.

صوت الراس عنده حلو كتير بسبب تموضع صوته العالي بالنسبة لتينور بشكل طبيعي، وصوته من النوع اللي منسق بشكل طبيعي، لهيك مناسب جدا للبوب وما بيعذب كتير بالاستديو "هالولد هو الdream boy تبع الSM والله كل شي الSM بتتمناه بالأصوات الرجالية عنده منه".

نقاط ضعف ونقاط يمكن تحسينها: بالنسبة لمغني جديد وصرله قريب الأربع لخمس سنين بالمجال تن ما عنده الكتير ليشتغل عليه صراحة، واضح إنه متمرن من زمان وموهوب وقوي كتير لدرجة كانت كافية للSM تحطه بفرقة SuperM ليغني جنباً إلى جنب بعض المحترفين المخضرمين من فرق أقدم مثل شايني وإكسو. لكن طبعاً لاحظت بعض القصص اللي ممكن تنحط ضمن خانة نقاط الضعف وبعض الشغلات التانية اللي لسا بينشغل عليها بالتمرين لتصير أحسن.

أول نقطة ضعف هي إنه تن قد لا يكون الأعلى مرونة بفرقته، بس هذا مش شي سيء صراحة، إذا كان المغني طبيعة صوته بتخليه محدد بنوعين لتلاتة موسيقى مثل حالة تن أو حتى نوع واحد وعم يأبدع فيه ساعتها ما عنا شي لنقوله.

منجي للي ممكن يتحسن بالتمرين أو ينشغل عليه، تن المنطقة الوسطى من صوته جيدة لكن ما بيستخدما كتير ولما بيستخدما ما بيفتح فمه كفاية ليدخل هوا وبيعلق شوي الصوت، وواضح إنه هو واعي للموضوع فبتلاقوه عم يشد رقبته عالمسرح ويرفعها لفوق بحيث يعلي مرونة أحباله الصوتية، ولهيك ما حدا بيلاحظ المشكلة عالمسرح، لأن لو ما بيعمل هيك لكان علق صوته بحلقه، بس هالطريقة غلط وعالمدى البعيد ممكن تتعب حنجرته. هي المشكلة حلها أسهل من ما بيتخيل شيتافون، بس يفتح فمه أوسع وهو بيغني ورح تنحل المشكلة.

تن بالمنطقة الأخفض من صوته ما كتير يبدو إنه حصل على تمرين عليها، المكس تبعه عالعلامات الواطية ما زيادة لأن واضح ما متمرن عليه كتير + صوته طبيعته ذات تموضع مرتفع بتخليه بخاف شوي من العلامات الواطية وواضح إنه بيخاف! بتخيل إذا تمرن عليهم يزيد من مرونته الغنائية ويفتح لحاله باب تجريب أنواع موسيقى ومفاهيم غنائية أكثر.

بفرقة مختلفة، هل ممكن يتغير موقع تن؟ اللي بيقرأ تحليلات الصوت اللي بكتبها غالبا بيعرف هالفقرة لكن فقط مع NCT رح اتجاوز هالفقرة، لأن منرجع ومنقول وجود أي حدا بNCT بيعطيه الفرصة يغير موقعه حسب الأغنية والفرقة الفرعية والمفهوم اللي عم يشتغلوا عليه.

أسئلة شائعة: ليش تن بياخد أكبر عدد lines مع WayV ؟ الإجابة واضحة، تن أولا من أفضل المغنيين بWayV والSM متل ما ذكرنا بتحب كتير نوعية الأصوات اللي متل تن لهيك رح تعطيه كتير lines شي طبيعي.

لو تن غاب لظرف ما، مين أفضل شخص يغني مقاطعه؟ هالسؤال حالياً صعب الإجابة بوجود تن بعدة فرق وبكونه عضو بأكبر فرقة بالعالم، لكن مع SuperM تايمين وبيكهيون أفضل شخصين لأن أصواتهم تينور وقادرين يغنوا مقاطع تن بلا ما تفرق الأغنية كتير، أما مع NCT في كتيرين صراحة بيقدروا ياخدوا مقاطعه بس NCT فيها تنوع صوتي كتير كبير ورح تضل الأغنية تفرق، لأن المدهش بالرغم من حب الSM للأصوات اللي بتشبه صوت تن بس بNCT ما في أصوات تانية متله، اي في تينور كتار غيره، لكن بيختلفوا عنه بطابع الصوت، التكنيك والتموضع. وفكرة إنه بيغني بأسلوب بوب غربي كتير، رح تخلي الأغنية تفرق كمان.

أداء جدير بالذكر:

أكيد ما حدا رح يتفاجئ من وجود Love talk بهالفقرة، هي الأغنية اللي بتقدروا تشوفوا فيها كل نقاط قوته اللي ذكرتها بوضوح وبتلخص كلامي كله فيها. كمان 90s love كان أداؤه فيها ممتاز وفيها استخدام غير معتاد لصوته بالمنطقة الأوسط والأخفض من صوته، كمان عنا أغنية Baby don't stop فيها تغيير عن الستايل المعتاد اللي بيجرب يغنيه والأداء روعة وصوته كان مفتوح ومشرق جدا. بأغنية new heroes كمان أداؤه كان لافت للنظر. في مقطع لقيته عاليوتيوب وهو بيعمل Jamming لأغاني غربية أغلبها مع زملاؤه بالفرقة، أداؤه مميز جدا بالبوب الغربي اضغطوا على كلمة مقطع وفيكم تروحوا عليه.

هاد كان كلشي بيخص صوت تن لحد الآن، ممكن نرجع نعمل تحليل تاني بس يصير عنا أغاني وأعمال أكتر اله، وبس نشوف في شي تغير بأداؤه، بتمنى يكون عجبكم و إذا عندكم أي أسئلة تركولي بالتعليقات.

جميع حقوق هذا التحليل الصوتي محفوظة لمدونتي الخاصة

Lama 🦋