سوبر جونيور ييسونغ-تحليل صوت:

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد لأعملها. شكرا لتفهمكم.

متحمسة جدا احكي عن صوته لأن رح يكون في تغيير بنوعية أصوات سوجو اللي شفناها بهالسلسلة.

بداية ييسونغ موقعه بسوبر جونيور وبالفرق الفرعية اللي هو فيها KRY و Super Junior H فوكاليست أساسي.

نوع الصوت: باريتون (وأخيرا صوت مختلف!!) في ناس بتصنف ييسونغ تينور لأن بيغني نوتات عالية، أنا عندي تحفظ على هالتصنيف، صوت ييسونغ وهو مرتاح عريض كتير مقارنة بالصوت التينور، والنوتات العالية اللي بيغنيها قدر يغنيها بهالكفاءة بعد تمرين واجتهاد كبيرين.

مساحة الصوت: 3 أوكتاف، هي المساحة أفضل بكتير من مساحة الصوت الشائعة بين مغنيين البوب، بعض أفضل مغنيين العالم مساحة صوتهم 3 أوكتاف.

تصنيف الصوت: صوت ذو تموضع متوسط ومنخفض يعني صوته عريض ومعتدل "باريتون"، Mid-range belter يعني مغني بتكنيك بيستخدم فيه مكس لصوت الصدر الاعلى مع المنطقة المتوسطة من صوته وبهالطريقة بيغني نوتات عالية. بهالتصنيفات ييسونغ بيقدر يغني بالاد، بيقدر يكون روك ستار، كل انواع الروك بيقدر يغنيها، البوب جيد اله كمان.

المرونة والألوان الغنائية: ييسونغ من دون أدنى شك بيتمتع بالمرونة متله متل غالبية سوبر جونيور، لكن مرونته شوي محدودة مقارنة بالباقيين والسبب هو خامة صوته. سمعنا ييسونغ بيغني مع سوجو بوب، R&B ، هيب هوب، الكترو، جاز، بلوز، روك، بالاد وغيرهم. أنا شخصياً بحب صوت ييسونغ كثير بالروك أعتقد انه اللون الغنائي الأنسب لصوته وعطول بتمنى سوجو يعملوا فرقة روك فرعية يكونوا هيتشول وييسونغ الفوكالز الاساسيين فيها. البالاد كمان احد افضل انواع الأغاني اللي بيأديها ييسونغ.

ميزات الخامة الصوتية: من وين بس بدنا نبلش؟! ييسونغ الله أنعم عليه بنعمة واللي هي "صوته اله شخصية" يعني صوته بيحكي عنه. يعني مثلا لو شغلنا أغنية مسجلة بصوت ييسونغ وما قلنا انو ييسونغ المغني وما في فيديو بظن الكل رح يحزر انه هاد ييسونغ! او اذا سمعتوا اغنية لسوجو اول مرة بتسمعوها بدون فيديو رح تحزروا فورا وين مقاطع ييسونغ ومتى عم يغني! صح؟ صوته مميز ولهيك هيوك بيضل يقلده، لأن لتقلد حدا لازم يكون صوته اله شخصية!

ييسونغ صوته فيه بحة حلوة كتير، صوته شجي وفيه حزن ودفىء بنفس الوقت، صوته فيه جرحة حلوة فيه عرض وخشونة أوقات لهيك مختلف عن غالبية أصوات سوجو الرفيعة ولاحظوا ما صنفته كصوت تجاري متل الباقيين! صوته فيه تأثير dark و Smoky نوعا ما لهيك مثالي لموسيقى الروك أو لأغاني موسيقى الهاوس اللي بدها طبقة كثير واطية.

إذا بتلاحظوا بحة صوته اللي بيغني فيها هي نفسها لما بيحكي وهذا بيدل انه بيغني بصوته الطبيعي أغلب الأوقات.

شو بدي قول أكثر؟ الله يحميه بس!

ميزات التكنيك ونقاط قوة ييسونغ كمغني: ييسونغ Belter قوي جدا!! استخدامه لصوت الصدر رائع! ييسونغ مغني عبقري عنده تكنيكه الخاص بالغناء وبيعرف صوته كثير منيح وبيعرف كيف يستخدمه وواضح انه اجتهد كثير على نفسه ليوصل للي وصله.

تكنيك ييسونغ بالغناء فريد من نوعه ومرن جدا، وقت بده يستخدم belt ومكس معين بيمزج صوت الرأس مع صوت الصدر وبيفتح فمه بشكل واسع وبيسمح للهواء بالدخول وبيخفف صوته شوي صغيرة من صدره وحلقه بدون ما يخسر العرض والضخامة اللي فيه والمكس تبعه بيكون مثالي!!

نقطة قوة ثانية تحسب لييسونغ انه بيغني بإحساس جميل جدا وبيحاول فعلا يوصل كلمات الاغنية بصوته

نقاط ضعف ونقاط يمكن تحسينها: بتتذكروا وقت حللنا صوت دونغهي ذكرنا انه بعض الوكالات بالكيبوب بتخرب اصوات الايدولز بإنها تجبرهم يغنوا بطريقة معينة. للأسف هالنوع من الاجبار ييسونغ ما سلم منه، لكن صوته ما انخرب وتكنيكه ضل جيد جدا. الفكرة بس انه بما إن ييسونغ صوته باريتون وعريض عكس اغلب سوبر جونيور اللي اصواتهم تينور ورفيعة، وSM سبق وذكرنا ما بيحبوا كتير الأصوات العريضة لسبب ما. يمكن لهيك ييسونغ تمرن كثير على النوتات العالية وحط جهد كبير عليها، المشكلة هون انو وقت ييسونغ بيغني نوتات كتير كتير عالية بالنسبة لصوته كالعادة بيعمل مكس ممتاز وما بينشز ولا بيعلق صوته لكن! بيحط وزن وجهد كتير كبير وهالشي بيكون أوقات واضح، أنا شخصياً بخاف عليه وقت شوفه عم يغني هيك نوتات!

بفرقة غير سوبر جونيور، هل ممكن يتغير موقع ييسونغ؟ الجواب هو لا، ييسونغ فوكاليست أساسي بسوجو وبفرقة غير رح يكون نفس الشي، بوكالة غير SM ممكن يحصل على تقدير واهتمام اكبر من دون ادنى شك، وبفرقة روك ممكن يطلع أفضل ما عنده!

أسئلة شائعة: ليش ييسونغ بأغاني سوجو القديمة كثير ما كان ياخذ كتير مقاطع مع انو فوكاليست أساسي؟ السبب إنه SM متل ما سبق وذكرنا بتفضل الأصوات التينور الرفيعة بالنسبة للرجال والسوبرانو بالنسبة للنساء وبتحاول ما تعطي أهمية كبيرة للأشخاص بأصوات غير، ييسونغ ذكي وانتبه لهلشي وتمرن كثير ليغني نوتات أعلى من الباريتون الطبيعي، والسبب الثاني انه لما طلعت فرقة سوبر جونيور SM كانت مهتمة تصنع آيدولز اكثر ما مهتمة تصنع موسيقى، لاحقاً لحسن الحظ سوجو صاروا يكتبوا اغانيهم بنفسهم بطريقة تناسب اصواتهم وصار ييسونغ قادر يثبت نفسه اكثر

.

لو ييسونغ غاب لظرف ما، مين أفضل شخص يغني مقاطعه؟ بسبب خامته الصوتية الفريدة من نوعها يؤسفني قلكن انه بغض النظر مين رح ياخذ مقاطعه رح تضل الأغنية تفرق عليكن ورح تحسوها مختلفة بسبب خامة صوته اللي كثير فريدة، مع هيك برشح باريتون تاني ياخذ المقاطع اللي نوتاتها واطية واللي هو كانغ إن، واللي ممكن ياخذ مقاطع النوتات العالية صوتين تينور بس عريضين شوي اللي هني كيونا وهيتشول.

أداء جدير بالذكر: من وين بدنا نبلش؟! في كثير صراحة، ضيفوا اي شي تاني بتحبوه عالقائمة:

-أداء ييسونغ المنفرد بSS3 لأغنية it has to be you

-أداء ييسونغ المنفرد بSS4 لأغنية the more I love you روك مع بالاد شو بدكم احلى من هيك؟

-أداء ييسونغ المنفرد بSS4 لأغنية kiss me أغنية بتناسب صوته جدا جدا وشي مختلف عن اللي منسمعه فيه عادة مع سوجو.

-أداء ييسونغ المنفرد بSS2 لأغنية Resignation

-اداء ييسونغ المنفرد ببرنامج King of masked singer لأغنية people more beautiful than flowers يمكن هاد واحد من اكثر المرات اللي حبيت فيها صوت ييسونغ! الأغنية ممتازة لصوته!!

-صوت ييسونغ بأغنية Show و Believe و Don't don و2ya2yao وبBurn the floor اكيد! وبGood person وأكيد أكيد بSorry sorry النسخة الاولى وAnswer وغيرهم الكثير. ويمكن هذا Unpopular opinion بس بتعرفوا الفيلم الفاشل اللي بيكرهوه كل الالف؟ كان دور ييسونغ مغني روك وطلع اقل من دقيقة بيغني روك فيهم وكانوا من احلى ما غنى!

هذا كان كلشي بيخص صوت ييسونغ، اتركولي ارائكم واسئلتكم بالتعليقات.

جميع حقوق هذا التحليل الصوتي محفوظة لمدونتي الخاصة

Lama