عن كلمات وألحان أغنية تعاون تايونغ وبيكهيون الجديدة: Monroe- TY x Baekhyun

صدرت البارحة أغنية تايونغ وبيكهيون مونرو على حساب تايونغ على ساوند كلاود (اضغطوا عالأسماء بتروحوا للروابط).

بناء على تصويت عملته عند السيزني البارحة, اختاروا احكي عن كلمات هي الأغنية لتكون فاتحة هالسلسة اللي رح نحكي فيها عن كلمات وألحان الأغاني وممكن ندخل أيضاً بكيف تم إنتاجها إذا قدرت فصل هالتفاصيل أيضاً.

مهم جداً وقبل ما نبدأ: هذا المقال مجهودي الشخصي وأخذ وقت من البحث والكتابة والتعاون مع أصدقاء كوريين ليراجعولي الترجمات المتوفرة للأغنية ويدققولي اياها, لذلك لو حبيتوا المحتوى بتمنى تشاركوه حصراً من المدونة ولا تنسخوا وتلصقوا أو تنقلوا بشكل عشوائي. (احفظ حقوق الناس تحفظ حقوقك) شكراً لتفهمكم 💚💚💚 خلونا الأن نبدأ:

الأغنية ستايلها الموسيقي مزيج من الجاز والهيب هوب والR&B و البوب سوا مع مقدمة بستايل أو إيفيكت Lo-Fi شوي, كتير شي عصري وعبقري وبيدل على إنه تايونغ مؤلف موسيقي بيسمع كتير موسيقى وعنده إطلاع كبير على كل شي جديد (إضافة لأن ومنعرف منيح إنه بيحب هالتركيبة). اللي بيعرفوني بيعرفوا شقد أنا مبسوطة بالأغنية لأن أولاً بحب صوت بيكهيون بالجاز, وثانياً وهو الأهم لأن كنت دائماً أتمنى أغنية جاز لتايونغ لأن طابع صوته سواء فوكال أو راب بيلبق جداً لهيك موسيقى.

كتب كلماتها تايونغ ولحنها بنفسه, وتعاون معه على ألحانها وتوزيعها بالاشتراك مع SQUAR (BLUR).

كلنا منعرف مستوى كلمات تايونغ مستوى شاعر بصراحة, ومحتاجة جمهور كتير محدد ليفهم المصادر اللي بيذكرها والتلميحات والصور والتراكيب اللي بيحطها. لذلك اليوم رح نشرح أغنية مونرو, ورح حاول أدخل على قد ما بقدر بجميع التفاصيل الممكنة, وفسر كل الأوجه الممكنة بكل سطر. إذا مستعدين خلونا نبدأ:

بداية تايونغ قال باللايف على انستاغرام قبل ساعات قليلة من إطلاق الأغنية إن الأغنية أغنية حب, عم يحكي فيها لو حب كيف ممكن الحب برأيه وبتصوره يكون, وكيف ممكن يحب, قال إن اللوحات اللي رسمها لتيزرز الأغنية استخدم فيها الألوان اللي بيشوفها ألوان الحب كمان. (الأغنية جريئة شوي صغيرة بالمناسبة, لهيك منشكر صراحتك هالمرة وإنك قلت إنها فعلاً أغنية حب ومش عن أختك!😂 😜) بووم!! قصفنا تايونغ مشي الحال! 😂 ما بإيدي! اللي بيعرفني وبيعرف إني هيتشول بايسد بسوبر جونيور رح يفهم :).

أول شي كلمات الأغنية بالكورية بتلاقوها هنا , الكلمات الإنكليزية موجودة هنا .

أنا رح افسر الكلمات وأشرحها شطر شطر, وكمان بشكل تجريدي لو لزم الأمر. الأغنية كالعادة مليانة مصادر لأشياء بالفن والسينما والميثولوجيا الإغريقية القديمة وعالم الموضة وغيرها, كالعادة تايونغ بيحب كتير يرمي مصادر وتلميحات وهالشي بيدل عثقافته العالية, بحب هالشي فيه لأن رح يجبر الجيل الجديد يقرأ أكتر ويبحث ويطلع ليفهم عن شو بيحكي, ومتل ما بيقول روبول تشارلز: Educate the children honey!

بداية المقدمة-صوت الإذاعة: هي من خبر صحفي إذاعي بيكون عم يحكي عن عودة مارلين مونرو من نيويورك للوس أنجلوس بعد سنين غياب, وإنها جاوبت على أسئلة كل الصحفيين. هي الجزئية مهمة لأن مارلين مونرو تزوجت أكثر من مرة وأحد أزواجها كان بده اياها تترك الفن, فهذا الغياب والعودة حصلوا بعد زواج وطلاق, رح نشوف أكثر شو علاقة هالشي بأغنية تايونغ لما رح يحكي عن العاشق ومنافسيه على قلب حبيبته بالمقاطع التالية.

خلينا نبدأ بأول مصدر بالأغنية واللي هو اسم الأغنية تحديداً, للي ما بيعرف, مارلين مونرو هي ممثلة, عارضة ومغنية أميركية, وكانت تعتبر أيقونة الجمال والأنوثة ورمز للإغراء بالخمسينيات, ولحد اليوم مارلين هي إحدى أيقونات الجمال الكلاسيكي لهوليوود القديمة, مارلين عاشت حياة قاسية وقصيرة بالرغم من كل الشهرة والنجاح اللي حققته, وكانت حياتها مثيرة للجدل لأنها كانت مقربة من كثير سياسيين من جهة, ولأن غيرت مفاهيم بالجمال وبالموضة بأسلوبها وطبيعتها, مارلين كانت تطلع بتياب البحر حتى لو طالعلها كرش مثلاً. هالشي فيه تحدي للصورة المثالية اللي بتنطلب من النساء يكونوا عليها وخاصة المشاهير, إضافة لأنها كانت أول من روّج لموضة صبغ الشعر لغرض جمال وموضة بحت, مش لتغطية الشعر الأبيض مثلاً.كونها مش شقراء أساساً بل شعرها الطبيعي بني غامق, فهمتوا عليي؟ ابحثوا عنها أكثر بتعرفوا معلومات أكثر. بتخيل تايونغ اختار مارلين لتكون الRole model لحبيبته بالأغنية. هالشي واضح هنا وبالتيزرز وبكل التفاصيل القادمة.

المقطع الأول -بيكيهون : السجائر هنا فيها مصدر لمارلين هي كانت مدخنة, مع هيك هو عم يحكي عن حاله, عم يحكي كيف اكتشف إنه واقع بالحب, وجهه حيادي, أفكاره عم تتغير وكأن عقله مساحة كثيفة مثل دخان السيجارة (مش مذكور هالتشبيه مباشرة بس إذا بتربطوها مع وجود السجائر بنفس المقطع بتحصلوا هالمعنى, ذكرته لأن وعدت اشرح كل المعاني الممكنة).

بيحكي بهذا المقطع كيف بيضعف فجأة أمام حبيبته و إنه هو محتار فيها ما عم يقدر يفهم شو هي (إختيار مارلين لتكون ممثل حبيبته هنا ذكي جداً, لأن ما حدا كان يفهم مارلين أبداً! برجها الجوزاء بالمناسبة).

بخلفية المقطع الموسيقية ضافوا صوت نفخ سجائر ليزيدوا واقعية المشهد. رح نحكي بالمقطع القادم بشكل مفصل عن الواقعية اللي بمقاطع بيكهيون والخيال والفانتازي بمقاطع تايونغ. بنفس الوقت حافظوا على تأثير الLo-Fi والصدى بهذا المقطع ليدخلوكم بحالة الحلم, بتحسوا عم تسمعوا صوت بيكيهون بهذا المقطع متل كأن طالع من Headphone أو إذاعة! لبعدا بس دخلتوا بالحلم بيطلع صوت تايونغ بالمقطع اللي بعده بالتسجيل الصافي تبع الاستديو بجودته العالية, وبيبتدي الصراع الشيق ومسرحية المونودراما (مسرحية بطولة شخص واحد) اللي عاملها تايونغ بكلمات وألحان هالأغنية.

المقطع الثاني -تايونغ: بيبتدي المقطع بكلمة Love! هيك بيقولها بكل توكيد وسهولة وسخرية ولا مبالاة, وإذا انتبهتوا بمقطع بيكهيون بيقول Maybe I'm falling in Love وتايونغ عمل هالشطر بالإنكليزي لحتى تنتبهوا اله, بتحسوا تايونغ عم يجاوب بيكهيون هنا, إنه انت محتار إذا هذا حب؟ طيب هذا حب!

رح أغمق أكثر بالصورة الفنية العامة للأغنية مع جو الموسيقى وكيف الألحان مكتوبة بما إن الموسيقى اختصاصي, بتخيل إن تايونغ وبيكيهون بيمثلوا شخص واحد بالاغنية اللي هو العاشق بطل هالمسرحية المونودرامية, بيكهيون هو خطاب عقله الواعي وتايونغ هو خطاب عقله الباطن أو اللاواعي, طريقة ترتيب المقاطع مع كلمات الأغاني وفرق النقلات الموسيقية بين مقاطع تايونغ ومقاطع بيكهيون بيعطي هالإحساس. إضافة لأن رح نشوف لاحقاً إن مقاطع بيكهيون فيها تركيز كبير بالكلمات على أمور واقعية (العقل الواعي), بينما مقاطع تايونغ مرتبطة أكثر بالميثولوجيا والوهم والخيال والأحلام والفانتازيا (العقل الباطن).

تايونغ كتب كلمات الأغنية كاملة بهذا الشكل وهالتوزيع لحتى يخلق هي الصورة, وشي جميل إنه موسيقياً مقدم الإثنين بشكل مختلف عن بعض يعني خطاب العقل الواعي فوكالز بنقلات موسيقية مختلفة وصوت مغني مختلف, وخطاب العقل الباطن راب بصوت فنان مختلف كمان ونقلات موسيقية مختلفة, الهدف يحطكم ضمن الhead space تبع العاشق اللي كتب كلمات هالأغنية ويفصلكم عالمين مختلفين ما بين أحلامه وأوهامه عن الحب وما بين الواقع اللي عم يعيشه مع الحب. كان فيه يغنيها فوكال مثل ما عمل مع Blue مثلاً بس تقصد يكون راب عشان يعطي خطاب العقل الباطن شخصية مختلفة. كالعادة عبقري! وعلى فكرة تايونغ بلايف اليوم سمعنا جزء من نسخة من الأغنية نفسها مسجل فيها مقاطع الفوكال بصوته, بتخيل بالحالتين رح يضلوا شخصيتين مختلفتين بداخل شخص واحد (العاشق) بسبب فكرة اختلاف الراب والفوكال من جهة إضافة للتفاصيل الموسيقية الأخرى بالأغنية, بس مع هيك إختيار بيكهيون للتعاون معاه هنا ذكي جداً لأن رح يزيد الاختلاف وجود صوت ثاني بالاغنية معاه, إضافة لأن الفانز من زمان ناطرين هيك تعاون فإجى بوقته, وبأغنية صح كون الجاز بيلبق للاثنين كتير.

شوفوا كل هذا ولساتنا بس عم نشرح كلمة وحدة وبس love! بس لأن وجودها ببداية مقطعه وربطها بالسؤال عن الوقوع بالحب بمقطع بيكهيون مش عشوائي أبداً. بمقطع بيكيهون شفنا شخص لسا بيكتشف وقوعه بالحب وضعفه أمام حبيبته. هون رح نشوف بمقطع تايونغ العكس تماماً! مرة تانية الإزدواجية والانفصامية اللي عند تايونغ وكلنا منعرفها, بتلاقوه عالمسرح شي وبالحياة الواقعية شي ثاني, وهون عقله الباطن شي وعقله الواعي شي ثاني. الأغنية آخذة طابع مسرحية وحوار بين العقل الباطن والعقل الواعي لنفس الشخص العاشق, والصراع والتناقض اللي بينهم. (مش غريب اختار شخصية برجها الجوزاء مثل مارلين مونرو هههههه)

بهذا المقطع رح بتشوفوا بيقلها بشكل مباشر بس اعطيني إشارة وأنا مستعد كون سيجارتك! أعطيني وقتك! كناية عن إستعداده ليحترق بحبها حتى لو ببطئ. صورة شعرية بتجنن! وبنفس الوقت عم يأكدلها إن ما عنده أي شي معاه إلا الوقت, والوقت هو أثمن ما تعطي لأي شخص, صح؟ شبهها بذهب وألماس تيفاني, وهنا عنا مصدر جديد من عالم الأزياء والموضة هالمرة, لمجوهرات تيفاني العريقة, بعدها قال عن حبيبته أو إنت وردة من الذهب الأبيض, القصد هنا أيضاً الحيرة بأمرها, سواء كانت شبه أعرق المجوهرات أو شبه قطعة فنية أنتيكا مش معروف مين صانعها, هي ثمينة بنظره وفائقة الجمال. بيقول لحبيبته إنها مارلين مونرو خاصته, يعني رمز الأنوثة والإغراء والجمال, مش رمز بل أيقونة حتى.

بيوصفها بإنها فينوس, وفينوس هي أفروديت آلهة الحب والأنوثة والفن والجمال والخصوبة بالميثولوجيا الإغريقية, اللي كان عندها عدد هائل من العشاق. بنفس الوقت تايونغ بيقول عن نفسه إنه هو أبولو, وأبولو بالميثولوجيا الإغريقية هو أحد آلهة الإبداع! حامي الموسيقى والرقص تحديداً! تايونغ بيشوف نفسه هيك. ايضاً أبولو هو إله الصحة والإشراق والنور.

لكن لحظة, بنفس الوقت أبولو هو أحد الآلهة الذكور القلال بالميثولوجيا اليونانية اللي انذكروا على إنهم بتول وأبولو ولا مرة مارس الحب مع أفروديت اللي هي نفسها فينوس. شرحت هي النقطة الآن لأن رح ينذكر لاحقاً بالاغنية أشهر عشيق لفينوس واللي هو مارس, لذلك مهم تفهموا شو وضع أبولو بالنسبة لفينوس من الآن لتقدروا تفهموا القادم لاحقاً.

بيوصف دخولها لقلبه ووجودها بالحياة بعدها بالصاعقة اللي هزت كيانه وهزت ذوقه واختياراته جميعاً, ليش؟ لأن أبولو كان عنده توأم اسمها آرتيميس هي الآلهة الأنثى الوحيدة اللي ارتبط اسم أبولو فيها, وهي آلهة الطبيعة والصيد والحيوانات. وهنا بالاغنية منشوف أبولو وقع بحب آلهة الجمال والأنوثة أفروديت اللي هي فينوس. هالشي هز الشائع والمتوقع بالنسبة إله.

بيوصف حبه إلها بالنار, بيقول مرة ثانية أنا بدي أكون نارك, بده يحترق ويشتعل بحبها. بيوصفها بإنها سيدته, شفنا بأغاني تايونغ اللي كتبها لNCT عن الحب من قبل هالجانب اللي عنده بإظهار الضعف والخضوع للي بيحبه على إنه قوة, جميل!

بتسمعوا شوي من صوت بيكهيون بخلفية هالمقطع, شوي صغيرة مش كتير, هذا بس ليحسسكم إن دخل العاشق بوعيه ولا وعيه معاً بحالة الحلم فعلاً, وابتدأ الحوار بينه وبين نفسه.

اللازمة-تايونغ وبيكهيون: عم يشجع حبيبته تحرقه بحبها, ومن بعدها مرة ثانية منشوف الجانب الضعيف عنده, بيقلها كالعادة وكالمتوقع ما قدرت اتحمل هالنار, أمامك أنا بشتكي من لهيب الحب, هذا هو الحب! مرة تانية بهي الكلمات شفنا الجانب الضعيف اللي ما بيخاف يظهره. وبهذا الجزء منشوف بيكهيون عم يغني شوي مع تايونغ وخاصة مقطع burn burn كناية عن رغبة العاشق بعقله الواعي اللي بيمثله بيكهيون بهي الأغنية إنه فعلاً يندفع بجنون عالحب مثل ما عقله الباطن أو اللاواعي عم يعمل اللي بيمثله تايونغ. والهاي نوتس بالخلفية بصوت بيكهيون بتزيد إحساس إندماج الععاشق بعقله الواعي برغبة العقل الباطن إنه فعلاً يحترق بهالحب بجنون, وبعدا بيكهيون هو اللي بيعترف وبيقول إن مش قادر يحتمل نار الحب وبيستسلم للحبيبة وبيشتكي الها من نار الحب, وبيرد عليه العقل الباطن تايونغ بThis is love! بمعنى إنه اقتنعت وأخيراً إنه هذا حب؟

جسر الأغنية الأساسي-تايونغ: قلتلكم قبل هي الأغنية مسرحية مونودراما (يعني بطولة شخص واحد) وهذا المقطع تحديداً -على بساطته- هو أحد مشاهد الذروة فيها! رح تشوفوا كيف.

حكيتلكم قبل إن مقاطع بيكهيون فيها تركيز عالواقعية بالكلمات بينما مقاطع تايونغ فيها تركيز عالأحلام والخيال, طيب بهذا المقطع ما في شي خيالي أو فانتازي! عم يقول إنه بيحب شعرها الأشقر, عيونها الودودة, حركة شفاهها الخرقاء (بيوصف مارلين مونرو حرفياً), بعدها بيقول أنا مجنون بهذا الحب. لحد الآن كل التفاصيل واقعية, ما في ولا شي من عالم الفانتازي أو الخيال, لحد ما بيقول بآخر جسر الأغنية Wake Up! استيقظ! شو معنى هالشي؟ هذا المقطع كان حلم, عم يحكي عن أحلامه, كيف عقله الواعي بيشوفها بأحلامه. ولأن تايونغ هنا دوره هو العقل الباطن المرتبط بالأحلام أخذ هذا المقطع ولو إن الحلم واقعي, لكن لاحظوا بالآخر الجدل بين العالمين كيف انحسم بكلمة استيقظ! بنهاية المقطع! لأن رح نشوف بعدين كيف لاوعي بطل هالمسرحية عم يحاول يسيطر على وعيه والعكس, لحد ما يلاقوله حل مع هالحب. أنا صدقاً مبهورة بكمية الفن اللي هون, واللي بينتبه عالإيقاع, الانتقالات الموسيقية الغير عشوائية أبداً بكل مقطع, وإن هي الكلمات هي جسر الأغنية بيلاحظ بشكل جيد إن كل هذا مرتب بطريقة عبقرية. لصنع مشهد مونودرامي ولا أروع بأغنية أطول بشوي من ثلاث دقائق! كمان ارجعوا للمقطع الأول تبع بيكيهون, الصوت والتأثير الLo-Fi مع الصدى! بالضبط! رجع تايونغ استخدمه هنا ليأكدلكم إنه هالجزء حلم, وصار يرجع جودة الصوت بشكل تدريجي إذا انتبهتوا. إبداع!

المقطع الثالث-بيكهيون: بهذا المقطع بيبتدي بجملة أنت مجنونة, والمثير للاهتمام إن بمقطع تايونغ كان تايونغ بقول عن نفسه كعاشق إنه هو المجنون! لاحظتوا الفكرة نفسها اللي صارت بين المقطعين الأول والثاني؟ سؤال من الوعي جواب من اللاوعي. وهنا الحوار بالعكس, اللاين هذا بالكوري كان بكلا المقطعين لكن تضمن توكيد Yeah بالمرتين. وصوت بيكهيون هنا كان بالجودة العالية, بدليل دخوله بالحالة ومواجهة العقل الواعي للعقل اللاواعي. العقل اللاوعي للعاشق اللي آخذ دوره تايونغ لاحظنا إنه عاشق مجنون, ما عنده مشكلة يظهر ضعفه أمام حبيبته, ما عنده مشكلة يظهر إندفاعه تجاهها. لكن العقل الواعي انتبهنا إنه كان متردد من البداية وعم يقول يمكن هذا حب. بجسر الأغنية تايونغ قال عن نفسه إنه عم يجن بحبها, لكن ببداية مقطع بيكهيون أنكر هالشي وقال لأ هي المجنونة.

باللاينز القادمة منشوفه عم يغازل بواقعية وخجل, عكس مقاطع تايونغ تماماً, بيقول عنها إنها مشهورة بكل محطات التلفاز, وإنها عم تلبس Burberry ماركته المفضلة وإن لابقتلها جداً وطالعة حلوة فيها, مرة ثانية مصدر من عالم الموضة! دار الأزياء البريطانية العريقة بيربري ( مين سفير بيربري؟ بيكهيون! 😜 مين اللي رح يرتفع سعره ببيربري اليوم ويتمددله العقد؟ بيكهيون! 😜طيب مين أذكى ولد بيلاقي أذكى طريقة يدعم فيها الهيونغ بشكل غير مباشر؟ تايونغ! 😜).

لاحظوا بهالمقطع, الحديث واقعي, الغزل كتير ودود وخجول, عم يلاقي سبب يغازلها (ماركة بيربري بتلبقلك وإنت حلوة فيها) أو يفتح حديث ودود معها (أوه شايف إنك لابسة بيربري! ماركتي المفضلة). هالشي ما شفناه بمقاطع تايونغ اللي واضح كان فيها الاندفاع.

ومرة تانية بهني تايونغ على ذكاؤه بدعم بيكهيون كسفير بيربري بشكل غير مباشر, استخدم لاين بالإنكليزي قصداً I see you wearing Burberry.

المقطع الرابع-تايونغ: هذا المقطع مليان فانتازيا وحماس! شفنا بالمقاطع السابقة إن الحبيبة مارلين مونرو مشهورة وهي مثل فينوس آلهة الحب والجمال الكل بينجذب الها, بهذا المقطع أبولو بيتحد مع توأمه الانثى آلهة الصيد والحيوانات آرتيميس وبيوصف كل الرجال اللي حول حبيبته بالذئاب, وإنهم مهووسين حتى بصورة الها, لكن هو بداخله روح الصياد, هو مش بس صياد بل مفترس! رح يفرجيها كيف هدول الذئاب هم مجرد جراء صغيرة لا يمكن يعملوا أي شي متل ما هو بيعمله, لأن طبعاً هو أبولو إله الموسيقى والرقص والإشراق والنور وأحد حماة الإبداع! لفت نظري بهالمقطع استخدام اللاينز تبع الصياد والمفترس وتبع الجراء بالإنكليزية, هالشي فيه لعب عالكلام وتلميح جريء جداً لبعض أشكال الولع بالحب من الناحية الجنسية, واعذروني عن شرحه بشكل مفصل لأن بخاف يكونوا بعض القراء صغار بالعمر, لكن عموماً منعرف تايونغ كتب من قبل أغاني جريئة جداً بهالخصوص (وقال إنه كاتبهم عن أخته..احم!! 😂 ).

الجسر الثانوي-تايونغ وبيكهيون: هذا الجسر مهم جداً ولو إنه هو عبارة عن جملة وحدة بتتكرر أربع مرات: دوم دوم مارس دوم أو دونغ دونغ مارس دونغ. لكن أهمية هذا المقطع بتتجلى بإنه فيه إحدى الذروات العليا للحوار وفيه نقطة حسم. أول شي ذكرنا إن مارس إله الحرب والذكورة والجنس والغضب رح ينذكر بالأغنية, مارس هو أحد أشهر عشاق فينوس بالميثولوجيا, وهو اسم الإله الذكر الأكثر ارتباطاً بإسمها. وذكرنا قبل إن أبولو اللي بيمثله العاشق هو إله بتول ما ممارس الحب مع أفروديت أو فينوس أو غيرها من قبل.

طيب هالمقطع هون كلمة دوم/دونغ معناها الحرفي بيترجم "خطوة". يعني هون ممكن نفهم إن العقل الباطن بيشجع مارس اللي داخل العاشق يطلع ويقاتل عشان فينوس. وكمان نفس الكلمة -بحسب أصدقائي الكوريين- تستخدم للسخرية من حدا والتقليل من شأنه, مثل وصف لمارس إنه أبله أو أحمق, مرة ثانية اللعب الجميل على الكلمات بأغاني تايونغ! لذلك ممكن القصد هنا عشاق فينوس بيحاول أبولو يهينهم بالرغم من فحولتهم ورجولتهم وقوتهم وكل شي فيهم. كلا المعاني بتنطبق. لكن المثير هنا إن اللي ابتدى الجملة كان تايونغ, وكررها وراه بيكيهون بانقياد, هيك بصوت شخص منوم مغناطيسياً, ورجع تايونغ كررها مرتين بعده الأخيرة منهم كانت همس. معنى هالشي إن اللاوعي ابتدأ يشجع العاشق بعقله الواعي ليقرب أكثر ويطلع مارس اللي جواه ويحارب على موقعه بقلب حبيبته, أو لحتى فعلاً يهين عشاقها الذئاب ويحولهم لجراء ويفوز فيها بالأخير.

والغرض من الهمس هو إن يطلعك من حالة الأصوات اللي برأس العاشق, لعالم الواقع. عبقري!

المقطع الأخير-تايونغ وبيكهيون: رجعنا للواقع وطلعنا من الhead space تبع العاشق, هون بيفتتح المقطع تايونغ وهالمرة عم يغني فوكال مش راب ولسا عم يظهر الجانب الضعيف الخاضع فيه للحب, بيقول I count one, two, three, a lot of reasons, take care of my feelings my Venus. هالشطر انعمل بالإنكليزي قصداً لتنتبهوا عليه, واي نعم هذا الشطر غناء تايونغ, لاحظتوا كيف توحدت مشاعر العقل الواعي والعقل اللاواعي؟ العقل اللاواعي اللي بيمثله تايونغ هون ظهر بدوره بأداء فوكالز لجتى يفرجيكم الاختلاف اللي حصل من بعد الصراع, كان فيه يخلي بيكهيون يغنيه بداله, بس تقصد هو يغنيه عشان يفرجيكم الفرق اللي صار والتطور اللي حصل على شخصيته بهالمسرحية, خف الاندفاع شوي وصار في عقلانية (بيقلها عددت أسباب هالحب), مع هيك ضل الخضوع والضعف والاستسلام موجودين (اعتني بمشاعري يا فينوسي). بعدها بيكهيون بيرجعنا للواقعية الأصلية وبيتخذ خطوة فعلية تجاه الحبيبة, بيقلها طالما هالمكان رح يغلق أبوابه وعطرك عباه أنا رح أخذك معي وارحل! (نهاية سعيدة لصراع الأفكار هذا, فعلاً هيك لما منحب بيصير فينا).

بنهاية هالمقطع منرجع للازمة وبعدها خاتمة بصوت تايونغ كلها burn burn وإنه هو والحبيبة عم يحترقوا بسعادة بهذا الحب!

وهيك منسدل ستار المسرح! تصفيق! النهاية! D:

شو رأيكم بهالمقال؟ بالأغنية؟ وبالسلسلة؟ شاركوني بالتعليقات, لو حبيتوا احكي عن غير أغاني خبروني كمان. ورجاءً إذا حبيتوا تشاركوا المقال شاركوه من المدونة أصلاً لأن أخذ مجهود كبير بالعمل عليه. شكراً لتفهمكم. 💚💚💚

Lama🦋