EXO (General Vocal Shadowing)- نظرة عامة وشاملة على أصوات إكسو

عن هي السلسلة:

مرحباً جميعاً!

-هي سلسلة جديدة رح اعمل فيها Shadowing عام لأصوات أعضاء فرقة معينة (الجميع دون استثناء فوكال لاين وراب لاين), على عكس سلسلة تحليل الصوت اللي بحلل فيها صوت عضو واحد فقط بالتفصيل الممل, هي السلسلة رح تتضمن نظرة عامة وسريعة على كل الاصوات اللي بالفرقة, رح احكي فيها عن نوع الصوت وطابعه وشوية تصنيفات بالصوت إضافة لما هو الpotential اللي عند هالعضو كفوكالز سواء حالياً ولا بالمستقبل.

ما رح نحكي عن مساحة الصوت هون ولا رح نحكي كتير بالتكنيك أو نقاط القوة والضعف لأن هي الأمور لنحكي عنها بدقة ولنطلع مساحة صوت شخص معين لازم نسمع تاريخه الغنائي كله. ولنشوف تكنيكه لازم نسمعه مسجل ولايف اكتر من مرة ونشوف الفرق, ولأن هي سلسلة يفترض ما تكون المقالات فيها طويلة كتير من جهة, ولأن هي الأمور حابة اتركها بتحليلات الصوت الشاملة من جهة أخرى.

-ممكن تلاقوني ذاكرة الصوت المفضل عندي بالفرقة, لكن هذا لا يعني إنه أفضل مغني بالفرقة بالضرورة (أنا موضوعية).

-إذا كان تحليل صوت عضو معين متوفر ومنشور على المدونة قبل, رح تلاقوا اسمه مربوط برابط ياخذكم لمقال مفصل عن تحليل صوته, رح حدث هي القوائم دورياً كل ما نزلت تحليل صوت جديد واربط الأسماء فيها.

-أخيراً: هي المقالات بتاخذ جهد, من فضلكم لا تنقلوها بشكل عشوائي, لو حبيتوا تشاركوا, شاركوها من المدونة حصراً.

استمتعوا وشكراً جزيلاً💖

نظرة عامة عن أصوات إكسو 🤍 :

بدايةً لازم قول شي, أنا مش اكسوال حالياً, ما في بالعادة قول من أي فاندومز أنا أو إذا أنا من هالفاندوم أو لا على هي المدونة, بس حسيت هي المعلومة مهمة تنقال هالمرة منشان شو ما حكيت ما حدا يفكر إني عم طبل لمفضليني أو لفرقتي.

من جديد عم اسمع إكسو وبصراحة الكل الكل دون استثناء أصواتهم رائعة ومغنيين جيدين جداً بمرونة غنائية عالية ولافتة للغاية.

إكسو فيها تنوع صوتي كبير وحلو كتير, متل أغلب فرق الكيبوب فيها غالبية تينور, في بالفرقة أربعة أصوات باريتون وكتير مختلفين عن بعض (تموضع منخفض ومتوسط ومرتفع) فشاملين جميع تموضعات الباريتون عندهم, حتى أصوات التينور فيها تنوع كبير كتير وتقريباً شاملة كل التموضعات,هي لحد الآن فرقة الكيبوب اللي فيها أعلى عدد من الاعضاء اللي ممكن يسطع نجمهم برا الكيبوب أكتر (علماً إنهم ناجحين بموسيقى البوب كتير) لكن القصد إنهم أصوات Well rounded لدرجة إن عندهم قدرة يغنوا أي شي تاني غير البوب ويسطعوا فيه لسا أكتر بكتير من البوب, شيء تاني اكسو فيها يمكن عدد كبير من المغنيين الUnderrated بشكل! رح نشوف تفاصيل أكتر تحت.

أنا مجهزة مفاجأة للإكسوال بهالتقرير, وهي إني قررت اشمل الكل ال12 دون استثناء, بعرف في ثلاثة أعضاء تركوا الفرقة بكير, بس بحثت عنهم وسمعتهم وحدهم وقدرت اطلع بمادة كافية لتساعدني اكتب شي عنهم.

الأعضاء رح تلاقوهم مرتبين حسب العمر من الأكبر:

-شيومين❄️:

منرحب بأول فوكاليست Underrated بالفرقة, لا تضحكوا بس قبل ما اسمع إكسو واتعرف على الفرقة ككل, أنا سمعانة قبل صوت شيومين بأغنية لSM Station متعاون فيها مع مارك من NCT اسم الأغنية Young and Free, الأغنية كتير Jazzy وجميلة, وأنا وقت سمعتها ما كنت بعرف موقع شيومين مع إكسو أبداً, فكرت وقتها إن شيومين فوكاليست أساسي! ولما سمعته مع إكسو انصدمت لأن بالكاد بياخد مقاطع مقارنة بغيره وموقعه بحسب بروفايل الفرقة فوكاليست ثانوي! لكن صدقوني الولد صوته فيه أكتر بكتير من هيك! شيومين صوت تينور بتموضع متوسط مع Low register لافت جداً لصوت بهيك تصنيف لهيك بنسخة Mama الصينية كان آخد نفس لاين تشانيول بظن مع إن تشانيول صوته باريتون.

صح صوته صاير سوفت كتير بس فيه عمق ورخم حلو كتير وطابع هيك كتير لطيف وهادي بيخليه مناسب كتير للمسرح (القاء وغناء), البالاد السول والفانك والريغي والجاز كمان, بيقدر يلعب شوي صغيرة بجرحة صوته لحد جيد ويخشنه شوي هالشي بيخليه قادر يغني روك لدرجة معينة (في عالم بتغني روك أحسن منه بالفرقة بالمناسبة) وبتخيل صوته بيطلع حلو بالتروت (ما سمعته بس مجرد تصور). مع إنه صوته صاير سوفت وهادي بس صوته كبير بالمناسبة وفيه حجم حلو لهيك بتلاقوه عم ياخد عروض مسرحية كتير وعموماً صوته بيسطع برا البوب كتير بأنواع موسيقى تانية.

بأي فرقة تانية غير إكسو شيومين بكل سهولة بيكون Main Vocalist بهالحنجرة الWell rounded اللي عنده, لكن حظه للأسف إجى بفرقة متل إكسو فيها مغنيين كتير أقوياء بأصوات جداً رائعة لدرجة إنه مش كافي تكون جيد جداً لممتاز لحتى تصير Main Vocalist, لازم تكون نوعاً ما خارق للعادة ( رح نحكي عن هالشي بس نوصل للمغنيين الأساسيين بالفرقة).

المهم, شيومين من الأصوات اللي بحبا بالفرقة, يمكن هو تاني أو تالت أكتر صوت بحبه (كخامة وطابع).

-لوهان⚙️ :

لوهان خسارة مدللة للSM, صوته فيه كل شي بتحبه الSM باختصار! صوت تينور خفيف بتموضع متوسط لمرتفع بس فيه حجم وقوة, بيمشي منيح بالبوب وبغير موسيقى, بتخيل هو الوحيد أو أكتر واحد بالفرقة اللي بقدر قول عنه بيلبقله يغني بوب أكتر شي, مع هيك لا حدا يستهين بمرونته الغنائية لأن بيغني بالاد حلو كتير, الكترو حلو كتير وهيب هوب وR&B حلو كتير وصوته مناسب جداً للموسيقى التجارية المناسبة للإعلانات وعروض الأزياء والعروض الترويجية والبوب الحديث والبوب الغربي. بس عموماً طبيعة صوته وستايل غناؤه هو ستايل بوب ستار مع طابع صوته المشرق والمنسق بشكل طبيعي (ما بيعذب بالشغل عليه بالاستديو) الSM كتير بتحب هالنوع من المغنيين, وموقعه بالفرقة سابقاً كLead vocalist جيد ومعقول جداً لأمكانياته الصوتية وممكن نتفهم ليش الSM اختارته بهيك موقع بدل شيومين لأن لوهان ببساطة بيغني بوب أفضل شوي من شيومين .

وأنا ببحث عنه انتبهت إنه صوته كتير ثابت عالمسرح وكتير بيتحكم بنفسه حلو, بفرقة تانية بتخيل بيضل بنفس الموقع إلا إذا كانت فرقة بوب حصرياً بإمكانيات شوي أقل أو فرقة برا الSM.

سلبية وحيدة, ما حسيت فرق مستواه كتير عن أيام الترسيم, لهيك بتخيل إنه ما عم يتمرن كتير أو بشكل منتظم, بس عموماً هو مغني شاطر كتير.

المهم ادعموا لوهان بيستاهل لقيتله أغاني سولو حلوة كتير بتلاقوا أغانيه على قناة RF ENTERTAINMENT وهي أكتر أغنية حبيتها Skin to Skin, كمان بتلاقوا أغانيه على قناة LuHan Studio.

-كريس🐉:

رحبوا بتاني خسارة كبيرة ومدللة للSM, أو ما بعرف إذا الSM وعيت لحجم هالخسارة قبل ما يرسموا NCT ورح اشرحلكم ليش.

كريس صوت باريتون خفيف ذو تموضع مرتفع شوي لباريتون بيخليه قادر يغني أغاني المكتوبة لصوت التينور بشكل حلو وبنفس الوقت بيقدر يغني أغاني الباريتون بشكل حلو, لسا ما سمعته كتير لحدد شو الRange تبع صوته بس بقدر قلكم إنه Range حلو وجيد يعني بصوته في مساحة (للي ما بيعرف هاد الولد كان رابر أساسي وموقعه بالفوكال لاين ثانوي جداً) مع هيك صدقوا أو لا تصدقوا هو مغني جيد جداً عفكرة, وغنى كتير أوستات للمسلسلات والأفلام اللي مثل فيها إضافة للأغاني اللي بينتجها بنفسه.

صوته باريتون بس خفيف وفيه طابع مشرق (لما بده) وبيعرف يخشنه كمان وقت يلزم, بس عالعموم صوته عميق وخشن, صوت إذاعي ومسرحي فمناسب جداً لرابر, وقت يغني هيب هوب (وهاد أكتر لون بيلبق لصوته) بيحط مزيج من صوت الصدر والحلق سوا, كتير مختلف عن التكنيك اللي بيستعمله وقت بيغني بأوستات المسلسلات ولفت نظري هالشي فحبيت احكي عنه, طور تكنيكه الخاص بالغناء اللي بيزبط عصوته إضافة لأن بينوع كتير بالتكنيكات هالشي كتير واضح وقدرت لاحظه بس بعد ما سمعت أغنيتين, لهيك متحمسة اسمعه لسا أكتر لشوف شو بيطلع معه.

مرونته الغنائية فاجأتني بصراحة, كل صوته فاجأني ما بكذب, وقت سمعته مع إكسو كان بس راب وما في هالشي اللي بيظهر مؤهلاته الصوتية كفوكاليست. صوته بيميل أكتر للهيب هوب بس بينجح بغير شغلات بشكل لافت جداً, وبيزبط بالبوب الغربي كتير وبالموسيقى التجارية, وبيغني بالاد حلو كتير حتى يمكن ما حدا منكم كان متخيل هالشي. ولازم قول إنه بين الثلاثي الصيني اللي تركوا الفرقة هو أكتر واحد أظهر فرق بالمستوى وتطور بالصوت من أيام الترسيم لليوم, فرق شاسع جداً.

بتخيل كريس بوكالة غير الSM كان رح يسطع نجمه أكتر ويتعامل معاملة أفضل, ستايل صوته والأداء تبعه كتير بتحبه YG لهيك بتخيل لو كان هونيك ممكن ينجح كتير. حالياً SM بعد ترسيم NCT عم تتجه كتير باتجاه إنتاج أغاني بتشبه وبتناسب ستايل كريس, حتى NCT نفسها فيها أكتر من عضو عندهم طبيعة صوت وستايل مشابه فبتخيل SM يمكن عم يلطموا بصمت بعد ما راح.

المهم ادعموا كريس كمان أغانيه بتلاقوها بهي القناة Kris Wu وبنصح بشدة تسمعوا November Rain. وبالمرة اسمعوا هالأوست بصوته لتشوفوا الفرق بين جو الأغنيتين والمرونة الغنائية اللي ما حدا منكم بظن كان متخيلها عنده أو متوقع تطلع منه.

-سوهو 🌊 :

تاني صوت Underrated بالفرقة وكتير Underrated كمان! سوهو صوت تينور بتموضع متوسط لمرتفع خفيف وحلو كتير وطبيعة صوته متل لوهان بتحبها الSM كتير. الفرق بينه وبين لوهان هو تكنيك أفضل ومرونة غنائية أعلى وعنده خامة (برأيي أجمل, هي النقطة الوحيدة اللي بقول عنها برأيي لأن خامة الصوت أذواق بس التكنيك والمرونة هي ما فيها أذواق).

سوهو عنده يمكن واحد من أحلى الVibrato بالفرقة كلها! بيخلي صوته يبين كبير كتير وهالشي ما بتقدروا للأسف دائماً تلاحظوه بأغاني إكسو, بس اسمعوه سولو ورح تشوفوا, صوته مسرحي بيناسب المسرح الموسيقي (غنائياً وإلقاء) وما بعرف بصراحة إذا شارك بمسرحيات بس بيلبقله جداً, كمان بيلبق للجاز والروك والسول والفانك والبوب وكتير أنواع موسيقى, مرونة غنائية جداً لافتة وعالية وحلوة, حنجرته وصوته كتير Well rounded تقريباً كل Register بصوته جيد جداً ومتمكن منهم كلهم غير إنو خامة صوته كتير حلوة.

بفرقة تانية سوهو بسهولة بيكون Main vocalist بس متل شيومين حظه إجى بإكسو حيث مش كافي بين هالمجموعة تكون جيد جداً لممتاز لتكون المغني الأساسي, لازم تكون شوي خارق للعادة, موقعه مع إكسو Lead vocalist بعتبره موقع جيد اله مع إكسو ولكن غير كافي لقدراته الغنائية والصوتية ككل لأن هو أفضل بكتير من هيك.

-لاي 🦄 :

تالت صوت Underrated بالفرقة, عنده خامة حلوة كتير كتير وبتلبق لستايل شايني, لو مقدم عالSM قبل ترسيم شايني يمكن كانوا حطوه معاهم, كمان صوت تينور بتموضع متوسط لمرتفع (أقرب للمرتفع حتى) خفيف مع باور عالي وطابع مشرق جداً, صوته بيلبق للR&B كتير وبيطلع حلو ببعض أنواع الجاز والسول والفانك وكمان بالموسيقى الريترو والديسكو والبوب الغربي والموسيقى التجارية وبعض أنواع المسرح.

نوعية صوته من النوعيات اللي بتحبها الSM كتير أصوات تينور رفيعة, اللافت إنه بالرغم من إن صوته رفيع بس بالlow register تبع صوته بيغني بطابع فيه عمق شوي ولما بيطلع بصوته بيقلب مشرق ورفيع أكتر. صوته فيه كاراكتر شوي وإذاعي ومسرحي بتخيل بينجح كرابر كمان بهيك تصنيفات. عنده صوت رأس مميز كمان وبيعرف يدمج مع الصدر وقت بيلزم.

موقعه مع إكسو ما كتير عاطيه حقه بس بفرقة تانية بتخيل يضل Lead vocalist إذا كان بالSM إلا إذا كان بفرقة أصغر وأقل عدد وبغير وكالة ممكن يحطوه Main vocalist. بتخيل بيسطع نجمه أكتر بفرقة أصغر أو سولو لأن إكسو ما عم يتبنوا أنواع أغاني تناسبه كتير وتبرز صوته مقارنة بالباقيين.

عفكرة عنده تحكم بالنفس خرافي, وسمعت بيغني أوبرا صينية, وحسب ما قالولي أصدقاء إكسوال إنه هو صاحب أعلى هاينوت بالفرقة, فتموضع صوته المرتفع بيساعده إضافة لكونه راقص عنده تحكم بالنفس أفضل من الباقيين.

-بيكهيون☀️ :

وصلنا للفوكاليست الأساسيين أو اللاين الخارق للعادة بما إن الفرقة فيها كتير أصوات عندها مؤهلات فوكاليست أساسي.

بيكهيون من الأصوات المفضلة عندي بالفرقة وبالكيبوب, أول مرة سمعت بيكهيون بشكل واضح كانت بأغنية جاز (بحب كتير الجاز بالمناسبة فأي حدا بيغني جاز حلو بيسرقني وقلبي سوا) ووقتا لفت نظري صوته كتير.

بيكهيون صوت تينور خارق للعادة بتموضع متوسط وجاي من حنجرة غير عادية, باور عالي بيخوف, وحنجرة Well rounded أو لحظة قلكم شي, اللي مروا قبل أغلبهم قلت عنهم Well rounded فهي حاسستها شوي مش كافية (ما عم بالغ) حنجرة بيكهيون Well rounded وإلى حد ما بتاع كله! 😂

كل شي شغال كل جزء من صوته يعني خامة بتجنن, تكنيك بيجنن, كل جزء من صوته ممتاز وبيعرف يستخدمه (low/mid/high and mixed register) كلهم عشرة على عشرة. لا وضيفوا عليهم Range حلو وكبير كتير وVibrato بيجنن, ومرونة غنائية عالية جداً, مع إن الكل عندهم مرونة غنائية عالية جداً بس بتخيل هو من اللي عندهم أعلى مرونة غنائية بالفرقة إذا ما كان صاحب أعلى مرونة غنائية بين الكل (جد هالولد بتخيل إذا بيتمرن على أغنية طربية عربية ممكن يغنيها حلو لا تنصدموا ههههههه) لهيك ما بدي حدد موسيقى معينة لأن شفته قادر يغني كلشي.

وبالمناسبة قبل ما اسمع إكسو كنت بسمعله كتير سولو فعندي .فكرة منيحة عن صوته والتنوع والمرونة اللي فيه , ولازم اذكر مع إنه ابتدى أساساً مع إكسو كفوكاليست أساسي بس الفرق والتطور بين أيام الترسيم والوقت الحالي جداً جداً عالي! كتير مجتهد واضح هالشي وبيشتغل عحاله وبيتمرن كتير.

الMix بصوته عالي الجودة, هو مغني بصوت صدر مسيطر بدقة خلينا نقول mixed chest voice مسيطر, ومع هيك كل جزء بصوته متمكن منه, بيقدر حتى يلعب بصوته لما بيغني علامات واطية ممكن تفكروه باريتون! (هي ما توقعتها منه بس وأنا بسمع ألبومه الأخير انصدمت صراحة) عدا عن العلامات العالية اللي انتوا كلكم بتعرفوها بس لصوت تينور بميزات وتصنيفات صوته العلامات العالية تعتبر شي عادي ومتوقع, الغير متوقع هو العلامات الواطية تكون لهلدرجة جيدة معاه! لأن عادة للأصوات اللي متله بتكون صعبة بس واضح هو لأي درجة بيتمرن وبيتعب عحاله. وشي طبيعي حدا متله ياخدوه NCT قدوة وكتير من الشباب اللي بيحبوا يغنوا قدوة.

-تشين⚡️:

تاني صوت ومغني خارق للعادة عالقائمة. تشين عنده واحد من أفضل أصوات التينور ذات الباور العالي بالكيبوب مع أفضل تكنيك ممكن (عنده أقوى تكنيك غنائي بإكسو).

صوت تينور خفيف وعالي بتموضع مرتفع, كهربائي الباور اللي عنده (ما عطوه البرق والرعد كقوة خارقة عالفاضي). مع صوت رأس عالي كتير. طابع صوته مشرق وعالي ورفيع, عنده هو وبيكهيون نفس مساحة الصوت بالمناسبة بس الRange مختلف (من أي علامة لأي علامة) مع إن صوته ذو تموضع مرتفع ورفيع كتير وعالي يعني الHigh notes شي متوقع منه وسهل, بس رح اصدمكم إنه بيقدر ينزل بصوته علامات منخفضة أوطى من اللي بينزلوها كاي وتشانيول وكريس (أصوات الباريتون اللي بالفرقة) وبجودة أعلى حتى, هالشي بيدل إنه عنا حنجرة مش بس Well rounded بل خارقة للعادة شوي (لا حدا يستغرب ليش الباقيين اللي عندهم مؤهلات فوكاليست أساسي ما قادرين يكونوا فوكاليست أساسي بإكسو بوجود هيك أصوات).

صوته غني كتير ومتمكن جداً. وعنده أجمل انتقالية بين العلامات بكل الفرقة, صوته كتير متصل ببعضه وجيد وتكنيكه جداً قوي مع التزام كبير تجاه طابع صوته المميز والTone المميزة اللي بصوته.

صوته فيه تقريباً كل شي عند بيكهيون بس تكنيك أقوى شوي وخامة مختلفة طبعاً, وصوته كاراكتر وهالشي بيخليه ينجح بالمسرح وبالدوبلاج لو حب.

كمان مرونته الغنائية لا تقل قوة عن اللي عند بيكهيون بس الفرق إن كل واحد منهم ممكن يسطع شوي أكتر من التاني بشي معين والعكس.

إذا بتسألوني كسولو وخيارات موسيقية مين بفضل أكتر بقلكم بيكهيون بتعجبني خياراته الموسيقية أكتر من تشين, مع هيك تشين مغني قوي جداً وصاحب أقوى تكنيك بالفرقة و لا عجب تم اختياره بين أفضل المغنيين الرجال بكوريا للسنة.

-تشانيول🔥:

تاني صوت باريتون بالفرقة وصوت جميل بشكل, خامة غير شائعة بالكيبوب أبداً لهيك بتلاقوه ما عم ياخد كتير مقاطع غنائية مع إكسو لأن صوته ذو تموضع متوسط مع range جيد بيخليه ينزل منيح بصوته ويطلع منيح كمان, هو أخفض وأعرض صوت بإكسو فصعب الأغنية اللي مكتوبة للكل تزبط عليه كمان. مع هيك عنده وحدة من أجمل خامات الباريتون اللي سمعتها بحياتي! صوت رخم وحلو, بحة خفيفة, عريض وبيقدر يغني بطابع مشرق لو بده هالشي بيخليه قادر يغني أغاني بوب. صوته إذاعي ومسرحي لهيك موجود بالراب لاين (غير مهاراته كرابر), صوت الصدر عنده حلو كتير هيك مسرّ للسمع بشكل! بتمنى اسمعه عم يغني City Pop شي يوم, ولاحظت بيعرف منيح شو بيلبق لصوته, أغانيه السولو كتير حلوة وبهنيه على هالاختيارات لأن عم تبرز صوته بأفضل شكل ممكن, مع إكسو صعب تلتفتوا لصوته كتير وشرحتلكم ليش في فرق بين صوته وصوت الباقيين كبير, بس بأغانيه السولو جداً حبيت صراحة!

صوته كتير غني وتقيل وDark نوعاً ما لهيك كتير بيفرق عن الباقيين (لاحظوا لحد الآن ما استخدمت كلمة تقيل لأوصف صوت أي حدا قبله بظن) كمان كل اللي مروا صوتهم مشرق أو أقرب للمشرق بينما تشانيول صوته دارك أكتر لهيك حابة يجرب الCity pop أو موسيقى الهاوس بتخيل ممكن نبكي إذا سمعناه عم يغني هاوس (يا ساتر! قلبي وقف من مجرد التخيل! ههههههههه).

عنده Support كتير جيد بصوته وبيغني بتكنيكه الخاص, ولازم نذكر التطور الكبير اللي حققه على صوته من أيام الترسيم لليوم, كتير اشتغل عحاله وفرق بالمستوى.

لما سمعته مع إكسو ما لفتني بس توقعت لأن صوته كتير مختلف كطابع وRange عن الباقيين فصعب شوي صوته ينحط بالأغاني اللي بتزبط عالأغلبية, بس بعد ما سمعته سولو بقدر برياحة قول إنه من الأصوات المفضلة عندي.

هو أكتر واحد بتخيل بينجح برا البوب والكيبوب بستايلات موسيقى غير(يا رب يغني موسيقى هاوس شي مرة او اكتشف إنه مغنى هيك شي ههههههه).

-دي أو 👊🏼 :

وصلنا للصوت المفضل عندي على الإطلاق بالفرقة والصوت اللي نوعاً ما أنا ضعيفة كتير قدامه! (بس بموضوعية كتكنيك وتفاصيل موسيقية تانية بيكي وتشين أقوى بس لساته من الثلاثي الخارق للعادة بالفرقة) مع هيك كخامة كيونغسو يفوز! لاحظت عدد كبير بيحب صوت كيونغسو بالفاندوم وبراته وهالشي مفهوم لأن عنده خامة بتجنن! عنده أحلى Vocal tone بكل الفرقة! ما بس هيك, بيغني بإحساس رائع.

صوت تينور بتموضع متوسط لمرتفع, ورشاقة وخفة وتصنيفات ما حدا عنده اياها بالكيبوب غيره (رح اتوسع بس حلل صوته انتظروني)

عنده مرونة كبيرة متل الباقيين بالفرقة بس لازم نوه إنها أقل من بيكي وتشين بشوي, بيسطع أكتر برا البوب, صوته بيطلع حلو كتير بالجاز والسول والR&B هدول أكتر شي بيلبقوا لصوته, ولما سمعته بMama أداؤه كان المفضل عندي بكل الفرقة بهالأغنية, روك ستار بالفطرة جد! كتير بحسه لما بيغني بيحط حاله بالHead space المناسب للأغنية لهيك بتلاقوا إحساسه كتير عالي ومميز والTone تبع صوته جاي عالقد مناسبة للأغنية, بالمختصر نحنا منحبه لأنه مغني ذكي بيعرف شو بيسرّ المستمعين وبيعرف كيف يقدمه.

عنده صوت كتير Sensual لهيك صعب تسمعوه وما تنطربوا, والرشاقة اللي بصوته ما طبيعية (ارشق واخف صوت بإكسو بس بنفس الوقت كتير كبير ومتصل وSupported)

غريب الSM لليوم ما رسمته سولو, سمعت إنو رح يترسم بس لسا ما نزل الألبوم, أتمنى تكون الأغاني متل أمنياتي, وبتخيل شو ما غنى رح نحب. هالولد بيمثل اجتماع الخامة الصوتية اللي بتجنن مع التكنيك والإحساس سوا.

-تاو⏳:

تاو صوت تينور بتموضع متوسط لمرتفع, وطابع مشرق مناسب كتير لموسيقى البوب, هو أضعف من لوهان كتكنيك بس في تشابهات كتير بيناتهم بشو ممكن يطلع من أصواتهم (لوهان عنده خامة أجمل ومرونة شوي أعلى).

صوته رفيع ومناسب للموسيقى الالكترو والبوب والبوب الغربي والموسيقى الراقصة والموسيقى التجارية, كمان بيتصنف صوته كصوت إذاعي ومسرحي بيناسب الراب, عنده جرحة حلوة كتير بصوته بيعرف يستخدمها منيح من حلقه ليخشن صوته ويعطيه طابع احتجاجي بيلبق للراب كتير, مع إن صوته تينور ورفيع بس الجزء الأخفض والأوسط فيه أفضل من الجزء الأعلى. لما بيطلع بصوته ما بكمل المكس وبيعلق صوته بأنفه (نفس مشكلة دونغهي بسوبر جونيور).

بالتمرين بيتحسن كتير طبعاً, وادعموا تاو أغانيه بتلاقوهم هون ZTAO

-كاي 🌀:

تالت صوت باريتون بالفرقة, صوت بتموضع متوسط وكتير Full وكبير ومشرق وتقيل شوي بس فيه خفة كمان.

مرونته جيدة بس أقل شوي من الباقيين (عم احكي عنه مع المجموعة بدون الأعضاء الصينيين اللي خرجوا هون), مع هيك صوته رخم وهادي وإذاعي جداً, والHigh register تبع صوته لافت جداً لباريتون وبيخليه مناسب للبوب, صوته عميق وبيناسب الأغاني القديمة أكتر ستايلات البوب القديم أو الأغاني اللي فيها مكس من الحداثة والريترو (هالشي شفناه بألبومه وقت ترسم منفرد) بس مع هيك أنا بتمنى اسمع كاي بيغني روك أكتر. كاي تاني أكبر روك ستار بالفرقة بعد كيونغسو, والMetal Belt اللي سواه بأغنية Mama كان مثير للدهشة وبين التلاتة اللي غنوا نفس اللاين بنفس الأغنية (شيومين وكريس وكاي) كاي كان أفضل من غناه, وأنا كحدا بيحب الروك عندي رغبة اسمع روك أكتر من كاي, هداك اللاين كان مفاجأة أول ما سمعته صراحة!

ما بكذب عليكم بس تكنيك كاي أضعف شوي من غيره بالفرقة بس طبعاً بالتمرين بيتحسن, كمان الRange تبعه ما كتير كبير بس معقول, عموماً هو مغني جيد وبالسولو وبالمقاطع المنخفضة والمتوسطة بأغاني إكسو فرجانا أحسن ما عنده.

-سيهون 💨 :

آخر صوت باريتون بالفرقة مع تموضع متوسط لمنخفض شوي, صوت إذاعي ومسرحي مناسب كتير لرابر وطابع صوته شبابي أكتر لهيك بيطلع صوته حلو كرابر مرافق لأغاني البوب والهيب هوب الحديث وبالTrap.

سيهون عنده بحة حلوة وخشونة خفيفة بصوته وصوته عميق, ما كتير تدرب ليكون فوكاليست وأغنيته السولو الوحيدة اللي سمعتها كانت أغنية Trap على الكترو شوي ولابقة لصوته جداً.

ما عنده كتير لاينز غنائية بالفرقة بس صوته حلو وبتخيل بالتمرين بيطلع منه شي, بيغني بستايل Rapper أكتر صراحة, يعني بيعتمد على الإيقاع أكتر من الميلودي وبيغني من صوت الصدر والحلق أكتر شي (متل أغلب الرابرز والترابرز) ما كتير بيطلع بصوته ليعمل أي Mixed voice لهيك ما بعرف لأي درجة هو جيد بهيك تكنيك أو لأ, بس هل عنده Potential؟ الجواب إذا تمرن أكيد اي.

هيك منكون خلصنا هالتقرير, بتمنى يكون عجبكم, كانت تجربة مثيرة جداً استمع لكل واحد منهم لوحده ولإكسو عموماً. بتخيل الاكسوال فاندوم بذائقة موسيقية عالية كتير ليحبوا هيك فرقة وبتمنى يكون أغلب الفاندوم بيحبهم فعلاً بسبب الموسيقى!

اتركولي آرائكم, أسئلتكم ومقترحاتكم بالتعليقات. انتظروا تقارير مشابهة لغير فرق بهي السلسلة.

جميع حقوق هذا التقرير محفوظة لمدونتي الخاصة.

Lama 🦋