حديث عن أغنية تن المنفردة Paint me naked مع SM Station:

بما إن مقالي عن تحليل أغنية تايونغ وبيكهيون أحد أعلى مقالاتي قراءة (إذا حابين تقرأوه اضغطوا هنا وبتروحوا عليه) ، ولأن حبيت أغنية تن الجديدة كتير، حابة كمل هالسلسلة مع أغنية تن المنفردة Paint me Naked مع SM Station (اضغطوا على اسم الأغنية لتسمعوها، الأغنية باللغة الإنجليزية). وهاد المقال بحد ذاته مهدى بشكل خاص لصديقة ساعدتني كتير خلال انتقالي وقبل انتقالي ووقفت معي كتير خلال هي الفترة الصعبة الغير مستقرة (نيورة بتمنى هالمقال يرسم ابتسامة كبيرة على وجهك ويخلي يومك أفضل 💖).

....................

مهم جداً وقبل ما نبدأ:هذا المقال مجهودي الشخصي وأخذ وقت من البحث والكتابة، لذلك لو حبيتوا المحتوى بتمنى تشاركوه حصراً من المدونة ولا تنسخوا وتلصقوا أو تنقلوا بشكل عشوائي وتاخدوا سكرينشت. (احفظ حقوق الناس تحفظ حقوقك) شكراً لتفهمكم 💚💚💚 خلونا الأن نبدأ:

خلوني بداية احكي عن لأي درجة أنا مبسوطة وفخورة بتن وبالتطور اللي حققه على نفسه من خلال هالأغنية، واللي قرأ تحليل صوت تن اللي عملته قبل على هي المدونة رح يفهم منيح شو قصدي.

بس باختصار، وقت حكيت عن نقاط ضعف تن ذكرت إن مرونة تن الغنائية شوي محدودة مقارنة بغيره بNCT أو SuperM. اجى تن بهي الأغنية برا منطقة الراحة والمتوقع تماما اله وقلنا شوفوا شو عملت!

صوت تن اللي كتير صاير بوب غربي وR&B قدملنا فيه هالمرة بوب روك عصري بستايل كتير بيذكرني بأغاني البوب روك والpunk تبع الألفينات، شي كتير Avril Lavign على Jonas Brothers على كتير شغلات تانية بتجيب لحدا Millennial متلي ومتل تن عاش مراهقته مع هيك أغاني كمية نوستالجيا رهيبة! لهيك حبيت الأغنية كتير.

عدا عن هاد كله، تن مش بس تجاوز إحدى نقاط ضعفه بهي الأغنية، بل حتى أخد نقاط القوة اللي بصوته لمستوى تاني تماما! كتير فخورة بالتطور اللي عمله وبالتكنيكات الجديدة اللي متعلمها وأتقنها مؤخراً، أنا شايفة لسا potential ومستقبل كتير كبير لهلولد ومرة تانية بحكيها بهي المقال وقلتها قبل وقت حللت صوته.

.................

رح تلاحظوا هالمقال رح يكون فيه شوية اختلاف عن الطريقة اللي اشتغلت فيها مقال أغنية مونرو ، لأن هي الأغنية ساهم بالعمل عليها عدد كبير من الناس على عكس أغنية مونرو ذات الإنتاج المستقل بالكامل واللي كتب كلماتها بالكامل تايونغ ولحنها ووزعها بنفسه بالتعاون مع SQUAR.

لهيك حابة فصّل الأغنية لأكتر من مجرد كلمات، وإذا حبيتوا هي الطريقة أكثر خبروني لاعتمدها لما بشتغل على أغاني تانية بالمستقبل.

-الموسيقا والستايل: الأغنية متل ما سبق وذكرت قبل بوب روك حديث أو معاصر، مع كوردات غيتار إلكتروني جذابة على طول الأغنية وتغييرات وتنويع وتلوين كبير وكتير ديناميكي بالفوكالز كمان على طول الأغنية. يعني صوت تن تم استخدامه ضمن الأغنية أكتر من مجرد الغناء لأداء الكلمات بل كمان في كتير freestyling انعمل بصوته وانحط بالخلفية ومع مقاطع معينة بحد ذاتها أوقات بحيث كان مساهم كآلة موسيقية بحد ذاتها وهالشي كتير حبيته، بالإضافة لصوت آخر داعم انحط بالخلفية وهو صوت Oiaisle اللي ساهموا بتلحين الأغنية مع SQUAR. الأغنية فيها اعتماد كبير بالموسيقا على الفوكالز الخلفية والغيتار الكهربائي، ومشغول عليها شغل كتير كبير.

الأغنية من إنتاج وألحان وتوزيع SQUAR اللي اشتغلوا كتير مع NCT من قبل بالإضافة لفريق تاني من الفنانين، حقوق الأغنية ومعلوماتها بتلاقوهم تحت:

Produced By: SQUAR

Written By: Sami Khan & Adrian McKinnon

Release Date August 10, 2021

Mastering Engineer: 권남우 (Kwon Nam Woo) Mixing Engineer: 김철순 (Kim Cheol Sun) Digital Editing: SQUAR Recording Engineer: 강은지 (Kang Eun Ji) Background Vocals: 이아일 (Oiaisle) & Ten (NCT) Vocal Director: SQUAR & 디즈 (DEEZ) Arranger: SQUAR Composer: 이아일 (Oiaisle) & SQUAR

..................

الكلمات:

الكلمات كتير شبابية ومليانة روح حرة وبرية وبتركز على الروح الحرة للفنان بالحب وعموما، رح نشوف بالتفصيل مقطع مقطع.

بنية الأغنية مصممة لتحسسكم إن الأغنية أطول شوي من 3 دقايق وهاد بناء ذكي جدا، فيها كمان كتير مقاطع catchy لأن في تركيز كتير كبير بالبناء على اللازمة من خلال بناء جسرين صغار واحد قبل اللازمة يربطها بالمقطع الأول ويجهز المستمع لهي النقلة اللي كتير فيها باور وواحد بعد اللازمة يربطها بالمقطع الجديد ويجهز المستمع للمقطع الجديد، وهالشي بحد ذاته بيعطي كمية كبيرة من الlines السهلة اللي بيقدروا المستمعين يغنوها مباشرة مع تن من بعد ما يسمعوا الأغنية مرتين بس! تن عطى المستمعين أغنية تعلق معهم وتضل معاهم وما تكون أغنية بوب عادية.

الأغنية مكونة من: مقطع أول، جسر صغير ما قبل اللازمة، لازمة، جسر صغير ما بعد اللازمة. بعده مقطع ثانِ وبيتكرر نفس الترتيب جسر ما قبل اللازمة مختلف عن اللي كان بالمقطع الأول بعده اللازمة وجسر ما بعد اللازمة، بيجي من بعدهم جسر الأغنية الأساسي بعده اللازمة مباشرة بدون جسر ما قبل اللازمة والختام بيكون بجسر ما بعد اللازمة.

واضح هالبنية غير تقليدية وقادرة توهم المستمع إن الأغنية أطول من 3 دقايق فعلاً، وكمان المقطع الأول بنيته مختلفة كأشطر وتقطيع عن المقطع التاني وهالشي بيزيد من هالاحساس بإن الأغنية أطول من طولها الحقيقي"خداع السمع بدل خداع البصر😁". (نيرة عادة مقاطعها المفضلة بالأغاني بتكون جسر الأغنية لهيك تن يبدو اختار أغنية أغلب بنيتها بتعتمد عالجسور خصوصي ليفرحها "تلت جسور تنين ثانوية وواحد أساسي"😆😁).

خلينا هلأ نحكي عن الكلمات وباقي التفاصيل مقطع مقطع، الأغنية باللغة الانكليزية بالمناسبة:

-المقطع الأول:

الأغنية ما الها مدخل طويل أو مقدمة، بتبدى بصوت الغيتار الكهربائي لثواني اللي بيستمر يعزف خلال المقطع نفس النوتة وحتى بعد دخلة تن واللحن كله بينبنى عليه وبتنضاف عليه باقي التفاصيل، على بساطة هاد الشغل الا انه كتير بيخلي الأغنية catchy وما بيخليها كتير overwhelming بما إنها مليانة ديناميكية وطاقة بعدين.

تن بيدخل بالمقطع عم يغني بطابع مشرق مع استخدام بسيط لصوت الرأس، ما بيخطرلنا أبدا من تكنيك الغناء هون شو القادم بالمقاطع الجاي وهالشي بحد ذاته حماسي ومثير للغاية.

الكلمات بهالمقطع بتحكي عن كيف المجتمع والأهل بيحطولنا حد بيننا وبين الحب، بيقولولنا لا تتحاوزوا هاد الحد، بعدكم كتير صغار عالحب وكأن عندهم مشكلة مع إن نوقع بالحب، لكن نحنا أكثر جنوناً من اللي بيتوقعوه.

حبيت كيف المقطع افتتح بالحديث عن دقات القلب المجنونة وتسكر بالحديث عن إننا نحنا "فئة الشباب واليافعين" حتى مجانين بالحب مش بس قلوبنا.

-ما قبل اللازمة الأول:

الpre-chorus أو ما قبل اللازمة هو متل ما شرحتلكم، جسر صغير بيربط اللازمة بالمقطع اللي قبلها وبيجهز المستمع للازمة، وبحالة هيك أغنية وجوده ضروري لأن اللازمة كتير فيها باور عالي بيفرق عن ديناميكية المقطع الأول كله وافتتاحية الأغنية نفسا.

هالجزء ديناميكيته ما بتفرق كتير عن آخر شطرين بالمقطع الأول وبيستمر على هاد الشكل مع رفع تدريجي للباور لعند آخر شطر فيه اللي بيعلى فيه الباور كتير ليدخلنا باللازمة.

هون الحديث بيختلف ووجهة النظر بتختلف، كان تن بالمقطع الأول عم يحكي مع كل المستمعين وبعدا توجه خطابه للشخص اللي بيحبه، هالنقلة اسمحولي فسرها على مزاجي وقول يمكن حابب المستمعين يشوفوا انهم هم الشخص اللي بيحبه؟ "يمكن" بس عموما الحديث حاليا صار لحدا يفترض إنه تن بيحبه.

الكلمات بتقول: "إذاً يا حبيبتي لا تروضيني"، ليش ابتدأ بإذاً؟ ليش الجملة الشرطية هون؟ لأن المقطع هاد لازم يربطنا بالمقطع الأول والمقطع الأول انتهى بالحديث عن جنون الحب هي من جهة، ومن جهة تانية لأن انقلب الخطاب من خطاب جماعي لخطاب موجه لشخص واحد "الحبيبة" .

من بعدا بيقلها مع إنك وجدتي أسد "بيقصد نفسه" لكن لا تروضيه بإمكانك تفترسيه بدل عن ذلك (Sorry Children بصوت Uncle Roger 😅😆).

بيقلها لا تخطئيني يعني قصده كهدف كفريسة صح هو أسد والأسد مفترس لكن بده يكون هو فريستها، تصطاد قلبه ويوقع بحبها.

بيقلها لا تخطئيني "كهدف أو كصيد" لأنك سر عملي المتقن المترف، يعني هي ملهمته وسر فنه لهيك بده يوقع بحبها لأقصى وأبعد مدى.

الصوت بيتغير عند اللاين الأخير بهالجزء والموسيقا بتهدى لحتى تركز على صوت تن والطلعة اللي مليانة باور هون، تن بيستخدم صوت الحلق ليخشن صوته أكتر إلى جانب مكس الصدر اللي معروف فيه وبيعلي الباور تبع صوته مع صوت الراس، هالتكنيك ولا مرة شفناه هم يعمله وكان بدها أغنية روك لنسمعه عم يجرب هيك شي لأن صعب نسمعه هيك برا الروك، هي تقنية كتير تقنية روك بالغناء.

-اللازمة:

اللازمة بتستمر بتفس الطاقة تبع آخر لاين بما قبل اللازمة، والكلمات بتتابع كمان بجملة شرطية، بيقول إذاً خبريني لوين حابة تاخدي هالحب، أنا النموذج الخام تبعك المودل اللي فيكي ترسميه عاري، وحابة نوه إنو هي الكلمات فيها استعارات وكنايات شعرية عن إنهم كاشفين بيرسموا قصة حبهم بأنفسهم والعري هون القصد منه الوضح والصراحة والصدق، أما تشبيه لنفسه بالنموذج أو التمثال أو المودل اللي فيها ترسمه كناية عن الطواعية والتبعية بالحب والاستسلام الكامل تجاه الحب.

كتير مرات بشوف الفانز عم يقولوا الكلمات منحرفة والكلمات +18 ومن هالحكي بدون فهم حقيقي للكلمات أو بس لأن بتكون مرت كلمة بالأغنية كلمة متل "Naked " أو غيرها.

واللي بيثبت كلامي إن الحديث هون كان كنايات واستعارات شعرية الشطر اللي بعده اللي بيقول فيه مثل اللوحة، أرى حبنا يجري ببرية! يعني عطى حبيبته حرية كتابة قصة الحب تبعهم، هي الرسامة وهو المودل اللي بدها ترسمه وقصة الحب تبعهم هي اللوحة وهي الها حرية الاختيار والتحكم.

وبالأخير بيقلها be my weekend يعني كوني راحتي وحريتي ومتعتي بما إن نهاية الأسبوع مرتبطة بالإجازة والراحة والمتعة والتحرر من المسؤوليات والمهام.

-ما بعد اللازمة:

هاد الجزء بيرجعنا تقريباً لنفس الرتم بما قبل اللازمة وبينتهي بشطر فيه باور مع سكون لثانية تحضيراً للمقطع التالي.

هل لحاله تن هو النموذج أو المودل اللي عم ترسمه؟ لا طبعا، بهالجزء بيتبين النا انو تن بيحب كيف حبيبته بتتوضع ليرسمها، مع هيك ما عم يقدر يسيطر عالأمور والحلو ان بنهاية هالشطر ضاف صوت شهيق، هالشي بيزيد من برية المشهد وحماسيته.

بيرجع بيذكر إن الكل بيتراهن على إنه هو وحبيبته ما رح يكملوا، لكن هو متكل عالحظ (شيتافون يا ابن المحظوظة😂).

-المقطع الثاني:

المقطع الثاني أطول ومختلف موسيقياً كتقطيع عم الأول وهي مرة تانية حركة خداع سمع بتقدر تحسسكم إن الأغنية أطول من وقتها الأصلي.

المقطع بيبلش بشطر بنوتة منخفضة عن قبل وأنا مبسوطة لأن تن قليل ليغني عالواطي.

بعده بيرجع الباور وبيتناوب بالارتفاع والنزول شوي شوي على طول المقطع مع جمالية تكنيك مكس صوت الصدر المميز اللي معروف فيها تن.

بالكلمات بيوصف حماسه بإنه مش قادر يوقف عن حبها لازم يثور على هالوضع.

بيذكر الخطوط الحمراء وبعدها بيقول keep going يعني حتى بعد تجاوز الخط الأحمر بيناتهم رح يتابع، طيب شو هو الخط الأحمر؟ بتجي كلمة lovebound يعني علاقتهم يبدو انها كانت صداقة وبعدها وصلت للمستوى اللي هيي فيه رغم انه كان ممنوع يحبوا بعض "هي أغنية يا عوازل فلفلوا نسخة شيتافون😂".

بيقلها المهم هو نحنا حاليا، الناس موجودين لأجل "النوايا الحسنة" بين قوسين والقصد انهم موجودين ليتدخلوا فيهم وبس تحت اسم النوايا الحسنة وبدنا مصلحتكم ومن هالكلام.

بيوصفها إنها ايقاعه المتكرر بأغنية الحب الخاصة فيهم، تن لأن مغني مش بس رسام وراقص والرقص بده ايقاع.

لهيك قصة حبهم مش بس لوحة بل كمان أغنية.

-ما قبل اللازمة الثاني:

بنفس الطريقة اللي كان فيها ما قبل اللازمة الأول هادي وبعدها بيطلع بباور عالي مع نفس اللاين اللي كان بالأول.

هاد الجزء هون عم يمهد للجسر الأساسي، عم يحكي فيه كيف رح يفرجيها الطريق لوين ممكن يمتد حبهم للفضاء الخارجي.

هاظ المقطع بيتبعه نفس اللازمة وما بعد اللازمة الأول تمهيدا لجسر الأغنية الأساسي.

-جسر الأغنية الأساسي:

هاد الجسر مرتبط بشكل أساسي بما قبل اللازمة الثاني وما بعد اللازمة من ناحية الكلمات، بعد ما ابتعد بحبيبته عن تدخل الناس، بيقول بالرغم من البعد أنا مش خائف أبدا من اللي ممكن يقولوه، شعور الخوف زال، بعدها بيقول From luck to fate بتتذكروا وقت ذكر إنه لازم يعتمد عالحظ لتكمل علاقتهم؟ هون عم يأكدلنا كيف تغيرت مشاعره وصار مآمن إنها هي قدره وما بقى معتمد عالحظ، وتابع هاد الشطر بإنه أنا رح راهن على حبنا كل يوم، وهالشي اذا بتتذكروا اتذكر قبل أن الناس عم تراهن على حبهم وعلى اذا بيكملوا أو لا، لكن ما رح يهتموا لكلام الناس مرة ثانية.

من الناحية الموسيقية كتير هاد المقطع متوقع بالريتم اللي فيه وكيف تصاعد كورد الغيتار عند الشطر التالت تجهيزاَ للازمة مباشرة وهاد اللي خلاه يتميز كجسر أساسي.

أخيرا الأغنية بتقفل بنفس اللازمة وما بعد اللازمة اللي منعرفهم.

شو رأيكم بأغنية تن الجديدة؟ خلولي آرائك بالتعليقات ولأي اقتراحات لمقالات جديدة أو تحليل صوت لا تترددوا بالطلب💖

Lama🦋