حديث عن ألبوم اكسو الأخير Don't fight the feeling:

هاد المقال نزل قبل على فيسبوك لأن انطلب مني كتير، ونزلته بتاريخ 29/حزيران-يونيو/2021، ما كان عندي وصول للمدونة وقتها وهي عم نزله عالمدونة كمان.

خلونا نحكي عن البوم اكسو الأخير Don't fight the feeling, بعرف متأخرة بس نظراً لضيق الوقت ولأن كتير انطلب مني احكي عنه رح احكي عن كل أغنية باختصار "قدر الإمكان".

-الأغنية الرئيسية don't fight the feeling:

شفت عالانترنت آراء متضاربة حول هي الأغنية بصراحة مع إني حبيتها كتير، وأغلب اللي ما عجبتهم أو ما فهموها منيح غالباً ما عندهم فكرة عن المسرح الموسيقي، هي الأغنية اختيار حلو كتير لأغنية رئيسية ومستخدمين فيها كوردات موسيقية شائع استخدامها كتير بالمسرح الموسيقي مع نكهة ريترو بوب حلوة كتير، عن جديد عم يفرجونا مرونة عالية وان اكسو كلهم أصواتهم مسرحية.

الكل كان أدائهم حلو وقوي كالعادة، بس أصحاب أكتر أداء لافت بهي الأغنية بالنسبة الي: بيكهيون صاحب أعلى مرونة غنائية بالفرقة، شيومين لأن هو أكتر صوت مسرحي بين اللي مشاركين بالأغنية فهي الأغنية جاي عالقد مناسبة لصوته ولو سوهو موجود كان رح تلبقله الأغنية بنفس الدرجة ولنفس السبب، تشانيول لأن صوته كان مفتوح وحلو وحر بشكل! من لما حضرت فيلمه كان واضح انه بيستمتع بأداء هالنوع من الأغاني وهالمتعة انعكست على أدائه وصوته وخلتني استمتع كتير.

شي تاني حبيته كتير هو ان راب سيهون كان Melodic شوي هالشي مناسب للأغنية اختيار موفق، كمان فرجاني جانب من صوت سيهون ما كنت شوفه قبل.

-الأغنية الثانية: Paradise:

هي من الأغاني المفضلة عندي بهالألبوم، حبيتها كتير صراحة.

كمان لمسة البوب الريترو موجودة، لكن بعيداً عن هاد كله خلينا نحكي بالفوكالز، هي الأغنية على بساطتها هي عبارة عن عرض عضلات صافي بالفوكالز ورح اشرح ليش، أول شي خلونا نشيل بيكهيون عجنب لأن هاد ما اله علاقة باللي رح احكيه هون ورح تعرفوا ليش، ورح نشيل تشانيول عجنب لأن كان رابر بهالأغنية وهاد برأيي الخيار الصح بهي الأغنية، منجي للباقيين: قالولك كل واحد منا يجي يغني بطريقة ما حدا سامعنا فيها من قبل وتماما برا منطقة الراحة تبعنا😅

بالنسبة لشيومين ولاي أنا ما مصدومة من اللي طلع معاهم ويمكن لولا غياب الباقيين ما اخدوا هي المقاطع، بس كاي كان مفاجأة، كمية التطور الصوتي اللي حققه بأقل من سنة من لما ترسم منفرد ولوقت هالألبوم مثيرة للإعجاب بصراحة! كتير كتير ابرافو.

سيهون كان مفاجأة كمان، كتير في تطور بالتكنيك، صح لسا بيعتمد عالإيقاع اكتر وقت يغني لكن محافظ عالpitch بشكل ممتاز واستخدم صوت الصدر مع صوت الحلق هالشي معناه شو؟ في رابر عم يتدرب فوكالز واسمه سيهون 😁

ليش أحسن خيار ان تشانيول يكون رابر مش فوكاليست بهي الأغنية؟ لأن تشانيول صوته دارك وتقيل كتير وما رح يناسب هالأغنية اللي كتير مشرقة وبدها pitch عالي واصوات خفيفة او قادرة تكون خفيفة وستايلها شبابي كتير.

-الأغنية الثالثة: No matter:

هي يمكن أغنيتي المفضلة بالالبوم، ما عندي فكرة شو كانت الآراء عنها بس بتفهم اذا في كثيرين لقوها غريبة.

عندي فضول أعرف مين المنتجين لأن كتير حبيت صراحة، وبتخيل عالأقل أحد المنتجين looper، التوزيع بيجنن والإيقاع والمؤثرات حلوين كتير كتير، هي بتخيل انها نكهة جديدة لإكسو فحبيت كتير.

كمان اكسو عم يعرضوا عضلاتهم بالvibrato بأصواتهم، وكالعادة المهارة بأعلى مستوى.

كإنتاج موسيقي هي أغنية بينكتب عنها شرح مطول بس للأسف هالفترة ما عندي وقت، لكن كتير حابة احكي عنها.

-الأغنية الرابعة: Runway:

ما بعرف مين مساهم بإنتاج وتأليف وتلحين هي الأغنية بس ما رح استغرب إذا تشانيول اله إيد فيها لأن لمسته كتير واضحة موسيقياً بالأغنية.

هي الأغنية كتير سينمائية، بتحسوها خرج فيلم، حبيت كيف الفوكالز أعلى من الموسيقى، الصدى، الإيقاع، الدرامز، غيتار الباص، كتير في أصوات آلات موسيقية خام.

عن جديد سيهون عم يغني، وحلو الأداء، الأغنية جاي لابقة كتير لأصوات ثلاثي الباريتون بالمجموعة كاي وسيهون وتشانيول.

لاي صوته كتير كان كبير وfull والباقيين كلهم أبدعوا، هي الأغنية جاي على هاوس شوي مع انها مش هاوس مية بالمية.

-الأغنية الأخيرة: Just as usual:

هي كمان تاني أكتر أغنية حبيتها بهالألبوم واستمتعت فيها جدا، كمان مرة تانية ما بعرف مين مساهم بإنتاج وتأليف وتلحين هي الأغنية بس ما رح استغرب إذا تشانيول ملحنها لأن لمسته واضحة فيها كتير، ولأن الستايل مختلف عن اللي بتتبناه الSM عادة.

أكتر شي حبيته إن هي الأغنية صايرة مكتوبة على key أوطى من اللي بيغنوا فيه اكسو بالعادة، فالكل فرجانا الrange الحلو اللي عندهم والكفاءة الكبيرة بالجزء الأوسط للمنخفض من أصواتهم متل ما بيفرجونا اياها بالجزء الأعلى من أصواتهم.

الأغنية مرة تانية مناسبة كتير لثلاثي الباريتون بالمجموعة كاي وسيهون وتشانيول ولا عجب ليش سيهون كمان غنى فيها، بالذات هي الأغنية مناسبة لتشانيول لأنها بتطلب صوت تقيل هيك وهاد بيفسر ليش أخد كتير مقاطع فيها إضافة لأن كتير استمتعت بمقاطعه تحديداً.

شيومين عنده low register حلو كتير وغني وعالي الجودة بصوته وقدرت شوفه من زمان، لكن بسبب غياب البعض بهالألبوم وتنوع الأغاني قدرنا نشوفه اكتر متل بهي الأغنية مثلا.

كمان لازم اذكر إنو هي أكتر أغنية بتلبق لصوت كيونغسو بكل الألبوم.

حبيت استخدام الأصوات كتير وتوزيعها بهي الأغنية، صوت لاي اللي هو أكتر صوت فيه طابع مشرق بالمجموعة مستخدمينه بشكل صح كتير فيها، ومع هيك اخد مقطع غنى فيه بعلامة واطية وفاجأني.

هي الأغنية جميلة جدا فعلا.

هاد كان تعليقي عالألبوم بشكل مختصر، وواضح في عالم عم تتمرن كتير، كاي وسيهون وتشانيول ولاي كلهم عاملين فرق كبير بقدراتهم الصوتية والغنائية لهيك رح حدث تفاصيل عن هالشي بالshadowing اللي عملته لأصوات إكسو على المدونة💖💖

اتركولي أسئلتكم بالتعليقات.