سوبر جونيور دونغهي- تحليل صوت:

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد لأعملها. شكرا لتفهمكم.

بداية دونغهي موقعه lead vocalist بالفرقة ونفس الشي مع Super Junior M، وهو الفوكاليست الأساسي بD&E.

دونغهي عدى عن إنه شخصية محبوبة، صوته محبوب جدا. وSM بيحبوا نوعية صوته كتير، أوقات حتى أكثر من بعض الMain vocalists بسوجو.

نوع الصوت: تينور.

مساحة الصوت: 2 أوكتاف وشي علامتين وهي مساحة صوت جيدة لمغني بوب.

تصنيف الصوت: أصوات تجارية، بيصلح يكون مغني بوب بهذا التصنيف، صوت ذو تموضع مرتفع يعني صوته رفيع بشكل طبيعي.

المرونة والألوان الغنائية: دونغهي متل غالبية سوبر جونيور عنده مرونة جيدة جدا. سمعناه بيغني بوب، هيب هوب، بالاد، R&B، تروت، روك "مع سوبر جونيور وليس بشكل منفرد"، جاز وبلوز كمان مع سوجو، الكترو، وغيرها من أنواع الموسيقى. وبصراحة أنا حبيت صوته فيهم كلهم بس إذا بدي اختار رح قول بالتروت دونغهي بيغني بالمنطقة الأخفض والأعرض من صوته اللي ما بيستخدما كثير بغير أنواع أغاني، وأنا بحب لما بيغني بطبقة منخفضة لأن الكونترول عنده بيكون أفضل وصوته بيكون أجمل. بالجاز وبالبلوز صوت دونغهي طلع كتير حر ومرتاح وجميل! اسمعوا Midnight Blues مثلا. الR&B والهيب هوب هم نوعين الموسيقى اللي بيحب دونغهي يأدي فيهم غالباً ومنقدر نلاحظ هالشي.

دونغهي حتى قدم من قبل تراتيل وترانيم كنسية.

ميزات الخامة الصوتية: دونغهي صوته خفيف ومتوازن وفيه درجة من النقاء حلوة كتير، صوته منسق بشكل طبيعي فوقت الشغل على concept معين صوت دونغهي ما بدو كتير شغل بالاستديو. صوته فيه سهولة وحرية وفيه تألق بيخليه يكون صوت آيدول مثالي أكثر ما هو صوت مطرب مثالي ويمكن لهيك SM بتحب صوته كثير وكانوا يعطوه مقاطع كتيرة أوقات وبالأغاني القديمة كان ينعطى الBridge اللي هو الجزء الأكثر إلهاماً بالأغنية مثلا بShow me your love دونغهي تم اختياره ليغني جسر الأغنية من بين كل سوبر جونيور وTVXQ اللي غنوا الأغنية معهم .

صوت دونغهي متوازن جدا وخاصة بمنطقة المنتصف من صوته.

ميزات التكنيك ونقاط قوة دونغهي كمغني: دونغهي صوته رفيع بشكل طبيعي والجميل والمفاجئ حتى إنه بيستخدم صوته هاد بشكل كتير جيد بالطبقات الواطية بالرغم من إنه ما بيغنيها غالبا بصوته طبيعي لكن بتطلع كتير حلوة معه لهيك بتمنى سوجو يعطوه مقاطع بطبقات واطية أكثر بالمستقبل، رح اعطيكن أمثلة وفيكم تحكموا إذا ما حبيتوا صوت دونغهي أكثر فيها أو لا عنا Midnight blues و This is love استفتح الأغنيتين وكان صوته كتير جيد. حبيبة الملايين SPY صوت دونغهي فيها كان جيد جدا.

نقطة قوة ثانية، دونغهي مثل أونهيوك عنده ثقة بنفسه عالية بالأداء مع تكنيك غنائي متطور أكثر من أونهيوك وهالشي بيساعده جدا.

دونغهي أذنه الموسيقية نظيفة وتقريبا ما شهدنا معه أي حوادث نشاز من قبل (حوادث النشاز بتصير لأفضل المغنيين وجب التنبيه بس!)

عنده تحكم جيد جدا بالنفس.

نقاط ضعف ونقاط يمكن تحسينها: دونغهي عنده مشكلة صغيرة كتير بالمكس المفتوح وأنا شايفة من آخر أداء لأغنيتهم الجديدة المشكلة تقريبا عم تخف. لما دونغهي بده يطلع بطبقة عالية بيحاول يخفف صوته بإنه يغني من أنفه وهالشي بيكون ملحوظ أوقات لأن دونغهي ما بيكمل المكس بشكل مثالي أوقات.

فكرة الغناء من الأنف اعتقد هي فكرة الSM لأن بيحبوا الأصوات الرفيعة والخفيفة وبيحاولوا أوقات يجبروا الفنانين يغنوا فيها و يمكن هي حالة دونغهي. بزعل كثير لأن الوكالات لما بتجبر الآيدولز يغنوا بصوت معين أو طريقة معينة بتخربلن أصواتهم وSM أرحم من غيرها بهالشغلة على فكرة.

إذا منسمع صوت دونغهي بالأغاني القديمة لسوجو مثل U و Believe و Show me your love و Our love منلاقي انو بكل هي الأغاني دونغهي كان عم يغني نوتات عالية وما كان عم يغني من أنفه وصوته كان طالع كثير مرتاح وحر أكثر.

نقطة الضعف الثانية اللي عند دونغهي هي مشكلة عندي اياها أنا كمان لما بغني واللي هيي الصوت القصير

وعادة هي المشكلة بتكون عند الأشخاص اللي عندن مشاكل بالنفس، لكن سبق وذكرنا إن دونغهي عنده تحكم جيد بالنفس، واذا منرجع مرة ثانية لأغاني سوجو القديمة منلاقي إنه هي المشكلة مرتبطة بالمشكلة الأولى، يعني بس دونغهي يبطل يغني من أنفه رح يختفي الصوت القصير ورح يفتح صوته بشكل أفضل. نقاط ضعف دونغهي بسيطة وما بينحكى فيها لأن لولا اجبار SM لدونغهي بإنه يغني بهيك صوت ما كانت هي المشاكل أصلا موجودة.

نقاط ضعفه بدها بس تغيير بالطريقة اللي بيغني فيها، صوته خفيف أساساً وما بحاجة للمزيد من التخفيف والأغاني القديمة تثبت إنه بيقدر يغني نوتات عالية من دون ما يغني من أنفه، مع شوية شغل عالمكس بيتحسن استخدامه لصوته.

بفرقة غير سوبر جونيور، هل ممكن يتغير موقع دونغهي؟ الجواب هو لا، دونغهي هو lead vocalist مع سوجو وبفرقة ثانية ممكن جدا يضل نفس الشي، بأغاني مكتوبة لتناسبه ونوعيات موسيقى معينة دونغهي ممكن يكون ناجح جدا كمغني منفرد.

أسئلة شائعة: ليش دونغهي lead vocalist بالرغم من إنه في أشخاص آخرين بسوجو عندهم نفس القدرات أو أفضل شوي ومش بنفس الموقع؟ السبب الأول هو إن SM بتحب صوت دونغهي وهالنوعية من الأصوات اللي بتكون تينور وبنفس الوقت خفيفة ورفيعة، الSM معروفة انها ما بتحب الأصوات العريضة، صوت دونغهي نقي ومنسق بشكل طبيعي فممكن بيوفر وقت عالSM بشغل الاستديو، كمان دونغهي عنده ثقة بنفسه كبيرة عالمسرح أعلى من الباقيين اللي بيشبهوه بالقدرات أو ممكن حتى أحسن منه وهاد سبب ثاني.

لو دونغهي غاب لظرف ما، مين أفضل شخص يغني مقاطعه؟ كل اللي صوتهم تينور بالفرقة بيقدروا ياخدوا مقاطع دونغهي ما عدا أونهيوك لأن مساحة صوته ما بنفس الوسع. هاد الحكي بيستثني كانغ ان، شيندونغ، ييسونغ، كيبوم، وشيوون. ما بيعني طبعا انو ما بيقدوا يأدوا مقاطع دونغهي بس القصد انو اذا أدوا مقاطع دونغهي بغيابه رح تحسوا إن الأغنية فرقت كتير لأن اللي ذكرتهم أصواتهم باريتون وعريضة. كمان ما برشح ووكي لأن صوته رفيع كثير ورح يعمل فرق ورح تحسوا حالكم عم تسمعوا غير أغنية. أفضل المرشحين هني هنري وليتوك لتشابه القدرات الصوتية والمساحة ونوع الصوت بينهم وبين دونغهي.

أداء جدير بالذكر:

-أداء دونغهي المنفرد بSS1 لأغنية My everything

-أداء دونغهي المنفرد عالراديو لأغنية You don't miss your water كان بيغني بالطبقة الواطية اللي بحبا بصوته.

-أداء دونغهي المنفرد بSS2 لأغنية Beautiful كان عم يغني هيب هوب و R&B جدا هالموسيقى بتلبقله!

-اداء دونغهي المنفرد بSS4 لThis is love (غير أغنية سوجو، هي أغنية صينية بنفس الاسم)

-أداء دونغهي المنفرد بحفل لD&E لأغنية Wonderland

-أداء دونغهي لOST مسلسل Panda and hedgehog اسم الأغنية Don't go

-أغنية First love المنفردة بصوته.

-صوت دونغهي بالأغاني القديمة لسوجو وخاصة Believe، U, Show me your love, our love, Short journey, وغيرهن. وأنا حبيت صوته بكل أغاني ألبومات سوجو السابع والتاسع لأن كان بيغني بطبقة اخفض واريح لصوته وحبيت صوته كتير بالBurn the floor فحاسة رح يتألق بهالألبوم.

هذا كان كلشي بيخص صوت طفلنا المدلل دوني، اتركولي ارائكم واسئلتكم بالتعليقات.

جميع حقوق هذا التحليل الصوتي محفوظة لمدونتي الخاصة

Lama