سوبر جونيور شيوون-تحليل صوت:

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد لأعملها. شكرا لتفهمكم.

بداية شيوون موقعه بسوبر جونيور والفرق الفرعية اللي هو فيها Super Junior M فوكاليست، أوقات بسوبر جونيور بيكون فوكاليست ثانوي.

من دون أدنى شك شيوون من أكبر المستفيدين إذا ما كان أكبر مستفيد من غياب بعض الأعضاء بالفرقة، رح نحكي أكتر عن هالموضوع بهالتقرير!

متحمسة احكي عنه لعدة أسباب، أولها لأن بعتقد إنه underrated, ثانياً لأن في تغيير بنوعية الأصوات الشائعة بسوبر جونيور، وثالثها لأن بعتقد إنه سوبر جونيور ممكن يقدروا يستخدموا صوته أفضل من هيك.

أنا سعيدة إنو اجى ترتيبه بعد ووكي فورا لأن هم الاثنين عكس بعض تماما صوتيا "وبالحياة كمان"

بلا طول سيرة ويلا نبلش!

نوع الصوت: باريتون، تاني صوت باريتون بيمر معنا بعد ييسونغ، الباريتون أقلية بسوبر جونيور

مساحة الصوت: 2 أوكتاف، مساحة صوت جيدة لمغني، شيوون غنى شوية علامات فوق ال2 أوكتاف من قبل بس ما كانوا بمنطقة راحة كبيرة الو.

تصنيف الصوت: بيتصنف كصوت ذو تموضع منخفض، صوت إذاعي. بهالتصنيفات شيوون بيقدر يكون فوكاليست جيد جدا وأنا بحب صوته بس يحكي بيقدر يكون مذيع بإذاعة حتى.

المرونة والألوان الغنائية: شيوون أظهر مرونة جيدة من خلال وجوده مع سوبر جونيور، لأن متل ما منعرف سوبر جونيور تقريبا ما تركوا نوع موسيقى وما جربوا يقدموا فيه أغاني، مرونة شيوون قد تكون محدودة مقارنة بالآخرين بالفرقة لكن جيدة جدا على العموم. أنا بحب صوت شيوون برا نطاق البوب اكتر، شيوون لمع أكتر بأنواع موسيقى غير خاصة الجاز والسول والبلوز بيناسبه طبقة صوته العريضة والمنخفضة، شغلات متل Burn the floor بتطلع عظيمة على صوته! للمفاجأة بالروك شيوون أداؤه كان جيد جدا اسمعوه بdon't don وبtwins. في أغاني بوب بتلبقله إذا فيها مقاطع بتطلب طبقة واطية مثلا الجزء اللي غناه بSorry Sorry ممتاز لإله. بعض أنواع البالاد اللي ما بتطلب نوتات عالية كتير بيمشي حالها على شيوون، مرة غنى أغنية you raise me up مثلا طلعت كتير ناجحة معاه.

ميزات الخامة الصوتية: صوت شيوون تقيل، عميق، تخين، عريض، ورجولي جدا متل أغلب أصوات الباريتون، صوته فيه بحة خفيفة كتير ومثيرة جدا! وصوته كمغني صلب جدا وغني جدا. وفيه تأثير hooty وتأثير حزين شوي مثل ييسونغ الفرق إنه شيوون صوته منخفض أكثر وأعرض أكثر.

ميزات التكنيك ونقاط قوة شيوون كمغني: شيوون بيغني بشكل جميل جدا بالمنطقة الأوسط والأخفض من صوته، هي طبيعة صوته عموما اللي هي تماما عكس طبيعة صوت ووكي. للأسف ما في هالقد استخدام الها بأغاني سوبر جونيور، لهيك ما بياخذ مقاطع كبيرة بالأغاني، بس في أكيد أغاني صوته فيها كان جيد جدا وكانت كأن مكتوبة اله!

مع إنو صوته باريتون وعريض جدا مقارنة بالباريتون اللي مر معنا قبل (ييسونغ) لكن شيوون عنده قدرة جيدة ولا بأس بها على تخفيف نبرة صوته وترفيعها وعلى إنه يطلع شوي بصوته ويستخدم شوي صوت الرأس. طبعا مقارنة بالباقيين (ما عدا الباريتون الثانيين بالفرقة باستثناء ييسونغ وكانغ إن) الكل عندهم مساحة أوسع منه بالعلامات العالية واستخدام أفضل لصوت الرأس مع هيك هو باللي عنده عم يعمل شي حلو كتير، إضافة لأن طبيعة صوته هيك. (لاحظوا إنو شيوون هو العكس تماما من ووكي!).

من نقاط قوة شيوون إنه مغني ذكي كمان وأوقات بيغني من أنفه ليعطي صوته شوية حدة صغيرة ويخفف من عرضه (العكس تماما من استخدام ووكي لنفس التكنيك، ووكي بيستخدم نفس التكنيك ليعرض صوته ويخفف من الحدة) الفرق هون إنو ووكي بيعمل هاد التكنيك بكفاءة أعلى شوي وبتوازن وثبات أكثر، لكن شيوون بالتمرين ممكن جدا يتحسن وهاد التكنيك من دون أدنى شك خيار ذكي بالغناء!

نقاط ضعف ونقاط يمكن تحسينها: شيوون ضعيف شوي بالمكس، أوقات بيحط وزن كبير على الصدر بصوته، وما بيترك صوته يفتح للآخر. وأوقات بيتجنب يعمل المكس وبس يكتفي بإنه يخفف صوته بالطريقة اللي بيعتقد إنها مناسبة للأغنية وهالشي مرات بيزبط كتير مرات ما بيزبط كتير، يعني فينا نشبهه للشخص اللي بيعزف سماعي مثلا بدون نوتة، بينما اللي بيعملوا مكس بصوتن بالفرقة هني مثل اللي بيعزف بنوتة.

ما فينا نلومه للأسف لأن اغلب اغاني سوبر جونيور ما بتناسب صوته، بالأغاني المكتوبة بشكل جيد اله بيكون أداؤه روعة بشكل غير معقول مثلا burn the floor كتبت منشور استثنائي بمدح فيه أداؤه، وأتمنى سوبر جونيور بالمستقبل يكتروا من الأغاني اللي بتناسب صوته لأن عنده خامة حلوة كتير بينشغل عليها، كتيرين بهداك البوست ذكروا انو صوت ييسونغ كمان كان عظيم بburn the floor وهالشي صحيح، الاثنين باريتون فالأغنية بتلبق لأصواتهم.

بفرقة غير سوبر جونيور، هل ممكن يتغير موقع شيوون؟ الإجابة هي نعم بس لازم كمان نغير الوكالة، لأن SM ما بتعطي اهتمام كبير للأصوات العريضة المنخفضة وبتفضل الأصوات الرفيعة والعالية ذات الطابع المشرق أكثر، إذا بوكالة غير SM وفرقة غير سوبر جونيور شيوون ممكن ياخذ مقاطع أكثر، وإذا كان بفرقة ما بتعتمد كثير على البوب شيوون عنده مؤهلات lead vocalist .

أسئلة شائعة: ليش شيوون غالباَ بياخذ مقاطع كانغ إن؟ وليش الأغاني اللي بيستفتحها شيوون بتبلش بعلامات منخفضة كتير؟ جواب السؤال الأول هو لأن شيوون صوته باريتون مثل كانغ إن فهو أفضل مرشح ياخذ مقاطعه بأقل فرق ممكن.

أما السؤال الثاني، فجوابه لأن شيوون فيجوال الفرقة الأساسي فأوقات بيحبوا يخلوه يظهر أول واحد بالMV فبيكتبوا الأغنية اللي رح يستفتحها بعلامات منخفضة بحيث تناسب صوته أكثر، مثال Sorry Sorry.

لو شيوون غاب لظرف ما، مين أفضل شخص يغني مقاطعه؟ كل اللي أصواتهم باريتون قادرين و هذا الكلام بيشمل شيندونغ، كانغ ان، كيبوم، وييسونغ وكمان اللي أصواتهم تينور بس فيها عرض متل هيتشول وكيوهيون، وكمان اللي أصواتهم تينور بس الجزء المنخفض من صوتهم متطور وقوي مثل جومي وليتوك ودونغهي.

أداء جدير بالذكر: هدول الأغاني أغلبها مش بوب، ورح تشوفوا فرق كبير بمستوى شيوون فيها وبمستواه بأغاني البوب خاصة اللي كثير طبقتها عالية. اسمعوهم ورح تتفقوا معي إنو شيوون underrated.

-أداء شيوون المنفرد بSS2 لأغنية Who Am I.

-أداء شيوون بSS4 لأغنية Your grace is enough. موسيقى روك على كاونتري جدا جدا لابقة لصوته!

-أداء شيوون المنفرد لأغنية you raise me up يمكن هذا الأداء من مفضلاتي بصوته. هيك نوعية من الأغاني مناسبة جدا اله، هاد البالاد اللي بيناسب شيوون.

-أداء شيوون المنفرد بSS6 لأغنية lost stars. شيوون من دون أدنى شك بيلمع بالموسيقى الغربية أكثر من الموسيقى الآسيوية. في طبقات عالية بهي الأغنية شوي بس أداها بنجاح عشرة على عشرة. واستخدم شوي الfalsetto تبع صوته.

-أداء شيوون المنفرد بSS3 لأغنية looking for the day.

-أداء شيوون المنفرد للأغنية الصينية Where's the promised happiness أغنية بالاد حزينة مناسبة جدا اله.

-أغنية only you من اوستات مسلسل She was pretty كمان بالاد جدا لابق لصوته وطبقته منخفضة وجيد جدا اله.

صوت شيوون بأغاني Sorry Sorry وThe melody وHit me up وBurn the floor وlunar eclipse وSuper girl وSPY وU وMiracle و Don't don و Twins وFly me to the moon و Midnight fantasy وتقريبا بكل أغنية ما انجبر يغني فيها بطبقة عالية.

هذا كان كلشي بيخص صوت شيوون، اتركولي ارائكم واسئلتكم بالتعليقات.

جميع حقوق هذا التحليل الصوتي محفوظة لمدونتي الخاصة

Lama