سوبر جونيور كيوهيون- تحليل صوت:

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد لأعملها. شكرا لتفهمكم. بداية كيونا موقعه بسوبر جونيور وبالفرق الفرعية اللي هو فيها KRY و Super Junior M فوكاليست أساسي.

نوع الصوت: تينور ولكن! تينور عريض، أعرض من الأصوات التينور السابقة اللي مرت معنا وهي ميزة جيدة جدا.

مساحة الصوت: 4 أوكتاف، اي نعم أربعة أوكتاف أوسع مساحة صوت بالكيبوب! وحش فوكالز!! بتعرفوا شو معنى هالحكي؟ لو SM ما حبوا يقبلوا كيونا كمتدرب كان ممكن نشوف كيونا بالأوبرا بصوته التينور العريض مع هيك مساحة صوت.

تصنيف الصوت: فوكاليست بصوت رأس عالي، صوت بتموضع منخفض، high range belter يعني مغني بيعمل مكس على العلامات الموسيقية العالية، Well rounded voices، بهيك تصنيفات كيوهيون أكيد أمير البالاد وما حدا قده بيستاهل هاللقب، فيه يغني شو ما بده، بيقدر يغني جاز وبلوز وسول، بيقدر يغني بالمسرح الموسيقي وبالأوبرا كمان.

المرونة والألوان الغنائية: كيونا مرونته عالية كمغني، بيقدر يغني مختلف أنواع الموسيقى بنفس القوة والكفاءة، وشفناه عم يغني ويجرب كلشي مع سوجو، حبيناه أكثر شي بالبالاد لأن قدر يفرجينا أحسن ما عنده، بال SJ return 4 غنى كيونا تروت وأداءه كان مفاجأة الي صراحة، أنا حبيت كيونا أكتر شي بالجاز والبلوز اسمعوه بHit me up وmidnight blues وحبيته بالمسرح الغنائي ومتمنية شوف كيونا عم يجرب الأوبرا.

ميزات الخامة الصوتية: كيونا عنده صوت دافئ وجميل وجدا مسرّ للأذن ومريح للسمع، صوته بالمنطقة المتوسطة منه عريض وبالمنطقة المنخفضة منه عميق ورجولي وعريض وبالمنطقة العليا صوته أرفع بس بطريقة جدا مريحة للأذن! أنا شخصياً بحب صوته كتير، ومن الصعب الواحد ما يتعلق بصوت كيونا.

ميزات التكنيك ونقاط قوة كيوهيون كمغني: بسم الله الرحمن الرحيم، من وين بدنا نبلش؟!! ييسونغ خامته الصوتية كانت أفضل ميزات صوته كيونا تكنيكه واحترافيته هني اللي بيميزوه. أول شي خلينا نحكي عن إنه هو مثل ييسونغ Belter قوي جدا، مع مكس مثالي بدون ولا ربع غلطة! حظه أفضل من ييسونغ انه صوته تينور بس عريض شوي ومساحة صوته أكبر لهيك بيقدر يعمل الBelt على أخفض وأوسط وأعلى نقطة من صوته ويضل مثالي، ولأ كمان يبين هيك كتير سهل ما فيه أي جهد! ثبات الصوت هي نقطة قوة بيتميز فيها كيوهيون عالمسرح صوته ما بيهتز أبدا، والSupport تبع صوته صعب التصديق لأي درجة مثالي! عنده كونترول عالي على حدة وعرض صوته لهيك صوته سواء عرضه أو خففه رح يضل مريح للأذن وما بيعلق بأماكن معينة خلال المكس متل الانف والصدر والحلق لهيك صنفناه Well rounded vocalist . فصل النوتات والانتقال بالعلامات الموسيقية عنده مثالي. حليات الصوت أو العُرب الصوتية هي ميزة تقريبا بس كم واحد بسوجو عندن اياها واللي بيعملا بشكل مثالي اكثر شي هو كيونا، مثال بآخر أغنية Superman بيقول كيونا كلمة سوبرمان مع إطالة عالية لA وانتقالية جميلة بين العلامات. اسمعوها ودققوا الطبقات الواطية اللي بيغنيها يمكن اكثر طبقات واطية مثالية سمعتا من آيدول صوته تينور، الجزء المنخفض من صوته متطور جدا وعميق ورجولي ولو انه مش عريض كثير مقارنة بييسونغ لأن ييسونغ صوته باريتون طبعا. صوت الرأس عنده مثالي ولو إنه ما بيستخدمه دائما لأن لما بيكون عنا ووكي ما بظن رح نعذب كيونا بعلامات عالية كثير بس بTicky Tocky وMidnight blues مثلا كيونا استخدم صوت الرأس وكان حلو، وفي كثير أغاني ثانية. بمنطقة الوسط من صوته، كيونا بيكون صوته تقيل وفخم. بيمزج شوي من صوت الرأس مع الصدر اللي بيكون معبى هواء وهون لازم اذكر تحكمه بالنفس المثالي، واحد من افضل تحكم بالنفس بسوجو، صوته بيكون مفتوح ومتوازن ومتل ما ذكرنا ما بيعلق بأي مكان وبيطلع كتير سهل ومريح ومثالي وفيه تحكم وقوي. بصوت الرأس كيونا بيستخدم Belt بيستخدموه اللي بيغنوا Metal عفكرة، بيحط كمية كبيرة من صوته بالرأس وبيدمجه بشكل مثالي مع صوت الصدر وبيخففه شوي من أنفه وبيطلع صوته قوي كتير لصوت رأس. كمان كيونا بيغني بإحساس عالي وبيخلينا نفهم الأغنية ونحس فيها بدون ما نعرف ترجمة الكلمات.

نقاط ضعف ونقاط يمكن تحسينها: بتتذكروا الولد الصغير اللي اجى يحكم مسابقة مستر سيمبل تروت بعودة سوبر جونيور الجزء الرابع ولما سأله المقدم ليتوك وقتا عن أداء كيونا إذا في شي قابل للتحسين وقال إنه ما في شي بحاجة للتحسين بأداء كيونا؟ اي بحب قلكم انه هذا الولد الصغير بيفهم عنجد بالموسيقى وبالغناء وما جايبينه ليلعب فعلاً ما في شي قابل للتحسين. رح قول بس إنه يمكن كيونا بأداءه المنفرد ما بيستخدم صوت الرأس والFalsetto كثير لأن يمكن بيشكك بحاله فيهن، بس مع هيك أداءه كثير قوي بهالتقنية.

بفرقة غير سوبر جونيور، هل ممكن يتغير موقع كيوهيون؟ الجواب هو لا، كيونا مع سوجو Main Vocalist وبفرقة غير رح يضل نفس الشي، عنده Career ناجح كمغني منفرد وكممثل مسرح غنائي، بقدر قول لو ما قدم كيونا على الSM أو لو لرفضوه كنا يمكن شفناه بالأوبرا.

أسئلة شائعة: هل شفنا كل شي بيقدر كيوهيون يعمله بصوته لحد الآن إذا كان صوته هالقد رهيب وإمكانياته هالقد كبيرة كمغني؟ الجواب هو أكيد لا، بالرغم من المسيرة الطويلة مع سوجو والفرق الفرعية وكمغني منفرد وبالمسرح مع هيك لسا ما شفنا كل شي بيقدر يعمله هالوحش الصغير بصوته

لو كيوهيون غاب لظرف ما، مين أفضل شخص يغني مقاطعه؟ الMain vocalists الثانيين أكيد ييسونغ و ريووك بيقدروا أكيد يغنوا مقاطع كيونا وخاصة اللي فيها freestyling أو انتقالات صعبة بالعلامات، مع هيك الاغنية رح تفرق عليكن. في شخص واحد بالفرقة بنية صوته ما كتير مختلفة عن كيونا وكمان تينور عريض ومساحة صوته واسعة وقادر يشيل بعض مقاطع كيونا بأقل فرق ممكن ولو إنه تكنيكه مختلف عن كيونا، جاهزين تعرفوا مين؟ هيتشول!! اي نعم هيتشول! فاجأتكم مو؟

أداء جدير بالذكر: هي أصعب مرة بكتب فيها هالجزء. مسموح قول كل أداء لايف منفرد اله؟ جد ما بمزح، ولا مرة غلط عالمسرح -كل اوستات المسلسلات اللي غناها كيونا كانت رائعة. -أداء كيونا ببرنامج The king of masked singer ما رح حدد أغنية معينة كلهم بيجننوا! -أداء كيونا المنفرد بSS2 لأغنيته seven years of love هي الاغنية من مفضلاتي، صوتع بيجنن فيها وهاد الأداء كان بعد ما شفي من الحادث بعد ما كان ممكن يموت أو يخسر صوته. كان متأثر جدا عالمسرح لهيك اخترته لقيمته المعنوية. -كل أغاني كيونا المنفردة ناجحة وما بدها مين يحكي عنها، أنا بحب piano forest لأنها أقرب للجاز ولأن ذكرت اني بحب صوت كيونا بالجاز. بكل مسرحية موسيقية كيوهيون كان متألق أكثر من قبل، رح اذكر ميوزكال موزارت على وجه التحديد بمونولوج Why can't you love me ، اللي بيشكك بقدرة كيونا بالأوبرا يحضر هاد الأداء وبعدا يجي يقلي إذا لسا عنده شك -صوت كيونا بأغنية Shining star و hit me up و isalnds وmidnight blues وthis is love و بour love وبGood person وأكيد أكيد بSorry sorry النسخة الاولى وAnswer وبTicky tocky وبكثير أغاني ثانية. هذا كان كلشي بيخص صوت كيونا، اتركولي ارائكم واسئلتكم بالتعليقات. جميع حقوق هذا التحليل الصوتي محفوظة لمدونتي الخاصة

Lama