سوبر جونيور هيتشول- تحليل صوت:

تحليل الصوت هذا كنت ناطرته بحماس لأن رح يكون مفاجأة من العيار الثقيل!اليوم وأخيرا رح نحكي عن أكثر مغني underrated بالكيبوب، كيم هيتشول النجم الكوني.

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد لأعملها. شكرا لتفهمكم.

بداية هينيم موقعه بسوبر جونيور فوكاليست وأحيانا فوكاليست ثانوي وفوكاليست بالفرقة الفرعية اللي هو فيها Super Junior T (بهي السلسلة ماعم قرب عمواقع الأعضاء اللي ما الها علاقة بالفوكالز متل موقعهم بالراب لاين أو الدانس لاين أو حتى كفيجوالز)، وعنده تعاوناته الغنائية هون وهونيك وعنده Career كمغني منفرد. ما رح نحكم كتير على هيتشول من أغاني سوجو، وضعه الصحي منعه من التواجد أو المشاركة الكبيرة بكتير عودات. بس قدم شغل منفرد عظيم يشكر عليه.

نوع الصوت: تينور ولكن، تينور عريض متل حالة كيوهيون، يمكن تكون مفاجأة الكم بس في تشابه إلى حد ما بالبنية الصوتية عند الاثنين وبيقدروا ياخدوا مقاطع بعض بحالات الغياب بأقل فرق ممكن، علماً إنه لكل منهم أسلوبه وتكنيكه إضافة إنه لكل منهم صوته اللي بيميزه دون أدنى شك، شفناهم غنوا ديو مع بعض من قبل وكان ما في فرق بالمستوى نوعاً ما بس في فرق بطريقة الأداء أكيد.

مساحة الصوت: 3 أوكتاف وأربع علامات يعني 3 أوكتاف ونصف، تاني أوسع مساحة صوت بسوجو بعد كيو. هي المساحة ممتازة و أفضل بكتير من مساحة الصوت الشائعة بين مغنيين البوب، بعض أفضل مغنيين العالم مساحة أصواتهم 3 أوكتاف فما فوق.

تصنيف الصوت: صوت ذو تموضع متوسط ومنخفض يعني صوته عريض بالنسبة للتينور ومعتدل، Mid-range belter و كمان High-range belter يعني مغني بتكنيك بيستخدم فيه مكس بالمنطقة الوسطى والعليا من صوته، Well rounded voices، فوكاليست بFalsetto مستعار رفيع، صوت إذاعي، صوت مسرحي. بهالتصنيفات هيتشول فيه يغني أي نوع موسيقى بده اياه، بيقدر يكون رابر جيد، مذيع بإذاعة، ممثل صوت، وأكيد روك ستار.

المرونة والألوان الغنائية: أعلى مرونة غنائية بسوبر جونيور! ألبوماته المنفردة إذا سامعينها عبارة عن عرض عضلات لهلميزة اللي فيه بأحسن شكل ممكن، ما مخلي نوع موسيقى وما مقدمه فيها، بدكم بوب؟ موجود. بدكم تروت؟ موجود. بدكم بالاد؟ موجود. بدكم ريترو؟ موجود. بدكم هيب هوب؟ موجود، بدكم الكترو؟ موجود، بدكم روك؟ موجود وأكثر من نوع حتى غنى punk و Metal و آلترناتيف وغيرهم. حتى الجاز والبلوز وغير أنواع بوب وموسيقى جربها مع سوجو وحبيت صوته فيهم كلهم. حقيقة، صعب الواحد يكون قادر يغني كل أنواع الموسيقى هي بهالكفاءة وعم يستخدم ب90 بالمية من الأداء بس المنطقة الوسطى من كل مساحة صوته الكبيرة! رح نحكي عن تكنيك هيتشول اللي بيخليه لهلدرجة مرن لاحقا.

ميزات الخامة الصوتية: صوت هيتشول غني جداً، صلب وعريض وخشن ومتوازن، وجذاب وكتير playful، وجدا impressive بلحظات معينة. صوته على عكس اللي مروا معنا ما فيه طابع دافي مثل ييسونغ وكيو أو طابع مشرق مثل صوت ليتوك أو دونغهي، صوته فيه طابع بارد وفيه جرحة واضحة هاد صوت هيتشول الطبيعي.

منجي للصوت المستعار وهون الإذهال، كتير مغنيين صوتهم المستعار أو طبقتهم المستعارة ما بتنسمع، هيتشول على العكس الصوت المستعار عنده قد لا يقل كفاءة وجودة عن الصوت الطبيعي وبيعرف يستخدمه بشكل حلو كتير.

حنجرة هيتشول كتير مرنة ولينة ومتوازنة وصوته تقريبا هو نفسه شو ما غنى.

ميزات التكنيك ونقاط قوة هيتشول كمغني: هيتشول ماسك الBelts تبع الموسيقى على اختلاف أنواعها وقايل يلا نغني وهاد سر مرونته.

عادة بالبالاد والبوب تحديداً هيتشول بيعمل مكس مفتوح ممتاز لصوته، عالي وقوي، بيحط جزء من صوته بالرأس، جزء صغير بالأنف، وجزء بيدفعه من أحباله الصوتية للأمام وبيفتح فمه بشكل واسع بيطلع الصوت كتير مشرق، قوي، وفيه طاقة، مثال أداءه اللايف لأغنيته Old movie، شوفوا النوتة العالية اللي عملها. وبكتير أغاني تانية عمل شغلات مشابهة.

بالروك هيتشول بيتبع تكنيك مشابه بس بياخد صوته من حلقه وبيطلع خشن وجارح وقوي بيعمل Rock Belt مثالي اسمعوله مثلا Banana Shake أو صوته بDon't Don. وبالميتال بيستخدم Metal belt حلو كتير اسمعوله No dap.

نفس الRock belt بيعمله هيتشول على مستوى العلامات المنخفضة لما بيغني تروت وبيطلع صوته خشن وعريض وكبير ومناسب جدا للتروت، وبالتروت هيتشول بيستخدم العُرب أو حليات صوته، وهذا الاستخدام الصح بالوقت الصح! لأن جزء كبير من أداء التروت بيعتمد على حليات الصوت ولهيك صوته بيطلع حلو كتير ومناسب للتروت. كنت بتمنى شوفه بعودة سوبر جونيور الجزء الرابع وقت حلقات مستر سيمبل تروت كان كسح الجميع بدون مبالغة

بالالكترو والبوب الحديث بيعمل الBelt عمستوى أخفض شوي من صوته وبيخففه وبيرفعه شوي كتير صغيرة من أنفه من دون ما حتى نحس إنه عم يغني من أنفه لأن عم يحط جزء من الصوت بالرأس مثلا بأغاني مثلا Bonamana و Sorry Sorry غنى بهالطريقة.

بالجاز والبلوز غنى من منتصف صوته، صوته بمنطقة الوسط منه كتير بيكون مرتاح فيه وبيستخدم عفكرة الوسط من صوته بتسعين بالمية من الأداء تبعه.

بالfalsetto هيتشول بيستعمل أوقات طبقة مستعارة حلوة كتير والها استخدام طريف، بيطلع صوته فيها رفيع كتير تقريبا متل صوت امرأة، ما استخدما غير بأغاني Super Junior T اللي سمع أغانيهم بيكون لاحظ، بس الfalsetto تبعه حلو وبتمنى نسمعه أكثر.

لازم اكيد نذكر لأي درجة هيتشول بيندمج وقت يغني وبيغني بإحساس، وجزء كبير من أداءه بيعتمد على إحساسه أوقات.

نقاط ضعف ونقاط يمكن تحسينها: هيتشول ما عنده شغلات كتير ليشتغل عليها، كم شغلة صغيرة وبسيطة جدا.

هيتشول أوقات بيركز عالإحساس أكثر من التكنيك بالأداء لهيك أوقات بيختل توازن وصوته وثباته عالمسرح وبيصير التكنيك عم يشتغل بضربة حظ، واذا حدا لقط عليه غلط بيستلموه الهيترز عليها وهي صارت معه من قبل.

أوقات قليلة بالRock belt صوته ببين معلق بحلقه، بس ما بطريقة مزعجة للأذن، وطالما مش مزعجة فالأمور تمام لكن إذا تمرن عليها أكثر بيحمي صوته وحنجرته من الأذى.

الشغلة الثالثة وهي أهم ملاحظة بدنا هيتشول يحط عليها كثير تركيز وطاقة وهي الثقة بالنفس، هيتشول للأسف بسبب التنمر والكراهية اللي تعرضلهم مرت فترة صار يشكك بنفسه عالمسرح وفقد ثقته بنفسه كمغني، والثقة بالنفس رأس مال الآيدول، نحنا سعداء إنه شفناه رجع وقدم ألبومات منفردة وخلى الكل يشوفه مين هو.

والشي الأخير اللي بدنا اياه منه هو إنه يهتم بصحته وسلامة رجليه لأن منحب نشوفه عالمسرح ونسمع صوته كثير.

بفرقة غير سوبر جونيور، هل ممكن يتغير موقع هيتشول؟ جاهزين للمفاجأة؟ الجواب هو نعم! هيتشول عنده مؤهلات main vocalist بفرقة غير سوجو ممكن جدا يكون main vocalist وبيقدر يحقق نجاح هائل كمغني منفرد بكل هالمرونة اللي عنده لأن بيقدر يعمل تجديد بالconcepts وأنواع الموسيقى اللي بيشتغل عليها. بيسموه النجم الكوني مش عالفاضي

أسئلة شائعة: هيتشول عم يعمل أغاني وألبومات منفردة وتعاونات مع غير فنانين وعم يكون ناجح جدا، ليش بعودات سوجو ما عم ياخذ حصة كبيرة من الأداء؟ السبب الأول والرئيسي الوضع الصحي اللي بيمنعه يرقص، والسبب الثاني بظن إنه هيتشول اكتفى من الكراهية اللي كانت تجيه ومن الناس الكتار بكوريا اللي بس بدهم يطلعوا هيتشول من سوجو متل ما تسببوا بخروج غيره من الفرفة، لهيك هيتشول يبدو مختار يكون minimal بوجوده مع سوجو بالعودات، عم يكون موجود غالبا من أجل الأعضاء ومن أجلنا نحنا اللي منحبه.

لو هيتشول غاب لظرف ما، مين أفضل شخص يغني مقاطعه؟ هيتشول غاب كثير بسبب وضعه الصحي وتقريبا كتار جربوا أخذ مقاطعه، أفضل حدا ممكن يغنيهم بأقل فرق ممكن هو كيوهيون بسبب قرب المساحة الصوتية وتشابه البنية الصوتية بينهم، بDon't don ييسونغ بيقدر يعمل Rock belt فبيقدر ياخد مقاطع هيتشول بهي الأغنية.

أداء جدير بالذكر:

-أداء هيتشول المنفرد بSS2 لأغنيته المنفردة Soul

-أداء هيتشول المنفرد باليابان لوحدة من الأغاني اليابانية المفضلة عندي au revoir لفرقة Malice Mizer أداءه لا يقل جمال عن صوت المغني الأصلي وأنا زاد إعجابي بهيتشول لما عرفت إنه بيحب هالفرقة.

-أداء هيتشول المنفرد لأغنيته Old movie.

-أداء هيتشول ببرنامج The king of masked singer. كان مفاجأة السنة! صراحة أنا فورا حزرت إنه هيتشول، دخل ودخلت هالته معه

-اداء هيتشول ببرنامج immortal songs عنده أداء حلو كتير مع جومي وأداء مع jungmo من تراكس والاثنين أحلى من بعض.

-صوت هيتشول بأغنية Show و Believe و Don't don وMidnight blues وبHit me up و بHappiness وبGood person وبU وIslands وب one more chance وبكل أغاني Super Junior T وبخص بالذكر Rukkogo و don't go away اسمعوا الFalsetto الحلو اللي عنده فيهم، وبTtok ttok ttok استخدم حليات صوته بشكل حلو كتير وأكيد كل أغانيه المنفردة وأعماله الثانية يشاد بها.

هذا كان كلشي بيخص صوت هيتشول، اتركولي ارائكم واسئلتكم بالتعليقات.

جميع حقوق هذا التحليل الصوتي محفوظة لمدونتي الخاصة

Lama