فرقة حققت ثورة موسيقية بعالم الكيبوب SS501

حديثي اليوم رح يكون الهدف منه عقولة روبول تشارلز To educate the children darling! اليوم بهذا المقال رح احكي عن فرقة قديمة من الجيل الثاني حققت نجاح ساحق ومبهر على أيام جيلهم وأعتقد إنهم انظلموا بأيامنا الحالية وما أخذوا حقهم من الانتباه والاهتمام. هي الفرقة بتتكون من خمس شباب موهوبين كل واحد منهم Divo "مذكر Diva ابحثوا بغوغل" بطريقته الخاصة! الفرقة هي كسرت القواعد وعملت شغلات مختلفة عن السائد بالكيبوب وغيرت كتير مفاهيم وقدمت أحياناً أفكار ومفاهيم موسيقية كانت غريبة على وقتهم بس مستقبلية جدا لدرجة إن الجيل الرابع حالياً كتير منهم عم يشتغلوا على شي مشابه. الحديث اليوم عن الفرقة الأسطورية SS501. رح نحكي بهذا المقال نبذة تعريفية قصيرة، شو اللي بيخلي هالفرقة عظيمة ومميزة وأسطورية، وليش لازم تسمعولهم وليش أغانيهم تعتبر برأيي إضافة مهمة بتغني الplaylist لأي كيبوبر حقيقي، إضافة لتحليلي وآرائي بخصوص الفرقة وليش تعرضت لظلم وشو الاحتمالات الثانية الواردة لو ظروفهم كانت غير بناء على كوني كيبوبر قديمة جدا من النصف الأول من الألفينات + بناء على تحليلي وخبرتي. بدي تاخدوا بعين الاعتبار إني بكتب كل مقالاتي بموضوعية كبيرة وما بخبي أي عيوب أو محاسن بحال وجودها، واللي بيقرأ مقالاتي وبيعرف لأي فاندومز بنتمي بيعرف إني حتى بايساتي وفرقي المفضلة حكيت عن الثغرات ونقاط الضعف الموجودة بأصواتهم أو أدائهم بكل شفافية، لكن عم ذكر هالشي لأن اليوم عم احكي عن فرقة أنا مش من الفاندوم تبعها لكن بحب موسيقتهم جدا جدا. سبب عدم وجودي بالفاندوم هو لأن كان عندي نظرة شوي مستقبلية وحسيت إن رح يجي يوم وتتوقف نشاطات الفرقة كفرقة ويخيب أملنا. ما علينا من الأحزان هلأ، خلينا نحكي بالعظمة

-نبذة تعريفية قصيرة للكيبوبرز الجدد عن الفرقة ومن وين اجت "educate the children " بصوت روبول تشارلز: ما رح نطول هالفقرة كتير ونغوص بالتفاصيل لأن ما حابة مدونتي تحتوي عمعلومات متوفرة بكل أرجاء الانترنت من جهة، ومن جهة تانية لأن حابة اترك مساحة لفضولكم لحتى تبحثوا عنهم شوي وتقرأوا عنهم أكثر. لكن كان لابد من نبذة تعريفية ولو قصيرة لنعطيكم فكرة عن مين عم نحكي. فرقة SS501 هي فرقة كيبوب أولاد من خمسة أعضاء أسمائهم بالتسلسل من الأكبر سناً ومن القائد للماكني: هيون جونغ، يونغسينغ، كيوجونغ، جونغمين، و هيونغجون. في فرقة فرعية الهم من ثلاثة أعضاء اسمها SS301. أغلبكم يمكن بيعرف القائد هيون جونغ من الدرامات الكورية خاصة Boys over flowers أو فتيان الزهور/أيام الزهور حسب كيف حضرتوه، كان البطل الثاني، والفرقة كلها عملوا ظهور كفرقة بالمسلسل بإحدى الحلقات، كمان غنوا كتير من أوستات المسلسل نفسه. الفرقة ترسمت سنة 2005 تحت وكالة DSP Media، الوكالة هي كانت مش قليلة أبدا بفترة الألفينات ولو كانت إدارتهم أفضل لشفنا الهم موقع بين أكبر الوكالات حالياً، لكن للأسف الوكالة هي بتربح الجائزة الكبرى وعن تفوق وجدارة بسوء الإدارة وسوء التسويق وسوء الترويج، وبرأيي نجاح الفرق اللي فيها كان معتمد على الموهبة الكبيرة اللي عندهم، وفريق الإخراج والإنتاج والإشراف الفني والموسيقي بالفرقة لأن كانوا يشتغلوا على أغاني أسطورية. تحت الوكالة في فرق تانية قوية كتير متل KARA فرقة بنات من الجيل الثاني تعتبر أحد أهم ممهدي الطريق الأوائل والحقيقيين للشهرة باليابان، وKARA من الفرق اللي كان عندها قصص نجاح ملهمة جدا لعالم الكيبوب "إذا مهتمين بمقال عن هالموضوع منحكي عنه خبروني". وحاليا تحت الوكالة في فرقة بتعرفوها بظن اسمها KARD فرقة مختلطة ومن قلائل الفرق اللي بتحتوي أعضاء أولاد وبنات بالكيبوب وهالشي عظيم، لكن لسا الفرقة ما آخذة حقها. هذا كل شي رح احكيه هون، ورح اتركلكم هون بروفايل الفرقة اضغطوا على كلمة SS501 Profile لتعرفوا معلومات أكثر.

خلصنا من النبذة التعريفية عن الفرقة، خلونا نحكي هلأ ليش لازم تسمعوا SS501 وشو اللي بيخليهم فرقة أسطورية ما صار متلها.

١-آيدولز Total Package: فرقة SS501 بتحتوي على خمس شباب متعددي المواهب بشكل، الكل بيغني ومتمكن صوتياً، في فرق بالتكنيك والخامات شي عادي بس المفاجئ إن ما في هالفرق الكبير بالمستوى بالأداء! كل حدا منهم رائع وقوي صوتياً ومتمكن من الأداء ضمن حدود ميزات صوته وإمكانياته (انتظروا قريباً تحليل أصواتهم جميعاَ بالمناسبة!). الكل كان عندهم ثقافة موسيقية عالية بتقدروا تلاحظوها من تكنيكهم بالغناء وهالشي رح خوض فيه بعمق أكثر بس حلل أصواتهم، الكل راقصين أقوياء، تقريباً الكل كانوا ياخذوا مقاطع راب يمكن يونغسينغ الشخص الوحيد اللي ولا مرة سمعتله مقطع راب معهم بس إذا حدا من فاندومهم عم يقرأ وكانت هالمعلومة غلط يصححلي. وآخر شغلة الكل كانوا visual بطريقة بتجنن والوكالة واضح كانت تهتم كتير بستايلاتهم، كانوا يطلعوا بإطلالات كتير منسجمة ومعاصرة بالنسبة للوقت اللي كانوا فيه وتسريحات الشعر كانوا كتير مرات يبينوا متل خمسة أخوة، وهالشي كان لطيف. بصراحة هدول الأولاد كانوا مصدر إلهام لستايلي باللبس أوقات تخيلوا، ورح تلاحظوا إنهم بالكاد بيحطوا مكياج، كتير مكياجهم خفيف وشغل إضاءة وكاميرا مش شغل تغيير مواصفات ولون بشرة..الخ. هدول الشباب كانوا مثال عن آيدولز الtotal package اللي تميزت فيهم اغلب فرق الجيل الثاني، الجيل الثاني كان جيل أسطوري وكان زمنهم زمن فتح بوابة العالمية ولهيك كان في منافسة هائلة بين المتدربين بالوكالات، انحطت شروط قاسية وصعبة كتير للترسيم، وكان فعلياً لازم تكون مايكل جاكسون زمانك لتترسم وهالشي طلعلنا فرق أسطورية كثيرة فيها آيدولز Total Package متل TVXQ, شايني، سوبر جونيور، سنسد، كارا وغيرهم. وSS501 بينطبق عليهم نفس المعيار وبضيف عليه هالة الDivo اللي كانت عند الأعضاء اللي صعب تتواجد عند أعضاء فرقة وحدة كلهم سوا مرة وحدة.

٢-فرقة ترضيك سمعياً وترفع ذائقتك الموسيقية: إذا بتحبوا تغيروا وتجددوا بالبلاي ليست عندكم وترفعوا من ذائقتكم الموسيقية فلا تترددوا أبدا بإضافة أغاني SS501 عليها. الفرقة مرضية سمعياً بشكل رهيب! سبق وحكيت عن إني بمدح فريق الإنتاج والإخراج الفني والموسيقي عند DSP Media جدا، ورح خص بالذكر الفريق اللي اشتغل مع SS501، ما عندي فكرة لأي درجة أعضاء الفرقة كان عندهم حرية فنية بأعمالهم، لكن لما بقول عنهم فرقة بترضيكم سمعياً فبقصد هو التوزيع الجميل والصحيح للمقاطع بين الأعضاء، الاستخدام اللي مية بالمية صح لكل صوت من أصواتهم، الخيارات الموسيقية اللي بتجنن واللي بتلبقلهم واللي فعلاً بتظهر أصواتهم وأدائهم بأعلى درجة من التألق. هي الفرقة من الفرق القليلة بالكيبوب اللي ما حسيت فيها ولا صوت بالفرقة تم إساءة استخدامه ولو حتى مرة! حتى فرقي المفضلة متل سوبر جونيور صار فيها إساءة استخدام لأصوات بعض الأعضاء، بس بهي الفرقة أبدا ما حصل. رح تشوفوا إنو مرات عضو معين بياخذ lines أكثر أو أصعب بأغنية معينة ونفس العضو بأغنية أخرى بياخذ lines أقل، أو جانبية وثانوية أكثر، أو انتقالية وما فيها صعوبة كبيرة، وأوقات بتشوفوا الكل آخذين نفس الكمية ونفس المستوى والسبب هو إحترام الامكانيات اللي عند كل واحد والاستفادة من كل صوت بأفضل شكل ممكن وبحسب لأي درجة الأغنية بتلبق لصوته. هالشي بيخلي أغاني هالفرقة مرضية جداً للسمع. منجي لرفع الذائقة الموسيقية، SS501 من الفرق القليلة اللي نوعت بشكل كبير بأنواع الموسيقى اللي اشتغلوها، وطلعوا أوقات عن البوب بشكل كبير، كان في referencing عظيم بالموسيقى بأعمالهم، موسيقتهم بتترواح من البوب التقليدي كتير للموسيقى الكتير مستقبلية، لازم ما ننسى الاستخدام الجميل للآلات الموسيقية الكلاسيكية والوتريات بموسيقتهم، SS501 من فرق الكيبوب القليلة اللي استخدمت آلات موسيقية كلاسيكية حقيقية بأعمالهم وصوت آلات موسيقية جدا خام ونظيف. بدكم تسمعوا كيبوب الألفينات بكلاسيكيته؟ اسمعوا love like this . بدكم أغنية بوب بس مع تويست مختلف ونكهة من البوب الغربي وتأليف وتوزيع موسيقي عبقري؟ اسمعوا love ya بدكم شي بوب مستقبلي لأيامهم وحاليا الجيل الرابع عم يقلده؟ اسمعوا Deja vu بدكم بوب كوري تقليدي؟ اسمعوا UR man بدكم بوب على روك وشي متأثر بالريترو الغربي؟ اسمعوا Unlock بدكم بوب بستايل مايكل جاكسون ومادونا؟ اسمعوا warning. بدكم بوب ريترو على شوي ديسكو؟ اسمعوا 4Chance بدكم مزيج روك وبوب آسيوي أصيل وتحسوه أوست انمي؟ اسمعوا Fighter وKokoro. بدكم كيبوب الألفينات والتسعينات المرح؟ اسمعوا Coward و Snow prince بدكم بالاد كلاسيكي مسرحي حزين ومليان آلات موسيقية خام وبيجنن؟ اسمعوا Find بدكم البالاد تبع الألفينات؟ اسمعوا Never again. وغيرهم الكتير! الفرقة هي قدمت أنواع موسيقى ما كانت تتأدى كتير بكوريا، كانت معروفة بغير بلدان أكثر. تركتلكم بلاي ليست حلوة فيها افضل الhits للفرقة فيها 30 أغنية بينهم كل اللي ذكرتهم واكثر، اضغطوا على كلمة Playlist ورح تاخذكم عليها.

٣-الأصوات والتوزيع الصوتي بالأغاني: رح اتعمق بصوت كل عضو منهم على حدى بتحليلات الصوت، لكن لازم نحكي هون عن شي مهم كثير، SS501 هي فرقة صوتياً بتعاكس وبتتمرد على السائد والمرغوب بالكيبوب! هي أول فرقة وقد تكون يمكن الوحيدة بالكيبوب ذات أغلبية من أصوات الباريتون، بل حتى قائمة على أصوات الباريتون بحد ذاتها! SS501 فيها أربع أصوات باريتون من أصل خمسة! هالشي عكس الشائع والسائد بالكيبوب ليومنا، وحتى عكس الشائع بالبوب عالعموم بسوق موسيقي بيحب الاصوات الرفيعة، المشرقة وعنده هوس بالHigh notes اجوا SS501 بأربع مغنيين باريتون أصواتهم رجولية، عريضة، خشنة وFull للغاية، وأبدعوا وجددوا باللي عندهم، فعلياً تمردوا موسيقياً بهالفكرة على الكيبوب بحد ذاته! يونغسينغ التينور الوحيد بالفرقة استخدامهم لصوته الرفيع بين كل هالأصوات العريضة ذكي بطريقة تزيد الهارموني بدل ما تسبب تنافر صوتي متل ما عم يصير عند بعض الفرق الجديدة اللي عندا تنوع صوتي بس سوء استخدام للأصوات "ما رح نسمي، بس اللي عندو فضول يسألني بشكل شخصي". منجي من الأصوات نفسها للتوزيع الصوتي والأدوار، عالانترنت رح تلاقوا حكي كتير عن مواقع الأعضاء بالفرقة ومين الmain vocalist والlead vocalist وهالحكي، لكن الواقع هو إن وبحسب الفاندوم نفسه الأعضاء ما عندهم موقع حقيقي أو فعلي صوتياً أو ما بيلتزموا فيه لحد ما، ذكرت سابقاً إن ببعض الأغاني بتشوفوا حدا منهم عم يغني كتير وبأغاني تانية بتلاقوه نفسه ما عنده كتير مقاطع، الفرقة معتمدة على الاستفادة من طبيعة الأصوات، ومن التيسيتورا "منطقة الراحة صوتياً" عند كل عضو، وبهالطريقة بتسمح لكل حدا منهم بأكبر مساحة ممكنة من التألق، وحسب ما فهمت متدربين على غناء الآكابيللا والهم أدوار من الأخفض للأعلى بالفرقة، شي بيشبه اللي عملوه TVXQ وهاد بيدل على تمكن قوي جدا عندهم وثقافة موسيقية عالية.

٤-الموسيقى:

الفرقة مثل ما ذكرت شكلت ثورة موسيقية بالكيبوب، لتقديم أنواع موسيقى مختلفة وما مشهورة كثير عن الكيبوب والاتجاه اللي عالمي شوي بستايلهم الموسيقي، وللتغيير الكبير بنوعية الأصوات اللي شايلة الفرقة عن اللي بيفضله السوق بالكيبوب والبوب عموما. الفرقة عملت مخاطرات كتيرة بس جابت نتيجة، قدمت أغاني كانت تعتبر غريبة كتير بالألفينات بس هلأ الأجيال الجديدة عم تشتغل شي كتير على شاكلتها، اسمعوا Deja Vu مثلا.

تحليلات موسيقية: -شو كان صار لو أعضاء SS501 كانوا بوكالة غير DSP Media ؟ رح جاوب على هالسؤال بافتراض إن الخمسة متدربين بنفس الوكالة، لكن مش DSP. الإجابة عن هالسؤال للأسف وبغض النظر عن الوكالة، لكن كنا most likely ما رح يكون عنا SS501 ! هل رح يترسموا الكل؟ اي نعم رح يترسموا الكل غالبا بس كل حدا بمحل، وبزمن مختلف. رح اشرح وجهة نظري بناء على متابعتي للكيبوب من زمان: وخلينا ندخل بالوكالات الثلاثة الكبرى ونحط سيناريوهات ونفترض ونحلل سوا:

سيناريو الأول: لنفرض لو كانوا الخمسة متدربين بالSM: الSM ما بتحب أصوات الباريتون كتير لكن بترسمهم إذا مغنيين شاطرين، وبحالة SS501 رح ترسم الكل فعلا لكن مش مع بعض لأن كابوس الSM هالعدد من الباريتون مع بعض دفعة وحدة. بناء عهالحكي يونغسينغ رح يترسم أولا كفوكال أساسي بفرقة وممكن هيونغ جون يترسم معاه لكن رح تشوفوا تحيز واضح وتفضيل ليونغسينغ، ورح ينحط هيونغ جون بمقاطع صعبة عليه وما مناسبة لصوته مثل كتير مغنيين باريتون بالSM بالجيل الثاني. الباقيين رح يترسموا بفرق ثانية، جونغمين صاحب أعرض وأخشن صوت رح يترسم آخر شي وممكن ما يتألق كتير الا اذا انحط بفرقة ذات مفهوم بيشبه TVXQ بس رح يضل دوره ثانوي الا اذا قرروا ينتجوا أغاني تناسب صوته.

السيناريو الثاني: لو كانوا الخمسة متدربين بJYP: هيونجونغ وجونغمين وهيونغ جون أول المترسمين بوكالة بتهتم بالراقصين كتير مثل JYP لكن ما منضمن وجودهم بفرقة وحدة، يونغسينغ وكيوجونغ رح ينحطوا بفرقة بالاد غالباً.

السيناريو الثالث: لو كانوا الخمسة متدربين بوكالة YG: عند YG كتير منهم ممكن ينتظر سنين بدون ما يترسم، لأن طبيعة أصواتهم وستايلهم أغلبه ما بيناسب مفاهيم YG، لكن بتخيل هيونغ جون يترسم أولا ويحصل على تفضيل كبير، جونغمين ممكن يجي بعده، هيونجونغ ممكن يترسم وممكن لا، أما الباقيين ممكن يتركوا الYG لأن ما بتخيل ترسمهم.

بكل الأحوال نحنا بالرغم من الاهمال ممتنين إنو الشباب الخمسة طلعوا من DSP Media ورسمتهم سوا تحت اسم SS501 الفرقة الأسطورية، اللي عملت ثورة موسيقية بالكيبوب! ومنتمنى نرجع نشوف الفرقة بأنشطة جديدة سواء كفرقة مع بعض أو أعضاء منفردين. رح ندعم هال Divos بكل حب

شو رأيكم بالمقال، السيناريوهات، والنقاش؟ بتتفقوا معي؟ سمعتوا SS501؟ حبيتوهم؟

اتركولي آرائكم بالتعليقات! وانتظروا تحليل أصوات الأعضاء بالأيام المقبلة!

لو حبيتوا المقال شاركوه من المدونة حصرا من فضلكم. أخذ مجهود ووقت وأيام من العمل عليه, شكرا لتفهمكم 3>

Lama🦋