من روائع ما غنى كيوهيون وليس تماماً بالاد!

#Super_Junior_V

مقال جديد عن أغاني كيو بمناسبة عيد ميلاده! ولأن حابة طبل للأغاني المفضلة عندي من أغاني كيو بما إني مش من أكبر فانز البالاد

هذا المقال لكل اللي حابين يتعرفوا عأغاني لكيو، أو للي ما كثير بيحبوا البالاد بس حابين يسمعوا شي لكيو، أو للي بس حابين تجديد! استمتعوا

أول شي بتتذكروا بتحليل صوت كيوهيون إني ذكرت إنو كيو تقريبا ما عنده نقاط ضعف تذكر كمغني، كتنكيك فعلاً لا غبار على هالكلام، لكن إذا بدي اعطي كيوهيون نقطة ضعف فهي يمكن إنه هو مش كثير Risk taker فيما يتعلق بأنماط الموسيقى اللي بيجرب يغنيها، هو بيغني بالغالبية بالاد لأن بيحب هالنوع من الموسيقى أولا ولأن البالاد بيقدر يظهر أقوى ما عنده وبيقدر يظهر فيه أعلى مستوى من الحرفية وهذا شي جميل طبعا. لكن نحنا منحب نشوف كيو بيجرب أنواع موسيقى ثانية ممكن تفرجينا جانب مختلف من خامة صوته، أنا برشح بشدة المزيد من الجاز، البلوز، والسول بصوت كيو! هالأنواع من الموسيقى بتفرجي الطابع الدافئ والمثير من صوت كيو أكثر من البالاد برأيي. إذا ما قريتوا تحليل صوت كيوهيون فقط اضغطوا على "تحليل صوت كيوهيون" وبياخذكم للمقال!

على كل حال، كيو ما خذلنا! وجرب كم شغلة غير أحيانا، أو قدملكم أغاني مش مية بالمية بالاد، يعني بتقدروا تقولوا إنها بالاد وشي ثاني نوعاً ما خلينا نشوف هالقائمة .

بس تضغطوا على اسم أي أغنية رح تلاقوا رابط بياخذكم بشكل تلقائي عليها.

أغنية Serendipity: هالأغنية ديو بين كيوهيون و Gummy، هي الأغنية بالاد بس فيها شي ريترو لطيف ومحبي الأغاني القديمة رح تعجبهم

أغنية When with me: هي الأغنية من الألبوم الثالث اللي هو أكثر ألبوم برأيي كان فيه تجربة موسيقى مختلفة وإعطاء البالاد نكهة مختلفة، أنا كتير بحب هالأغنية، فيها نكهة بوب على إيقاع بلوز وجازي خفيف. حلو كتير توزيع هي الأغنية وصوت آلات الBass بالخلفية مع إيقاعها وتوزيعها المميزين عاطيها جو جاز على بلوز دافي ومرح شوي. وأكيد رح تحسوا صوت كيو أدفى فيها "فهمتوا قصدي هلأ بظن" واستخدم فيها شوي الFalsetto تبعه اللي بحبه كتير وما بيستخدمه كثير طبعا ما ننسى إنو فيها انتقاليات ما سهلة بالعلامات، الأغنية بتبين السهل الممتنع، لأن كتار بيفكروها سهلة للأداء بس اللي بيغنوا منكم أو بيحبوا يغنوا يجربوا يأدوها ويقولولي كيف عملوا

أغنية Love in time: كمان من الألبوم الثالث، هي أغنية بالاد، بس متأثرة كثير بجو المسرح الموسيقي على جو الأغاني القديمة. بتحسوها شوي مونولوج من مسرحية.

أغنية Fall in you: من الألبوم الثالث ومن أجمل ما غنى كيو، الأغنية فخامة بفخامة كتأليف موسيقي وتوزيع وانتاج وكلشي، الافتتاحية تبع الأغنية بتبدى بجو أوركسترا بعدها بيدخل الإيقاع اللي كثير جازي على سول على بلوز، وبتلاحظوا بعدا إنو الأغنية مش بالاد أصلا، الأغنية صايرة بوب على Funk على سول، شي جرب يغنيه كيو مع سوبر جونيور من قبل بكثير أغاني مثل مثلاً Magic و Devil وغيرهم. وأنا سعيدة جدا انو قدملنا أغنية كاملة من هالنمط بصوته، جو الاغنية مرح ولطيف والأغنية مرة تانية بتبين مثل السهل الممتنع للأداء ومنسمع فيها كل شي ما بيسمعنا اياه كيو بصوته بأغاني البالاد مثل الFalsetto تبعه وغيره، بظن أي حدا بيسمعها رح يتفق معي ليش بحب كيو يكثرلنا من هدول أوقات ويغيرلنا شوي عن البالاد.

أغنية Wind : هي الأغنية من الألبوم الثاني، ولا تغشكم إنها بالاد هي مكتوبة بستايل مونولوجات المسرح الموسيقي بامتياز! خاصة كيف اللحن والآلات الكتير كلاسيكية وبسيطة بالخلفية، ما في كثير شغل على الموسيقى والتركيز الأكبر على الVocals والبيانو وهيك الشغل بالمسرح الموسيقي، والسولو تبع البيانو فيها مية بالمية ستايل مسرح موسيقي. هي الأغنية أكيد مكتوبة لتكون مونولوج بمسرحية موسيقية، واللي بيحبوا الموسيقى الكلاسيكية، المسرح الموسيقي والأوبرا رح تحبوا هي الأغنية كثير، غير إنها من الأغاني اللي فيها أداء جدا outstanding لكيو.

أغنية Remember me : هي كمان من الألبوم الثاني، وهي أغنية بالاد لكن موجودة على القائمة معنا لأن ستايل البالاد اللي فيها كتير متأثر بالبالاد القديم تبع الثمانينات والتسعينات، فإذا بتحبوا الأغاني القديمة رح تعجبكم هي الأغنية.

أغنية Time with you : كمان هي الأغنية متأثرة بجو المسرح الموسيقي الحديث شوي، وفيها شي بوب قديم على country نوعاً ما، توزيع الأغنية عبقري! وهي أغنية صعبة وبظن مبينة صعبة، وبحبا لأن بتظهر طابع مختلف من خامة صوت كيو نحنا منحب نسمعه كثير لأن منسمعه بأغاني سوجو بس ما كثير بأعمال كيو المنفردة. كيو مستخدم فيها أجود ما في بصوته بدون جهد كبير مثل بالبالاد، لهيك بحب شوف هيك أغاني أكثر.

أغنية Dreaming : هي أغنية بالاد على بوب، واللي ملحنها كتير شاطر، متأثرة الأغنية بستايل بالاد كان دارج بأوائل الألفينات، وبحب انو فيها ايقاع درامز روك واضح وغيتارات الكتريك. وهي أغنية بتجبر كيو شوي صغيرة يستعمل الmetal belt اللي بيستخدمه وقت يغني mixed range مع صوت الرأس وأنا شخصيا كتير بحب بس يعملها.

أغنية Flying deep in the night : هي من مفضلاتي والأقرب لقلبي على الإطلاق. هي مش أغنية بالاد أبدا. هي أغنية Funk وبلوز وسول على شوي بوب، مع استخدام عبقري لكل آلة موسيقية خاصة غيتارات الالكتريك،و لكل إيقاع، لكل علامة فيها. الأغنية كأداء بتبين كمان السهل الممتنع وبتبين بسيطة وسهلة بس لا أبدا، لا يغركم المرح اللي فيها وسرعة الإيقاع الأغنية ما قليلة للأداء.

هذا تاني أكثر لون موسيقي بيظهر أحلى ما بصوت كيو برأيي، ومن أكثر الألوان اللي بتلبقله، أداءه فيها outstanding جدا، جسر الأغنية بتهدى فيه الأغنية فجأة بعد كل الحفلة والهرج والمرج اللي فيها وبتسمعوا مرة تانية الfalsetto تبع كيو اللي ما دائما بيسمعنا اياه. أغنية عظيمة!!!

أغنية Piano Forest: هي أغنية جاز وبلوز بامتياز، كتيرين بسمع بيحبوا هي الأغنية كتير وشي طبيعي! هذا أكثر نوع موسيقى بيلبق لصوت كيونا وبيفرجي أجمل ما في بخامة صوته، الدفئ والإثارة اللي بصوته كلها بتطلع بس يغني شي متل هيك. الأغنية لطيفة ودافية مثل صورة الألبوم الثاني اللي اجت منه وكيف أشعة الشمس بالصورة عم تداعب وتبوس خدود كيو بالخريف! هي الأغنية اللي بتشبه صورة الألبوم الثاني.

أغنية Seven Years of love : هي من أجمل ما غنى كيو، وفعليا أول ما طلعت كانت سبب إني حب كيو أكثر واتعلق فيه أكثر

أغنية مختلفة عن أغلب البالاد، ستايلها كثير ألفينات، حزينة وما في داعي تعرفوا معنى الكلمات لحتى تبكوا وانتوا بتسمعوها. الأغنية كتير بسيطة كلحن وتوزيع بس جمالها ببساطتها، لأن الشغل كله على إحساس كيو فيها وهو ما بخل علينا بهالشي أبدا بولا مرة غنى هي الأغنية بأي مناسبة كانت. بحب إنو في أكثر من جسر للأغنية بعضهم بصوت كيو كفوكال أو كلمات وبعضهم بس موسيقى. هيك بتعلق بذهنكم بطرق مختلفة، وملحنين وموزعين الأغنية بطريقة تجبلكم ذكريات وهالقصص. الأغنية على بساطتها كلحن وتوزيع الا إنها معمولة بطريقة عبقرية.

وانتوا أي أكثر أغنية بتحبوها لكيوهيون؟ شاركونا بالتعليقات

Lama