TVXQ/DBSKيونهو- تحليل صوت:

#TVXQ_DBSK_V

#كيبوب_تحليل_صوت

ملاحظة هامة: هي التقارير هي مجهودي الشخصي. رجاء لو حبيتوها شاركوها من المدونة ولا تنقلوها بشكل عشوائي لأن عم تاخذ مني جهد لأعملها. شكرا لتفهمكم.

عدنا لتحليل الصوت! واليوم بمناسبة عيد ميلاد حبيبنا يونهو، رح نحلل صوته.

أنا متحمسة احكي كثير عن يونهو. متابعين مسيرة يونهو الفنية من أوائل الألفينات بيعرفوا لأي درجة كان underrated بفرقة فيها حرفياً وحوش فوكالز مثل DBSK ووكالة عندها تمييز وتحيز للأصوات العالية والرفيعة مثل الSM. يونهو نفسه مش فوكاليست قليل أبدا، لكن متل ما ذكرنا كان صعب يبين قبل كما يجب أيام زمان، ولازم ما ننكر إن غياب أي حدا بأي فرقة يؤدي بشكل طبيعي لإستفادة أعضاء آخرين من هالغياب، وبحالة TVXQ يونهو كان المستفيد بكل جدارة من غياب الأعضاء الثلاثة الآخرين JYJ. لأن كانت فرصة ليحصل على مساحة أكبر يظهر فيها موهبته، ولحتى يجتهد ويبذل جهد مضاعف ليحسن أداءه لدرجة يحصل على فرصته كمغني منفرد وأخيرا!

يونهو من الفنانين اللي عندهم الموهبة، لكن بنفس الوقت بذل جهد جبار على نفسه وتحسن بشكل كبير جدا وملحوظ خلال السنوات، وهو من الآيدولز اللي بنصحكم تتابعوا مسيرته الفنية من البدايات وتطورها إذا بدكم فعلاً تتعلموا تغنوا. (لو حابين مقال أو أكثر عن آيدولز بنصحكم تتابعوا تطور مسيرتهم الغنائية لو حابين تتعلموا تغنوا، خبروني بالتعليقات )

بلا طول حديث "لأن الحديث أصلا رح يكون طويل" وخلونا نبدأ:

بداية يونهو حالياً موقعه فوكاليست بTVXQ, لما كانوا خمسة كان موقعه بالفوكال ثانوي شوي مقارنة بالباقيين وأوقات ياخذ مقاطع أكثر، الشي كان يعتمد عالأغنية واذا فيها مقاطع راب كمان ولا لأ، كمان منعرف ان TVXQ/DBSK مدربين ليكونوا مغنيين آكابيللا وكل واحد اله دور فيها، ويونهو كان آخذ دور صوت الBass اللي هو أخفض وأعرض طبقة صوت رجالية وأخفض وأعرض طبقة صوت بشرية عموماً.

نوع الصوت: باريتون، صح بيقدر يغني نوتات عالية لكن هذا ما بيخليه يكون تينور، الTessitura تبع صوته أو منطقة الراحة تبع صوته هي نفسها لصوت الباريتون، والنوتات العالية اللي بيغنيها صارت بعد اجتهاد وتمرين بنفس حالة ييسونغ من سوبر جونيور، إذا ما قرأتوا قبل تحليل صوت ييسونغ، اضغطوا على (تحليل صوت ييسونغ) ورح تلاقوا صفحة بتاخذكم لهناك.

مساحة الصوت: 2 أوكتاف و7 علامات ونصف يعني على نصف علامة بيصير ثلاثة أوكتاف، مساحة صوت ممتازة طبعاً علماً إن يونهو ببداية مسيرته الفنية كانت مساحة صوته أقل من هيك وتطورت نتيجة التمرين والاجتهاد، لذلك ذكرت إنه من الفنانين اللي بنصحكم تتابعوا تطور مسيرتهم الفنية لحتى تتعلموا تغنوا.

تصنيف الصوت: أصوات تجارية، صوت ذو تموضع متوسط ومنخفض، low and mid range belter يعني مغني بيعمل مكس على العلامات المنخفضة والمتوسطة و أوقات high range belter يعني بيعمل مكس على علامات عالية "هالشي صار بعد خروج JYJ"، صوت إذاعي، صوت مسرحي. بهالتصنيفات يونهو بيقدر يكون بوب ستار، رابر، ممثل مسرحي أو بالدوبلاج ومذيع بإذاعة، بيقدر يغني كمان بالاد وروك وبعض أنواع الجاز اللي بدها طبقة واطية كتير، وبيقدر يحط صوته بجوقات الغناء الجماعي كBass singer يعني للطبقات الواطية، هالشي عمله مع الDBSK ورح احكي عنه بمقال منفرد عن كيف أغاني DBSK بتنبنى موسيقياً باستخدام أصوات الخمسة أعضاء لأن برأيي هذا بناء عبقري.

المرونة والألوان الغنائية: يمكن DBSK/TVXQ هي الفرقة اللي عندها أعلى عدد من الأعضاء بأعلى مرونة موسيقية ممكنة! لأن كل اللي فيها مرنين موسيقياً بشكل مرعب!! يعني وقت لي سومان قام بترسيم هالخمسة من بين كل المتدربين اللي عنده هو من دون أدنى شك اختار بذلك الوقت نخبة النخبة أو Best of the best، هذا الشي بيشمل يونهو طبعاً! يونهو صوته بيناسب البوب، الروك بكل أنواعه! بحة صوته والجرحة اللي فيه بتطلع رهيبة بالروك، بالاد، هيب هوب وR&B, بعض أنواع الجاز والسول والبلوز وإضافة لأغاني الجوقات الموسيقية الكلاسيكية اللي بتطلب هارموني معين وفصل حواس، كل هذا يونهو وكل أعضاء TVXQ بيقدروا يعملوه، لازم بس نذكر إن بنمط الجوقات يونهو بياخذ طبقة الBass يعني أعرض وأخفض صوت، ولازم نزيد إن يونهو رابر شاطر كتير فعنده حس بالإيقاع ممتاز.

ميزات الخامة الصوتية: صوت يونهو بنطاق الراحة عنده عريض ورجولي وفيه بحة مسيطرة جميلة جداً، وفيه جرحة حلوة يا ريت لو يحسّن من استخدامه الها لأن رح تفرجي المزيد من خامته الصوتية. صوت يونهو قادر يكون دافي و بارد، وفيه خشونة خفيفة وفيه أوقات طابع دارك ومثير، صوته حتى فيه نبرة غضب أو طابع غاضب بيخليه حلو ومناسب كثير للروك والميتال، وبالرغم من كل هذا، يونهو بيقدر أوقات يعطي صوته طابع مشرق! ويغني بستايل كتير بوب، وهذا دليل انو مطور مهارات كتير بصوته، الألبوم الجديد مستخدم صوته بطابع مشرق أكثر، بأغاني TVXQ خاصة القديمة وقت كانوا خمسة، كان دائما ينعطى النوتات الأخفض وما كنا نقدر نشوف إن هو فعلا قادر يغني بصوت ذو طابع مشرق، لحد ما صار ما يثبتلنا العكس! لاحقاً رح نشوف إن إحدى نقاط قوة يونهو هو فهمه لصوته واجتهاده الكبير على تمرينه صوته ليقدر يزيد من تحكمه بطابع صوته سواء بالصوت الطبيعي أو المستعار.

ميزات التكنيك ونقاط قوة يونهو كمغني: يونهو صوته باريتون والSM بتحب أصوات التينور لكن هل جابوه عالفرقة بشكل عشوائي يترسم معهم؟ الجواب هو طبعاً لا، علماً إن بDBSK في باريتون ثاني غيره، والفرقة عموماً فيها واحد من أفضل وأجمل التنوعات الصوتية بالكيبوب وأكثرها تطوراً. الSM كان حابب يعمل فرقة مؤثرة تكون فرقة الجيل أو القرن! لهيك كان مخطط يعمل شي مليان هارموني ولهيك اختار هالشباب بالتنوع اللي عندهم.

يونهو لما كانوا الكل يغنوا مع بعض ويعملوا هارموني بصوتهم كان ليكون جزء من هالهارموني يغني بطبقة Bass يعني أخفض طبقة رجالية ممكنة وأخفض طبقة صوت بشري حتى! هون شو منستنتج؟ إن يونهو بيقدر يغني طبقات واطية كتير منيح! وهالشي أبداً غير شائع بين مغنيين البوب اللي أغلبهم بيتنافس على أعلى علامة ممكن يغنيها، بس لما يجربوا ينزلوا بصوتهم لتحت بيبلش النشاز، وهي أبدا مانها حالة يونهو اللي متمكن جدا من أداء العلامات المنخفضة بكل كفاءة وبيقدر ينزل بصوته منيح لأن متعود على هالشي من زمان. قد لا يكون هو أخفض باريتون بالفرقة، لكن لسبب ما تم تمرينه لياخذ جزء الBass بأداء الآكابيللا وواضح ان عنده فهم كبير لهذا الدور.

طبعاً عرفنا إن يونهو تمرن كتير وصار كمان يقدر يغني علامات عالية ولهيك توسعت مساحة صوته بشكل ملحوظ كمان.

بمنتصف صوته، يعني لما يونهو يغني باريتون الTessitura تبعه، بيختار يغني بأسلوب Breathy شوي، بيحط نفَس بصوته وهذا خيار جيد وذكي بيدل على إنه مغني بيعرف وبيفهم خامة صوته وبيعرف شو الخيار الغنائي اللي بيظهر أجمل صوت عنده، لأن لما بيغني بBreathy delivery هون بيصير في تركيز أعلى على بحة صوته، ومنسمعها بشكل واضح أكثر.

أوقات بيحط جزء من صوته بالخلف لما بيعمل مكس على علامات أعلى شوي، وجزء بالرأس وهالشي بيخلي صوته يطلع دافئ بس كمان Dark أكثر. لاحظوا لحد الآن أغلب تكنيك يونهو بيعتمد على فهمه لصوته وعلى الdelivery وشو نوع الصوت اللي حاببكم بالضبط تسمعوه وهالشي بيدل على فهم رهيب لخامة صوته، ثقافة موسيقية عالية، وذكاء كمان!

يونهو بس يعمل مكس ويحط جزء من الصوت بالأنف أوقات كتيرة بيعلق صوته بأنفه وهاد طبعاَ غلطة، لكن بحالة يونهو الصوت لما عم يعلق ما عم يطلع فيه Nasality أبدا، مع انو حدا موسيقي أو أي شخص بأذن نظيفة ممكن ينتبه إن صوته معلق شوي بأنفه، بس ما عم نسمع الصوت nasal ولا مزعج، لأن لحسن حظ يونهو خامة صوته بتنقذه! البحة والجرحة والعرض والخشونة اللي بصوته كلهم بينقذوا الوضع وبيعدلوا هالشي. لو كان صوت يونهو رفيع كنا سمعنا الnasality وحسينا بهالمشكلة, مثال عن هالحكي دونغهي من سوبر جونيور, لكن ذكرت هالشي بنقاط القوة لأن صاير الموضوع خطأ تكنيكي على نقطة قوة جاي من خامة الصوت الطبيعية وما لقيتلها تصنيف الا هون.

لازم اذكر مهارة فصل الحواس موسيقياً اللي أكيد حصلها من الأداء الطويل للآكابيللا اللي تدرب عليها مع الدبسك لما كانوا خمسة. و أكيد حسه الجيد بالإيقاع اللي تعلمه من الراب وانعكس على غناءه.

بعد غياب الJYJ، يونهو أشرق وتألق وتطور بشكل رهيب وكبير وملحوظ، ومكس الصدر المفتوح عنده تطور كتير وصار يستفيد منه ليعمل Rock belt وصوت الرأس عنده تطور كمان، وصار بيقدر يوصل لعلامات عالية ما كان يقدر يغنيها قبل أو يمكن ما كانت تنعطى اله أي مقاطع فيها هيك علامات قبل!

صرنا نسمع المزيد والمزيد من صوت يونهو بكل طابع ممكن! صوت يونهو الدارك والمشرق، صوت يونهو الhooty والمثير، صوته الدافئ والبارد! كل شي حرفياً، وصار بدنا بس يونهو يعطينا سولو لحد ما صارت بالأخير وصارت بوقت صح ومع استحقاق كامل.

نقاط ضعف ونقاط يمكن تحسينها: بالرغم من التمرين والاجتهاد والتطور الكبير اللي صار على صوت يونهو ومهاراته كمغني، لكن يونهو لسا شوي عنده مساحة يشتغل عليها بالمكس تبعه، وهو من دون أدنى شك الأضعف بالمكس بين الDBSK الخمسة، صوته بيعلق بأنفه أوقات مثل ما ذكرنا وما معنى إنه إذا مش دائما عم نسمع nasality بسبب خامة صوته يعني هالشي جيد، لأن طالما الصوت عم يعلق بالأنف أوقات هالشي بيخلينا نتسائل شو ممكن يطلع من صوته لو كمل المكس صح وخلى صوته يفتح عالآخر. صح؟ كمان أوقات بيعلق صوته بحلقه.

الشي الغريب واللي من النادر لنشوفه بس قادرة افهم ليش بيصير مع يونهو، هو إن يونهو صوته أوقات فيه رجفة وبيصير Shaky وبيخسر التحكم الTessitura تبعه أو خلينا نقول بمنطقة الراحة تبعه أو بمنتصف صوته، وهالشي غريب كتير لأن غير عادي وهو السبب بإن كان يتعرض لانتقاد ويتقارن بالبقية خاصة وجوده بفرقة فيها فعلياً وحوش فوكالز. بينما بالعلامات الواطية كتير أو الأعلى تقريبا ما بينشز. السبب الأول اعتقد إنه يونهو تم تدريبه بالأساس ليكون مغني Bass وهالشي برا منطقة راحته كصوت باريتون بينما ميكي صوته الطبيعي Bariton bass يعني بين بين، كان مرشح أفضل لهذا الدور. السبب الثاني أعتقد يونهو بيزيد التفكير والتركيز بالتكنيك وطابع الصوت اللي حاببنا نسمعه وهالشي بيخليه ما يركز يغني بنفس الكفاءة بمنتصف صوته بصوته الطبيعي "أنا عندي نفس المشكلة لما بغني كمان ولنفس السبب صارت معي, وقت كنت بجوقة غناء جبروني غني مع صوت الآلتو وأنا صوتي الطبيعي ميتسو وهالشي أثر على أدائي بصوتي الطبيعي". هالمشكلة بتنحل طبعا بالمزيد من التمرين، تجريب كتير أغاني. وإن نحاول نغني ونركز عالغناء نفسه أكثر من صوتنا كيف عم ينسمع. أعتقد يونهو بيدقق كثير عصوته لأن كان يتعرض للمقارنة مع الآخرين وهالشي مزعج أكيد.

بفرقة غير TVXQ/DBSK، هل ممكن يتغير موقع يونهو؟ الإجابة هي نعم بس لازم كمان نغير الوكالة، لأن SM ما بتعطي اهتمام كبير للأصوات العريضة المنخفضة وبتفضل الأصوات الرفيعة والعالية ذات الطابع المشرق أكثر، إذا بوكالة غير SM وفرقة غير DBSK لما كانوا خمسة، يونهو عنده مؤهلات lead vocalist . وحاليا بعد ما تطور واشتغل عحاله يونهو مغني منفرد شاطر بجدارة وبوكالة غير الSM وفرقة مش كتير بوب، يونهو قادر يكون main vocalist غالبا لفرقة روك.

أسئلة شائعة: ليش يونهو بالرغم من موهبته تعرض لكتير من الانتقاد سابقا كمغني؟الجواب هو لأن يونهو تعرض للمقارنة الغير عادلة مع زملائه بالفرقة, إضافة لوجوده بفرقة بتضم نخبة النخبة بهذاك الوقت+ الSM لسبب ما أصروا يمرنوه يغني على شي ما بيشبهه ولا بيناسب صوته وعملوا شوية خيارات غنائية بالفرقة بشوفها غريبة و بتثير التساؤل أوقات لأن ما عملوا هيك أخطاء مع فرق أولاد ثانية مثل سوبر جونيور.شايني واكسو. هالشي لاحقا يونهو استفاد منه مثل ما شفنا وانعكس ايجابا على مسيرته الغنائية,

لو يونهو غاب لظرف ما، مين أفضل شخص يغني مقاطعه؟ رح جاوب على هالسؤال باعتبار عنا DBSK الخمسة، لأن حاليا أغاني TVXQ مكتوبة بطريقة بيقدر يشيلها شخص واحد في حال غياب الثاني، مع هيك لنقول عنا الخمسة كلهم، فأفضل مرشح هو ميكي لأن صوته باريتون باص فبيقدر يشيل مقاطع يونهو الBass بالآكابيللا بل يمكن حتى يأديها أفضل منه لنكون صادقين! وبيقدر كمان يشيل مقاطعه الباريتون.

وبما إني إلف ويونهو نفسه كمان إلف ولسبب ما منحب نحسبه أوقات على سوبر جونيور، حابة زيد معلومة طريفة، رح قول إنو خامة صوت يونهو بتأهله يكون أفضل مرشح ياخذ مقاطع ييسونغ في حال غيابه لظرف ما بأقل فرق ممكن! بما إنو ولا حدا بسوبر جونيور بيقدر ياخذ مقاطع ييسونغ بدون ما تفرق علينا الأغنية, لهيك سوبر جونيور بيقدروا يستعيروه إذا بدهم D:

أداء جدير بالذكر: لضيق الوقت ولأن حابة لحق عيد ميلاد يونهو بتوقيت بلد إقامتي وبنفس الوقت اكتب هذا المقطع بكل حب وجدية وبأفضل صورة ممكنة، رح اتجاوز هذا المقطع حاليا، لكن بوعدكم رح حدثه خلال اليومين القادمين فانتظروه, لأن حابة اعطيه كل حقه وعيد الاستماع لأكبر عدد ممكن من الأداء اللايف لحتى اكتبه بأفضل شكل ممكن لأن يونهو ما بيستاهل أقل من الأفضل وخاصة لأن ما قدملنا أقل من الأفضل بألبومه الأخير Noir. لهيك حابة ما اكتب هذا المقطع كيف ما كان، رح عيد نشر المقال كامل بعد ما زيد عليه هذا المقطع، شكرا لتفهمكم

جميع حقوق هذا التحليل الصوتي محفوظة لمدونتي الخاصة

Lama 🦋